Henplais 10
10
1Cov Yudais txoj Kevcai tsuas yog tus duab ntawm tej yam zoo uas tseem yuav los tomntej no xwb, nws tsis yog tej tseeb tiag-tiag. Tej khoom fij uas lawv niaj xyoo coj mus fij rawsli txoj kevcai, yeej pab tsis tau cov neeg uas tuaj pehawm Vajtswv ntawd kom ua tau neeg zoo kiag li. 2Yog cov neeg uas mus pehawm Vajtswv ntawd, lawv lub txim yeej raug ntxuav lawm tiag, ces lawv yeej yuav tsis xav txog lawv qhov kev txhaum ntxiv thiab yeej yuav tsis muab tsiaj tua theej txhoj li lawm. 3Tiamsis qhov uas lawv niaj xyoo tua tsiaj theej txhoj ntawd, ua rau lawv ncontsoov txog lawv tej kev txhaum. 4Rauqhov tej ntshav txiv nyuj thiab ntshav tshis yeej ntxuav tsis tau neeg tej kev txhaum kom tag mus ib zaug li.
5Twb yog vimli ntawd, thaum Khetos yuav los rau hauv ntiajteb no, Nws thiaj hais rau Vajtswv hais tias:
“Koj tsis yuav tej tsiaj uas tua theej txhoj thiab tej khoom fij,
tiamsis Koj tau npaj ib lub cev rau Kuv lawm.
6Koj yeej tsis txaussiab rau tej tsiaj uas tau muab tua hlawv rau saum lub thaj,
lossis tej uas coj tuaj fij daws txim.
7Tomqab ntawd Kuv hais tias, ‘Au Vajtswv, kuv nyob ntawm no,
Kuv yuav ua rawsli Koj siab nyiam,
raws nraim li tej lus uas tau sau hais txog Kuv hauv phau Kevcai.’ ”
8Thaum chivthawj Nws hais tias, “Koj yeej tsis yuav lossis txaussiab rau tej tsiaj uas tua theej txhoj, tej khoom fij, tej tsiaj uas muab tua hlawv rau saum lub thaj, thiab tej uas coj tuaj fij daws txim.” Txawm yog txhua yam kev fij ntawd puavleej yog rawsli kevcai los Nws yeej tseem hais li ntawd. 9Tomqab ntawd Nws hais tias, “Au Vajtswv, Kuv nyob ntawm no, Kuv yuav ua rawsli Koj lub siab nyiam.” Yogli ntawd, Vajtswv thiaj muab txoj kevcai uas muab tsiaj tua theej txhoj ntawd tsotseg thiab muab Khetos txoj kev theej txhoj los hloov chaw. 10Vim Yexus Khetos ua raws nraim li qhov uas Vajtswv xav kom Nws ua, peb txhua tus lub txim thiajli raug muab ntxuav kom dawbhuv los ntawm qhov uas Nws muab Nws lub cev theej peb lub txhoj, uas yog tibzaug xwb tsis tag yuav muaj ntxiv li lawm.
11Cov Yudais cov povthawj hlob txhua tus niajhnub ua haujlwm thiab muab tej tsiaj tua theej txhoj, uas yog ua yam qub tas mus li xwb; tiamsis tej ntawd ntxuav tsis tau neeg tej kev txhaum. #Khiav 29:38 12Tiamsis Khetos tsuas theej txhoj tibzaug xwb, kav tag mus ibtxhis. Nws nyob ntawm Vajtswv sab xis. #Nnkauj 110:1 13Nimno Nws tseem nyob ntawd tos mus txog hnub uas Vajtswv muab Nws cov yeebncuab los ua Nws lub tog tiag taw. 14Nws theej txhoj tibzaug xwb ua rau cov uas raug ntxuav lawm ua tau neeg zoo kawg nkaus mus ibtxhis li.
15Vaj Ntsujplig tus Dawbhuv kuj ua timkhawv rau peb thiab. Nws xub hais li no:
16“Tus Tswv hais tias, No yog tej lus cogtseg uas Kuv yuav muaj rau lawv
nyob rau yav tomntej.
Kuv yuav muab Kuv txoj kevcai tso rau hauv lawv lub siab,
thiab yuav sau txoj kevcai ntawd rau hauv lawv lub hlwb.” #Yelemi 31:33
17Tomqab ntawd Nws thiaj hais tias, “Kuv yuav tsis cimntsoov lawv tej kev txhaum thiab tej kev phem uas lawv ua mus ntxiv lawm.” #Yelemi 31:34 18Yogli ntawd, thaum tej ntawd twb raug zam lawm, ces tsis tag yuav tua tsiaj theej txhoj ntxiv li lawm.
