Chivkeeb 45

Yauxej Qhia Nws Rau Cov Kwvtij Paub

1Yauxej tauv tsis taus nws lub kuamuag tabmeeg nws cov tubtxib li lawm, nws thiaj xaaj kom cov tubtxib ntawd tawm mus. Thaum ntawd tsis muaj leejtwg nrog lawv nyob ntawd lawm, Yauxej thiaj qhia rau nws cov kwvtij hais tias nws yog leejtwg tiag. #Teshl 7:13 2Yauxej tsa suab hlo quaj nrov-nrov, ua rau cov neeg Iziv puavleej hnov, thiaj muaj neeg mus piav zaj no qhia rau hauv Falaus lub loog.

3Yauxej hais rau nws cov kwvtij tias, “Kuv yog Yauxej ntag. Kuv txiv puas tseem muaj sia nyob?” Thaum nws cov kwvtij hnov nws hais li ntawd, lawv ntshai heev ua rau lawv teb tsis taus ib los li.

4Yauxej hais rau lawv tias, “Nej ciali txav los ze-ze kuv.” Lawv thiaj txav zog los rau ntawm nws, thiab nws hais rau lawv tias, “Kuv yog nej tus kwv Yauxej uas nej muab muag rau hauv tebchaws Iziv. 5Nimno nej tsis txhob txhawj lossis chim rau nej tuskheej txog qhov uas nej muab kuv muag los rau ntawm no. Yeej yog Vajtswv txib kuv ua nej ntej los, thiaj cawm tau neeg txojsia. 6Tej kev tshaib nqhis no, xyoo no nyuamqhuav yog xyoo thib ob xwb, tseem tshuav tsib xyoos tomntej no ntxiv, mas yuav tsis muaj leejtwg cog thiab saum tau qoobloo hlo li. 7Vajtswv txib kuv ua nej ntej yog los pab cawm nej ua ib haivneeg nyob rau hauv lub ntiajteb no, kom thiaj yuav ceev tau nej thiab nej li cajces kom muaj sia nyob. 8Nej tsis yog cov uas xa kuv los rau ntawm no, tiamsis Vajtswv yog tus uas xa kuv los! Nws yog tus tsa kuv ua Falaus ib tug nom uas loj tshajplaws. Kuv yog tus uas saib tagnrho Falaus tej vajtse thiab kav tagnrho lub tebchaws Iziv no.

9“Zaumno nej ciali majnroos rovqab mus cuag kuv txiv thiab qhia rau nws hais tias, ‘Yauxej uas yog koj tus tub hais li no: Vajtswv tsa kuv ua tus kav tagnrho lub tebchaws Iziv lawm; koj ciali los nrog kuv nyob sai li sai tau. 10Coj koj tuskheej, coj tagnrho koj cov menyuam, cov xeebntxwv, nej tej yaj, tej tshis, tej nyuj thiab txhua yam uas nej muaj los nyob rau hauv cheebtsam Nkausees, qhov chaw uas nyob ze kuv. 11Yog koj los nyob hauv Nkausees, mas kuv thiaj yuav pab tau koj. Kev tshaib nqhis tseem tshuav tsib xyoos tomntej no ntxiv, mas kuv tsis xav kom koj, koj tsev neeg, thiab koj tej tsiajtxhu tuag tshaib li.’ ” #Teshl 7:14

12Yauxej hais ntxiv tias, “Zaumno nej txhua tus, thiab kwv Npeeyamees, puavleej pom tias kuv yog Yauxej tiag. 13Nej ciali qhia rau kuv txiv paub tias kuv muaj hwjchim loj npaum licas nyob hauv tebchaws Iziv no, thiab qhia txhua yam uas nej tau pom lawm rau nws mloog, thiab ciali majnroos coj nws los nyob ntawm no.”

14Yauxej puag nkaus nws tus kwv Npeeyamees thiab quaj; Npeeyamees los kuj puag nkaus Yauxej thiab sibqawg quaj. 15Yauxej ibke quaj ibke mus puag cov tijlaug thiab nwj lawv ib tug rau ib tug. Tomqab ntawd nws cov tijlaug mam pib nrog nws tham.

16Thaum muaj neeg mus qhia zaj no rau hauv Falaus lub loog hais tias Yauxej cov tijlaug tuaj txog lawm, Falaus thiab nws cov nomtswv zoosiab kawg li. 17Falaus hais rau Yauxej tias, “Hais rau koj cov tijlaug kom tsaws nra rau lawv tej tsiaj thauj rovqab mus lawm pem tebchaws Kana-as. 18Kom lawv mus coj lawv txiv thiab tej pojniam menyuam es rovqab los cuag kuv ntawm no. Kuv yuav muab thaj av uas zoo kawg nkaus hauv tebchaws Iziv no rau lawv, lawv thiaj yuav muaj noj muaj haus nplua-mias.

19“Hais kom lawv coj tsheb nees hauv tebchaws Iziv no mus tos lawv tej pojniam menyuam thiab koj txiv los nyob hauv tebchaws Iziv no. 20Kom lawv tsis txhob khuvxim txog lawv tej cuabyeej toomtxeem uas yuav muab tsotseg; rauqhov tej uas zoo tshajplaws hauv tebchaws Iziv no yuav yog lawv tug huvsi.”

21Yakhauj cov tub ua rawsli tej lus uas hais rau lawv lawm. Yauxej muab tau ntau lub tsheb neeg rau lawv rawsli Falaus tau xaaj tseg, thiab muab zaub-mov rau lawv coj mus tau noj taus kev. 22Yauxej muab tau ib leeg ib ce tsoostsho tshiab rau nws cov tijlaug, tiamsis nws muab tau 300 lub txiajnyiag thiab tsib ce tsoostsho rau Npeeyamees. 23Nws muab tau kaum tus neesluav thauj tej khoom uas zoo tshajplaws hauv tebchaws Iziv mus rau nws txiv, thiab muab dua kaum tus neesluav thauj nplej, ncuav thiab lwmyam zaub-mov rau lawv tau noj taug kev. 24Nws thiaj xa nws cov kwvtij rovqab. Thiab thaum lawv sawvkev mus, nws hais rau lawv tias, “Nej tsis txhob sibcav sibceg tom tej tog kev nawb.”

25Lawv tawm hauv tebchaws Iziv rovqab mus tsev, mus cuag lawv txiv Yakhauj uas nyob rau pem tebchaws Kana-as. 26Lawv hais rau Yakhauj tias, “Yauxej tseem muaj sia nyob! Nws yog tus uas kav tagnrho tebchaws Iziv!” Yakhauj ciali yoob tag thiab tsis ntseeg tej lus uas lawv hais ntawd.

27Tiamsis thaum lawv piav txhua yam uas Yauxej hais rau Yakhauj mloog tag, thiab thaum nws pom cov tsheb uas Yauxej xa tuaj tos nws mus nyob rau hauv tebchaws Iziv, nws thiaj rov zoosiab. 28Nws hais tias, “Tseeb tiag lau! Kuv tus tub Yauxej tseem muaj sia nyob! Kuv yuavtsum mus pom nws uantej kuv tuag.”

Currently Selected:

Chivkeeb 45: MWW2022

Highlight

Copy