Henplais 11

Kev Ntseeg

1Kev ntseeg yog qhov uas peb ruajsiab rau tej uas peb ciasiab rau, thiab yog qhov uas peb tuagsiab rau tej uas peb qhovmuag tsis pom. 2Twb yog vim cov neeg txheej thaum ub txoj kev ntseeg, Vajtswv thiaj txaussiab rau lawv.

3Los ntawm txoj kev ntseeg peb thiaj totaub hais tias lub ntiajteb no yog tsim los ntawm Vajtswv lolus. Yogli ntawd, yam uas peb qhovmuag pom tau yog tshwm los ntawm yam uas peb qhovmuag tsis pom. #Chiv 1:1; Nnkauj 33:6, 9; Yauh 1:3

4Los ntawm txoj kev ntseeg, Anpees thiaj muab tej khoom uas zoo dua Ka-ees li fij rau Vajtswv. Los ntawm Anpees txoj kev ntseeg, Vajtswv thiaj suav tau hais tias nws yog tus ncajncees. Vajtswv txaussiab txais yuav Anpees cov khoom fij ntawd, yog ua povthawj qhia hais tias Anpees yog neeg ncajncees. Txawm yog Anpees twb tuag lawm los nws txoj kev ntseeg tseem niajhnub qhia peb. #Chiv 4:3-10

5Los ntawm txoj kev ntseeg, Enauj thiaj raug coj mus rau saum ntuj thiab tsis pub nws ntsib txoj kev tuag. Tsis muaj leejtwg nrhiav tau nws vim Vajtswv tau coj nws mus lawm. Vajtswv Txojlus hais tias uantej uas Vajtswv coj Enauj mus, Enauj yog ib tug uas ua haum Vajtswv lub siab nyiam. #Chiv 5:21-24 6Yog tsis muaj kev ntseeg yeej ua tsis tau haum Vajtswv siab, rauqhov tus uas los cuag Vajtswv, nws yuavtsum ntseeg tias yeej muaj Vajtswv thiab Vajtswv yeej muab nqizog rau tus uas nrhiav Nws.

7Los ntawm txoj kev ntseeg, Nau-as thiaj hnov Vajtswv tej lus ceebtoom txog tej uas yuav muaj los rau yav tomntej uas Nau-as tsis tau pom txog. Nau-as mloog Vajtswv lus, nws thiaj txua ib lub nkoj los cawm nws tsev neeg. Thaum kawg, lub ntiajteb tau raug kev puastsuaj tiamsis Vajtswv suav hais tias Nau-as yog tus uas ncajncees vim nws txoj kev ntseeg. #Chiv 6:13-22

8Los ntawm txoj kev ntseeg, Anplahas thiaj mloog Vajtswv lus. Thaum Vajtswv hu kom Anplahas tawm mus rau lub tebchaws uas Vajtswv coglus tseg yuav muab pub rau nws; nws mloog Vajtswv lus nws thiaj tawm hauv nws lub tebchaws mus, tiamsis yeej tsis paub tias xyov nws yuav mus rau qhovtwg li. #Chiv 12:1-5 9Los ntawm txoj kev ntseeg, nws thiaj mus nyob rau hauv tej tsevntaub zooli ib tug neeg txawv tebchaws, uas yog nyob rau hauv lub tebchaws uas Vajtswv coglus yuav muab rau nws. Ixaj thiab Yakhauj nkawd los kuj nyob hauv tsevntaub ib yam nkaus, vim Vajtswv coglus tseg rau nkawd ib yam li coglus rau Anplahas thiab. #Chiv 35:27 10Rauqhov Anplahas tabtom tosntsoov lub nroog uas Vajtswv yog tus tawm qauv thiab tsimtsa, lub nroog ntawd yog lub uas ruaj-khov thiab yuav nyob mus ibtxhis li.

