Chivkeeb 34

Dinas Raug Yuam

1Muaj ib hnub Yakhauj thiab Le-as nkawd tus ntxhais Dinas txawm tawm mus saib cov ntxhais hluas uas yog neeg Kana-as. 2Hamaus uas yog neeg Hivis, nws yog tus thawj uas saib cheebtsam ntawd; thaum nws tus tub Sekhees pom Dinas, Sekhees txawm tuaj ntes Dinas mus thiab muab Dinas yuam. 3Tiamsis vim nws pom tias Dinas uas yog Yakhauj tus ntxhais ntawd zoonkauj heev, nws ciali nyiam Dinas thiab ciali haislus qabzib heev rau Dinas. 4Sekhees thiaj hais rau nws txiv tias, “Txiv, kuv xav kom koj mus yuav tus ntxhais ntawd los ua kuv tus pojniam.”

5Yakhauj paub tias nws tus ntxhais raug kev poob ntsejmuag, tiamsis vim nws cov tub mus yug nws cov tsiaj rau nram teb lawm, nws thiaj tsis hais ib yam dabtsi txog thaum nws cov tub los tsev txhij. 6Hamaus uas yog Sekhees txiv thiaj tuaj nrog Yakhauj tham, 7tomthawj thaum Yakhauj cov tub rov nram teb los txog tsev. Thaum lawv hnov txog zaj no, lawv mobsiab thiab chim heev rauqhov Sekhees tau ua ib qho uas rhuav ntsej rhuav muag heev, ua saib tsis taus cov neeg Yixalayees uas yog nws muab Yakhauj tus ntxhais yuam li ntawd.

8Hamaus hais rau Yakhauj tias, “Kuv tus tub Sekhees nyiam koj tus ntxhais heev li lawm, yogli ntawd, thov muab koj tus ntxhais rau nws yuav ua pojniam. 9Thov peb los sib coglus hais tias yuav muaj kev tis tshoob tis kos nruabnrab ntawm nej haivneeg thiab peb haivneeg. 10Nej nrog peb nyob hauv peb lub tebchaws no los yeej tau. Nej yuav nyob thaj chaw twg los nyob ntawm nej nyiam, qhib kev lug rau nej ua lag ua luam, thiab nej xav yuav vaj yuav tsev los ua nej ntiagtug los yeej tau.”

11Ces Sekhees hais rau Dinas txiv thiab nws cov nus tias, “Thov nej ua zoo rau kuv, kuv yuav muab txhua yam uas nej xav tau rau nej. 12Thov qhia seb yam khoomplig twg uas nej xav tau, thiab hais tus nqi tshoob kom siab npaum li nej xav sau; nej xav kom them npaum cas los kuv yuav them npaum ntawd rau nej, tsuav yog nej kam muab nws rau kuv yuav ua pojniam xwb.”

13Vim qhov uas Sekhees tau ua rau lawv tus muam Dinas raug kev poob ntsejmuag, Yakhauj cov tub thiaj teb dag ntsuav rau Sekhees thiab nws txiv Hamaus. 14Lawv hais rau Sekhees tias, “Peb tsis pomzoo cia peb tus muam mus yuav ib tug txivneej uas tsis tau ua kevcai txiav tawv; yog ua li ntawd mas rhuav peb ntsejmuag heev. 15Tsuas muaj tibqho uas peb thiaj yuav kam xwb: nej txhua tus txivneej yuavtsum tau ua kevcai txiav tawv ib yam li peb ua huv tibsi, 16mas peb haivneeg thiab nej haivneeg thiaj yuav paub ua tshoob ua kos. Peb thiaj yuav nrog nej nyob tau uake thiab thiaj yuav nrog nej ua tau ib haivneeg. 17Tiamsis yog nej tsis lees ua rawsli peb hais thiab ua kevcai txiav, ces peb yuav tuaj coj peb tus muam thiab khiav tawm hauv tebchaws no mus.”

18Hamaus thiab nws tus tub Sekhees pomzoo yuav rawsli lawv hais ntawd, 19ces tus tub hluas txawm majnroos ua rawsli lawv tau hais ntawd, rauqhov nws nyiam Yakhauj tus ntxhais heev. Sekhees yog tus uas tseemceeb tshajplaws nyob rau hauv nws tsev neeg.

20Hamaus thiab nws tus tub Sekhees thiaj mus rau tim qhov chaw sablaj uas nyob rau tim roojloog thiab hais rau cov pejxeem hauv lub moos hais tias: 21“Cov neeg no yog neeg zoo, cia lawv nrog peb nyob hauv lub tebchaws no thiab cia lawv mus-mus los-los ywjsiab. Lub tebchaws los kuj dav txaus rau lawv nyob thiab. Cia peb tej tub mus yuav lawv tej ntxhais thiab lawv tej tub tuaj yuav peb tej ntxhais. 22Lawv yeej zoosiab nrog peb nyob thiab nrog peb koom ua ib haivneeg, tiamsis muaj ib txojcai uas peb yuavtsum tau ua, qhov ntawd yog peb txhua tus txivneej yuavtsum tau ua kevcai txiav tawv li lawv. 23Tagnrho lawv tej tsiajtxhu thiab tej khoom yuav yog peb li huv tibsi thiab, puas yog maj? Yogli ntawd, cia peb ua li lawv hais thiab cia lawv nrog peb nyob.” 24Tagnrho cov pejxeem sawvdaws puavleej pomzoo yuav thiab ua rawsli Hamaus thiab Sekhees nkawd hais ntawd, ces txhua tus txivneej thiaj ua kevcai txiav tawv tagnrho.

25Peb hnub tomqab uas cov txivneej ua kevcai txiav tawv ntawd tag, tej nqaij tseem mob-mob, Yakhauj ob tug tub uas yog Xime-oos thiab Levis, uas yog Dinas ob tug nus, txawm nqa nkawd ob rab ntaj nyiagkev twjywm mus rau hauv nroog, thiab muab cov txivneej hauv tua tuag tag, 26nrog rau Hamaus thiab nws tus tub Sekhees huv tibsi. Ces nkawd txawm coj Dinas tawm hauv Sekhees tsev los lawm. 27Tomqab uas Xime-oos thiab Levis nkawd muab cov neeg ntawd tua tuag tag lawm, Yakhauj cov tub uas i tseem mus huab lub moos ua pauj qhov uas lawv tus muam tau poob ntsejmuag ntawd. 28Lawv cab tagnrho tej tsiajtxhu, nyuj, neesluav thiab muab txhua yam khoom uas nyob hauv nroog thiab hauv tej teb nqa huv tibsi mus lawm. 29Lawv nqa txhua yam uas muajnqis, ntes tagnrho tej pojniam thiab menyuam, thiab nqa txhua yam uas nyob hauv tej vajtse mus huv tibsi.

30Yakhauj hais rau Xime-oos thiab Levis tias, “Neb ua rau kuv ntsib teebmeem lawm; tamsim no cov neeg Kana-as thiab cov neeg Pelixes, thiab txhua tus uas nyob hauv lub tebchaws no ntxub kuv heev. Kuv tsis muaj neeg coob; yog lawv tagnrho sibsau tuaj tawmtsam thiab tua kuv, ces peb tsev neeg kawg raug kev puastsuaj xwb.”

31Tiamsis nkawd teb ua npautaws vog hais tias, “Es yuav cia Sekhees coj wb tus muam mus deev zooli ib tug niamntiav no lov?”

Currently Selected:

Chivkeeb 34: MWW2022

Highlight

Copy