Chivkeeb 33

Yakhauj Ntsib Exaus

1Thaum Yakhauj pom Exaus thiab 400 leej uas nrog Exaus uake tuaj, nws txawm muab nws cov menyuam faib rau Le-as, Laxees, thiab rau ob tug ntxhais qhev uas yog nws ob tug niamyau. 2Nws tso ob tug niamyau thiab nkawd cov menyuam mus uantej, tso Le-as thiab nws cov menyuam tuaj nruabnrab, ces mam tso Laxees thiab Yauxej tuaj tomqab kawg. 3Yakhauj mus ua lawv ntej thiab nws txhoscaug ntua hauv av pe xya pes mus rau ntawm nws tus tijlaug. 4Tiamsis Exaus khiav ceevnrooj mus cuag Yakhauj, puag nkaus thiab nwj nws. Nkawd ob kwvtij sibqawg quaj. 5Thaum Exaus tsa muag pom cov pojniam thiab cov menyuam, nws txawm nug hais tias, “Cov neeg uas nrog koj los no yog leejtwg?”

Yakhauj teb tias, “Tijlaug, cov menyuam no yog Vajtswv tus uas muaj kev hlub loj kawg nkaus, pub rau kuv.” 6Ces ob tug ntxhais qhev uas yog ob tug niamyau nrog rau nkawd cov menyuam txawm txav zog los thiab txhoscaug ntua pe; 7Le-as thiab nws cov menyuam mam los, thiab thaum kawg Yauxej thiab Laxees mamli txav los thiab txhoscaug ntua pe.

8Exaus rov nug tias, “Ua li es pab uas kuv xub tuaj ntsib ne, ho yog dabtsi?”

Yakhauj teb tias, “Pab ntawd yog kuv muab pub rau koj, kom koj txaussiab rau kuv.”

9Tiamsis Exaus hais tias, “Kuv tus kwv 'e, kuv twb muaj txaus lawm, ciali ceev tej ntawd rau koj xwb.”

10Yakhauj hais tias, “Tijlaug, yog koj txaussiab rau kuv thov koj txais yuav kuv qhov khoomplig no. Kuv tau rov los pom koj lub ntsej lub muag mas zoo kuv siab npaum nkaus li kuv pom Vajtswv lub ntsej lub muag ntag, vim koj txaussiab hlo tostxais kuv. 11Thov koj txais yuav qhov khoomplig uas kuv muab rau koj no; Vajtswv hlub kuv thiab Nws pub txhua yam uas kuv cheemtsum rau kuv.” Yakhauj tsis tseev li, ces thaum kawg Exaus kuj lees yuav lawm thiab.

12Exaus hais tias, “Peb ciali npaj thiab sawvkev mus. Kuv mam ua tus coj nej kev mus.”

13Yakhauj teb tias, “Tijlaug, koj yeej paub tias cov menyuam tseem yau thiab tsis tau muajzog txaus, kuv tej yaj thiab tej tsiajtxhu los tseem muaj menyuam mos. Yog peb yuav mus ceevnrooj, ntshe mus ib hnub xwb kuv tej tsiaj yuav tuag tag huvsi. 14Thov koj ua kuv ntej mus, es cia kuv yuav maj-mam lawv koj qab los; kuv tej tsiajtxhu thiab kuv cov menyuam mus tau ceev licas peb yuav mus li ntawd, txog thaum kuv los cuag tau koj hauv tebchaws Edoos.”

15Exaus hais tias, “Yogli ntawd, kuv mamli tseg kuv cov neeg ob-peb leeg nrog koj.”

Tiamsis Yakhauj teb tias, “Tijlaug, tsis tas yuav ua li ntawd, tsuav yog koj txaussiab rau kuv xwb ces tau lawm.”#33:15: tsuav yog koj txaussiab rau kuv xwb ces tau lawm; lossis yog tias koj tsis xav licas. 16Yogli ntawd, hnub ntawd Exaus thiaj sawvkev uantej rov los rau tebchaws Edoos lawm. 17Tiamsis Yakhauj mus rau Xukhaus, ces nws txawm mus ua ib lub tsev rau nws nyob thiab ua tej nkuaj rau nws cov tsiaj tau nyob. Twb yog vimli no thiaj muab thaj chaw ntawd tis npe hu ua Xukhaus.#33:17: Xukhaus: Lub npe no lus Henplais txhais hais tias “tej nkuaj.”

18Yakhauj rovqab tim tebchaws Padas Alas#33:18: Padas Alas; lossis Mexuputamias. los txog rau hauv lub nroog Sekhees uas nyob hauv tebchaws Kana-as tsis ntsib kev nyuajsiab dabtsi, thiab nws txawm mus tsa nws li tsevntaub nyob ze rau ntawm ntug nroog. 19Nws muab tau 100 lub txiajnyiag yuav tau ib thaj av ntawm Sekhees txiv Hamaus cov xeebntxwv. #Yaus 24:32; Yauh 4:5 20Yakhauj thiaj teeb tau ib lub thaj rau ntawd thiab tis npe hu ua Ees Eelauhe Yixalayees.#33:20: Ees Eelauhe Yixalayees: Lub npe no lus Henplais txhais hais tias “Vajtswv uas yog cov Yixalayees tus Vajtswv.”

Currently Selected:

Chivkeeb 33: MWW2022

Highlight

Copy