Cia Peb Txav Los Ze Vajtswv
19Cov kwvtij, twb yog vim Yexus cov ntshav, peb thiaj muaj cuabkav mus rau hauv Chav Dawbhuv Kawg Nkaus. 20Nws qhib ib txojkev tshiab uas yog ib txoj ciajsia, uas yog los ntawm daim ntaub; qhov ntawd yog los ntawm Nws lub cev. 21Peb muaj ib tug povthawj hlob uas zoo heev ua tus saib Vajtswv tsev neeg lawm, 22yogli ntawd, cia peb txav los ze Vajtswv los ntawm lub siab ncajncees uas puvnpo txoj kev ntseeg, nrog lub siab uas tau raug ntxuav kom dawbhuv thiab lub cev uas raug ntxuav los ntawm cov dej uas ntshiab huvsi. #Levi 8:30; Exek 36:25
23Cia peb tuav txoj kev ciasiab uas peb twb tau lees lawm kom ruaj-ruaj, rauqhov Vajtswv tus uas tau coglus tseg lawm, Nws yeej ncajncees. 24Peb yuavtsum ua tibzoo saib seb peb yuav ua licas ib tug thiaj txhawb tau ib tug lub zog rau txoj kev sibhlub thiab txoj kev ua zoo. 25Cia peb tsis txhob tso txoj kev uas tuaj txoos uake tseg, ib yam li qeeleej uas tau tsotseg lawm, tiamsis cia peb ib leeg yuavtsum txhawb ib leeg lub zog ntau dua qub vim peb twb pom lawm hais tias hnub uas tus Tswv rovqab los twb ze zujzus lawm.
26Yog peb tseem txhobtxwm ua kev txhaum tomqab uas peb twb paub qhov tseeb lawm, yeej tsis muaj ib yam dabtsi yuav theej tau peb lub txhoj ntxiv lawm, 27tsuas yog tshuav kev txhawj-ntshai tos rawv txoj kev txiavtxim thiab cov hluavtaws uas kub heev yuav hlawv cov neeg uas tawmtsam Vajtswv lawm xwb. #Yaxaya 26:11 28Leejtwg uas tsis coj rawsli Mauxes txoj Kevcai, yog muaj puavpheej los ntawm ob leeg lossis peb leeg ua timkhawv tau, ces tus ntawd yeej raug muab tua povtseg yam tsis muaj kev tabncuab txog nws kiag li. #2Kev 17:6; 19:15 29Yogli ntawd, nej sim xav seb cov uas muab Vajtswv tus Tub tsuj nthi rau hauv kotaw, thiab suav hais tias cov ntshav ntawm lolus cogtseg uas tau ntxuav lawv tej kev txhaum kom dawbhuv ntawd yeej tsis tseemceeb, thiab txobthuam Vaj Ntsujplig tus uas muaj txoj hmoovhlub, lawv yuav raug txim loj npaum licas? #Khiav 24:8 30Rauqhov peb paub tus uas tau hais tias, “Txoj kev sib pauj yog Kuv li; Kuv yog tus uas yuav pauj,” thiab tus uas tau hais ntxiv tias, “Tus Tswv yuav txiavtxim rau Nws haivneeg.” #2Kev 32:35; 2Kev 32:36 31Qhov uas poob rau hauv Vajtswv tus uas muaj sia nyob lub xibteg, yog ib qhov uas txaus ntshai tshajplaws!
32Nej ua tibzoo xav seb yav tas los nej lub neej zoo licas. Thaum ntawd, tomqab uas Vajtswv qhov kaj tau ci rau nej lawm, nej tau raug ntau yam kev txomnyem, tiamsis nej tseem ua siabntev tiv. 33Muaj qeezaus nej raug txobthuam thiab raug tsimtxom tabmeeg tej neeg sawvdaws; muaj qeezaus nej kuj tau koom tiv kev txomnyem nrog cov neeg ntawd thiab. 34Nej muaj lub siab hlub cov neeg uas raug kaw hauv tsev lojcuj; thaum muaj neeg txeeb nej tej qhov txhia chaw, los nej yeej zoosiab hlo cia lawv nqa mus, rauqhov nej twb paub tias nej tseem tshuav yam uas zoo dua tej ntawd, thiab yog yam uas yuav nyob mus ibtxhis. 35Yogli ntawd, nej tsis txhob poobsiab, rauqhov yam ntawd yuav coj qhov nqizog uas loj heev los rau nej. 36Nej yuav tau ua siabntev, nej thiaj yuav ua tau rawsli Vajtswv lub siab nyiam thiab tau txais tej uas Nws tau coglus tseg lawm. 37Rauqhov Vajtswv Txojlus hais tias,
“Twb tshuav tsis ntev lawm,
tus uas yuav los, Nws twb yuav los;
Nws yuav tsis ncua sijhawm lawm.
38Tiamsis Kuv haivneeg uas ncajncees yuav ua neej nrog txoj kev ntseeg;
yog leejtwg thim rovqab,
Kuv yuav tsis txaussiab rau tus ntawd.” #Hanpa 2:3-4
39Peb tsis yog cov neeg uas thim rovqab es mus raug kev puastsuaj, tiamsis peb yog cov uas muaj txoj kev ntseeg thiab tau txoj kev dim txim.
Currently Selected:
Henplais 10: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
