Henplais 4

1Vim Vajtswv cov lus cogtseg hais tias Nws yuav pub peb mus nrog Nws so, yogli ntawd, peb yuavtsum ceevfaj kom zoo tsis txhob pub nej ib leeg twg plam qhov uas Nws tau coglus tseg ntawd. 2Rauqhov peb puavleej hnov Txoj Moo Zoo ib yam li lawv tau hnov lawm thiab. Lawv hnov, tiamsis Txoj Moo Zoo ntawd tsis muajnqis rau lawv, vim thaum lawv hnov ntawd, lawv tsis txais yuav nrog txoj kev ntseeg. 3Peb cov uas ntseeg lawm, peb tau mus nrog Vajtswv so. Rawsli Vajtswv tau coglus tseg hais tias,

“Kuv npautaws, Kuv thiaj coglus tseg hais tias,

‘Lawv yuav tsis tau mus rau hauv lub tebchaws uas Kuv yuav muab rau lawv so!’ ”

Txawm yog Nws tes haujlwm twb tiav thaum Nws tsim ntuj tsim teb lawm los Nws tseem hais li ntawd. #Nnkauj 95:11 4Rauqhov nyob rau hauv Vajtswv tej Lus muaj ib qho tau hais txog hnub thib xya hais tias, “Hnub thib xya ntawd Vajtswv tau so ntawm txhua tes haujlwm uas Nws ua.” #Chiv 2:2 5Vajtswv kuj hais dua ib los ntxiv txog zaj no hais tias, “Lawv yuav tsis tau los nrog Kuv so ib zaug li.” #Nnkauj 95:11 6Cov neeg thaum ub uas xub hnov Txoj Moo Zoo, lawv tsis tau mus nrog Vajtswv so, rauqhov lawv tsis ntseeg, tiamsis Vajtswv kuj tseem pub rau qeeleej tau mus nrog Nws so thiab. 7Vimli ntawd, Vajtswv thiaj rov teem dua ib hnub uas hu ua, “Hnubno.” Ntau xyoo tomqab ntawd Vajtswv kom Daviv hais txog zaj ntawd rawsli muaj tseg rau hauv Vajtswv Txojlus lawm hais tias,

“Hnubno yog nej hnov Vajtswv lub suab,

tsis txhob tawv ncauj.” #Nnkauj 95:7-8

8Rauqhov yog Yausuas twb coj lawv sawvdaws mus so lawm, ces tsis tag Vajtswv yuav rov hais txog ib hnub dua ntxiv. #2Kev 31:7; Yaus 22:4 9Txawm licas los yeej tseem muaj hnub Xanpataus uas yog hnub so rau Vajtswv haivneeg thiab. 10Rauqhov tus uas mus nrog Vajtswv so lawm, tus ntawd yuav tsis ua haujlwm ib yam li Vajtswv tsis ua haujlwm lawm thiab. #Chiv 2:2 11Yogli ntawd, peb sawvdaws yuavtsum ua tiag kom tau txais txoj kev so ntawd, kom peb thiaj tsis muaj ib tug twg yuav plam li lawv, vim txoj kev tsis mlooglus.

12Rauqhov Vajtswv Txojlus ciajsia thiab muaj hwjchim. Tej lus ntawd tseem ntse dua txhua rab ntaj uas ob sab ntse, nkaug mus txog nruab plab nruab plawv, nruab nqaij nruab txha. Nws ntsuas tau tej uas neeg lub siab xav thiab txoj kev ntshaw huv tibsi. 13Tsis muaj ib yam dabtsi uas yuav muab zais tau es tsis pub Vajtswv pom. Txhua yam uas Vajtswv tsim los lawm, yeej raug muab nthuav huv tibsi rau Vajtswv saib. Peb txhua tus los nyias yuavtsum piav nyias yam rau Vajtswv thiab.

Yexus Yog Tus Tuam Povthawj Hlob Uas Loj

14Yogli ntawd, peb yuavtsum tuav txoj kev ntseeg uas peb tau lees lawm kom ruaj. Rauqhov peb muaj ib tug Tuam Povthawj Hlob uas loj, uas twb mus cuag Vajtswv lawm, tus ntawd yog Yexus, Vajtswv tus Tub. 15Peb tus Tuam Povthawj Hlob tsis yog ib tug uas tsis paub hlub peb thaum peb tsaugmuag, Nws yog ib tug uas twb raug txhua yam kev simsiab ib yam li peb los lawm, tiamsis Nws tsis tau ua ib qho txhaum hlo li. 16Yogli ntawd, cia peb ua siab tawv qhawv mus rau ntawm Vajtswv lub zwmtxwv uas muaj txoj hmoovhlub, kom peb thiaj yuav tau txais kev tabncuab thiab txoj hmoovhlub los pab peb thaum peb muaj kev tuncua.

Currently Selected:

Henplais 4: MWW2022

Highlight

Copy