11Los ntawm txoj kev ntseeg, txawm yog Anplahas twb laus heev thiab Xalas yeej ibtxwm xeeb tsis taus tub los nws#11:11: Los ntawm txoj kev ntseeg … xeeb tsis taus tub los nws; tej phau ntawv qub uas xuas tes sau, muaj Los ntawm txoj kev ntseeg, txawm yog Xalas twb laus heev lawm los nws tseem xeeb taus tub. ruajsiab hais tias Vajtswv yeej yuav ua rawsli Vajtswv tej lus cogtseg. #Chiv 18:11-14; 21:2 12Txawm yog Anplahas twb zooli tus tuag lawm xwb, los nws tseem muaj cajces ntau npaum li cov hnubqub uas nyob saum nruabntug, thiab npaum li cov xuabzeb ntawm ntug hiavtxwv uas suav tsis txheeb. #Chiv 15:5; 22:17; 32:12

13Tagnrho cov neeg no puavleej tuag nrog txoj kev ntseeg. Lawv tsis tau txais tej uas Vajtswv tau coglus tseg rau lawv, lawv tsuas yog tuaj deb-deb pom thiab txais yuav ntawm txoj kev zoosiab xwb; thiab lawv lees paub tias lawv yeej tsis muaj teb tsis muaj chaw nyob hauv ntiajteb no, lawv tsuas yog taug kev ua qhua xwb. #Chiv 23:4; 1Xwm 29:15; Nnkauj 39:12 14Cov neeg uas hais li ntawd, qhia tau hais tias lawv tseem tabtom nrhiav ib lub tebchaws uas yog lawv li ntiagtug. 15Lawv yeej nco tsis txog lub tebchaws uas lawv tawm tuaj lawm; yog lawv nco txog, ces lawv twb nrhiav kev rovqab mus nyob lawm. 16Tiamsis lawv tseem tosntsoov lub tebchaws uas zoo dua ntawd, lub ntawd yog ntuj ceebtsheej. Yogli ntawd, Vajtswv thiajli tsis txajmuag cia lawv hu Nws hais tias Nws yog lawv tus Vajtswv, rauqhov Nws twb npaj ib lub nroog cia rau lawv lawm.

17Los ntawm txoj kev ntseeg, thaum Vajtswv sim Anplahas siab, Anplahas thiaj muab nws tus tub Ixaj ua khoom fij rau Vajtswv. Anplahas twb yog tus uas Vajtswv tau coglus kiag rau los nws tseem zoosiab muab nws tibtug tub coj mus ua khoom fij rau Vajtswv thiab. #Chiv 22:1-14 18Vajtswv twb hais rau Anplahas lawm hais tias, “Koj li cajces yuav los ntawm Ixaj los.” #Chiv 21:12 19Anplahas ntseeg tias Vajtswv yeej muaj peevxwm tsa tau Ixaj sawv hauv txoj kev tuag rov los. Yog muab hais los, ces Anplahas yeej tau Ixaj hauv txoj kev tuag rovqab los tiag.

20Los ntawm txoj kev ntseeg, Ixaj thiaj foom koobhmoov rau Yakhauj thiab Exaus nkawd lub neej rau yav tomntej. #Chiv 27:27-29, 39-40

21Los ntawm txoj kev ntseeg, thaum Yakhauj yuav tuag, nws thiaj foom koobhmoov rau Yauxej ob tug tub thiab muab nws tus cwjnrig los txheem nws lub cev thaum nws pehawm Vajtswv. #Chiv 48:1-20; Chiv 47:31

22Los ntawm txoj kev ntseeg, thaum Yauxej yuav tuag, nws thiaj hais txog zaj uas cov Yixalayees yuav tawm hauv tebchaws Iziv mus, thiab nws qhia txog qhov uas seb lawv yuav muab nws cov pobtxha ua licas. #Chiv 5:24-25; Khiav 13:19

23Los ntawm txoj kev ntseeg, tomqab uas yug tau Mauxes lawm, Mauxes niam thiab txiv thiaj muab Mauxes zais tau peb lub hlis. Nkawd pom tias tus metub ntawd ntxim hlub heev, nkawd thiaj tsis ntshai vajntxwv tej lus xaaj. #Khiav 2:2; Khiav 1:22

24Los ntawm txoj kev ntseeg, thaum Mauxes lojhlob lawm, nws tsis pub leejtwg hu hais tias nws yog Falaus tus ntxhais tus tub. #Khiav 2:10-12 25Nws yeem nrog Vajtswv haivneeg raug kev txomnyem zoo dua li mus ua tej kev phem kev qias ib nyuag ntu. 26Nws suav hais tias qhov uas nws tiv kev txomnyem pub rau tus Mexiyas tseem muajnqis tshaj txhua tsavyam zoo uas nyob hauv tebchaws Iziv, rauqhov nws ntsiantsoov rau nws qhov nqizog uas yav tomntej nws yuav tau.

