Yausuas 14
14
Faib Cheebtsam Av Ntawm Tus Dej Yauladees Uas Nyob Sab Hnubpoob
1Nov yog hais txog muab lub tebchaws Kana-as uas nyob ntawm tus dej Yauladees sab hnubpoob faib rau cov Yixalayees. Tus povthawj hlob Ele-axas, Noos tus tub Yausuas, thiab cov Yixalayees txhua xeem tej thawjcoj yog cov faib rau lawv. 2Lawv siv kev rho ntawv#14:2: rho ntawv: Rawsli ibtxwm ua, yog muab ib co pobzeb cim saib Vajtswv pomzoo licas. faib tej cheebtsam av ntawm tus dej Yauladees sab hnubpoob rau cuaj xeem thiab ibnrab xeem Manaxes rawsli tus TSWV tau xaaj rau Mauxes lawm. #Teev 26:52-56; 34:13 3-4Mauxes twb faib lub tebchaws ntawm tus dej Yauladees sab hnubtuaj rau ob xeem thiab ibnrab xeem uas i lawm. (Yauxej cajces tau muab faib ua ob xeem: xeem Manaxes thiab xeem Efalayees.) Txawm li ntawd los Mauxes tsis faib av rau xeem Levis li thiab tiamsis lawv kuj tau vaj tau tsev nyob thiab tau tshav zaub rau lawv tej tsiajtxhu huvsi. #Teev 32:33; 34:14-15; 2Kev 3:12-17 5Cov Yixalayees muab lub tebchaws faib rawsli tus TSWV tau xaaj rau Mauxes lawm.
Muab Lub Nroog Henploos Rau Kalej
6Muaj ib hnub, txawm muaj ibtxhia neeg ntawm xeem Yudas tuaj cuag Yausuas ntawm Nkilenkas. Muaj ib tug yog Yefunes tus tub Kalej, uas yog cuab Kenis, txawm hais rau Yausuas tias, “Koj yeej paub qhov uas tus TSWV tau hais txog koj thiab kuv rau Nws tus tubtxib Mauxes, thaum peb tseem nyob ntawm Kades Npane-as lawm. #Teev 14:30 7Thaum tus TSWV tus tubtxib Mauxes, txib kuv hauv Kades Npane-as mus soj lub tebchaws, kuv hnubnyoog muaj plaubcaug xyoo. Kuv coj tej lus tseeb rov los qhia rau nws. #Teev 13:1-30 8Cov neeg uas nrog kuv mus ntawd tau ua rau peb cov neeg ntshai heev. Tiamsis kuv tau ua ncajncees rau tus TSWV uas yog kuv tus Vajtswv. 9Vim kuv ua li ntawd, Mauxes thiaj coglus rau kuv hais tias kuv thiab kuv cov menyuam yuav tau feem av hauv lub tebchaws uas kuv tau mus tsuj ua peb tug. #Teev 14:24 10Tiamsis saib maj, txij thaum tus TSWV hais rau Mauxes los txog nimno twb tau plaubcaug-tsib xyoos lawm. Thaum ntawd tseem yog thaum cov Yixalayees taug kev los hla tiaj suabpuam, thiab tus TSWV tseem pub kuv muaj sia nyob los txog niajhnub no rawsli Nws tau coglus tseg. Koj sim saib kuv seb! Nimno kuv twb muaj yimcaum-tsib xyoos lawm, 11kuv tseem muajzog khovkho ib yam li thaum Mauxes txib kuv mus soj tebchaws. Kuv tseem muajzog txaus uas yuav mus ntaus rog lossis ua taus txhua yam haujlwm. 12Yogli ntawd, thov koj muab cheebtsam uas ua laj roob rau kuv rawsli tus TSWV tau coglus tseg rau kuv, hnub uas kuv thiab kuv cov neeg tau rov los tshabxo rau Mauxes. Thaum ntawd peb twb qhia rau nej sawvdaws hais tias cov neeg Anaj loj thiab siab heev, thiab lawv tej nroog muaj ntsayeej thaiv khov heev. Tejzaum tus TSWV yuav nrognraim kuv thiab kuv yuav caum tau lawv tawm rawsli tus TSWV tau hais tseg lawm.”
13Yausuas foom koobhmoov rau Yefunes tus tub Kalej thiab muab lub nroog Henploos rau nws ua nws tug. 14Lub nroog Henploos tseem yog Yefunes tus tub Kalej uas yog cuab Kenis cajces li ntiagtug, vim Kalej muaj lub siab ncajncees rau tus TSWV uas yog cov Yixalayees tus Vajtswv. 15Yav tag los lub nroog Henploos no hu ua Alanpas lub nroog. (Alanpas yog cov Anaj pab neeg uas loj tshajplaws.)
Lub tebchaws thiaj nyob thajyeeb tsis uarog.
Currently Selected:
Yausuas 14: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