27Los ntawm txoj kev ntseeg, Mauxes thiaj tawm hauv tebchaws Iziv mus yam tsis ntshai vajntxwv txoj kev npautaws kiag li. Nws ua siabntev tiv yam li nws twb pom Vajtswv tus uas qhovmuag tsis pom lawm. #Khiav 2:15 28Los ntawm txoj kev ntseeg, Mauxes thiaj ua kevcai Hla Dhau thiab kom sawvdaws muab ntshav pleev qhovrooj, kom tus timtswv ntawm txoj kev tuag thiaj tsis tua cov Yixalayees cov tub hlob. #Khiav 12:21-30

29Los ntawm txoj kev ntseeg, cov Yixalayees thiajli mus phua plhawv hauv hiavtxwv liab ib yam li mus saum nruabnqhuab. Tiamsis thaum cov neeg Iziv sim mus li lawv mus, uaciav dej ciali nphau los npog lawv tuag tag huv tibsi. #Khiav 14:21-31

30Los ntawm txoj kev ntseeg, thaum cov Yixalayees mus ncig lub nroog Yelikaus tau xya hnub, lub nroog ntawd tej ntsayeej txawm vau tag huv tibsi. #Yaus 6:12-21 31Los ntawm txoj kev ntseeg, tus niamntiav uas hu ua Lahaj thiaj tsis tuag nrog cov neeg uas tsis mloog Vajtswv lus, rauqhov nws tostxais cov Yixalayees ob tug tub soj tebchaws. #Yaus 6:22-25; Yaus 2:1-21

32Kuv yuav hais npaum licas ntxiv thiab? Tsis muaj sijhawm txaus rau kuv los hais txog Kide-oos, Npalaj, Xaxoos, Yethas, Daviv, Xamuyees thiab cov xibhwb cev Vajtswv lus. #Cthj 6:11—8:32; Cthj 4:6—5:31; Cthj 13:2—16:31; Cthj 11:1—12:7; 1Xamu 16:1—1Vaj 2:11; 1Xamu 1:1—25:1 33Los ntawm txoj kev ntseeg, lawv thiaj ntaus yeej ntau lub tebchaws. Lawv coj ncaj lawv thiaj tau tej uas Vajtswv tau coglus tseg rau lawv. Lawv kaw tau tej tsov ntxhuav qhovncauj, #Dani 6:1-7 34tua tau cov hluavtaws uas cig hlob-hlob, thiab khiav dim ntawm hniav ntaj hniav riam. Txawm lawv tsaugmuag los lawv dhau mus ua neeg muajzog; lawv muaj peevxwm tua thiab tawmtsam yeej lwm haivneeg tej tubrog. #Dani 3:1-30 35Los ntawm txoj kev ntseeg, cov pojniam thiaj tau lawv tej neeg uas tuag lawm sawv rovqab los.

Muaj ibtxhia raug kev tsimtxom tiamsis lawv tsis kam kom luag muab lawv tso, lawv yeem tuag kom lawv thiaj rov ciajsia thiab sawv mus muaj lub neej uas zoo dua qub. #1Vaj 17:17-24; 2Vaj 4:25-37 36Muaj qeeleej raug thuam thiab raug nplawm, thiab tseem raug muab saw hlau khi coj mus kaw rau hauv tsev lojcuj. #1Vaj 22:26-27; 2Xwm 18:25-26; Yelemi 20:2; 37:15; 39:6 37Lawv raug muab pobzeb ntaus, raug muab kaw txiav ua ob ya, thiab raug muab ntaj tua. Lawv hnav tawv yaj tawv tshis mus-mus los-los, lawv tshaib nqhis, lawv raug tsimtxom, thiab raug saib tsis taus. #2Xwm 24:21 38Lub ntiajteb no tsis tsimnyog rau lawv nyob! Lawv khiav mus nyob tom tej roob mojsab qhua thiab pem tej roob; lawv nyob hauv tej qhovzeb qhovtsua thiab qhov av.

39Txhua tus no puavleej raug qhuas vim lawv txoj kev ntseeg, tiamsis lawv tseem tsis tau tau tej uas Vajtswv coglus tseg rau lawv thiab. 40Rauqhov Vajtswv tau npaj yam uas tseem zoo dua tej ntawd rau peb lawm; yuavtsum yog lawv koom nrog peb xwb mas lawv thiaj yuav tau yam uas zoo kawg nkaus.

Currently Selected:

Henplais 11: MWW2022

Highlight

Copy