Kalatias 6

Sibpab Ris Nra

1Cov kwvtij, yog nej ntes tau ib tug uas ua kev txhaum, nej cov uas paub Vajtswv zoo lawm, yuav tau ua lub siabmos siabmuag ntuas tus ntawd kom nws rovqab los ua zoo. Tiamsis nej yuavtsum ceevfaj, nyobtsam nej yuamkev ua txhaum thiab. 2Nej yuavtsum sibpab ris nra, yog nej ua li ntawd nej thiaj yuav coj#6:2: nej thiaj yuav coj tej phau ntawv qub uas xuas tes sau, muaj thiaj yog nej coj. tau rawsli Yexus Khetos txoj kevcai. 3Yog nej leejtwg xav tias nws yog ib tug tseemceeb heev tiamsis qhov tseeb tiag nws twb tsis tseemceeb dabtsi li, ces yog nws rov dag nws tuskheej xwb. 4Txhua tus nyias yuavtsum ua tibzoo saib nyias tes haujlwm. Yog leejtwg tes haujlwm zoo lawm, mas nws thiaj khav tau ntawm nws tuskheej txog yam uas nws ua tau ntawd, tsis tas nws yuav coj nws tes haujlwm mus piv rau lwmtus tes. 5Rauqhov nej txhua tus nyias yuavtsum ris nyias lub nra.

6Nej cov uas tau hnov tej lus qhuabqhia lawm, nej yuavtsum zoosiab hlo muab txhua yam zoo uas nej muaj faib rau tus uas qhia nej.

7Nej tsis txhob xav yuamkev tias nej yuav dag tau Vajtswv. Txhua tus nyias yuav tau sau raws nraim li tej uas nyias tseb. 8Tus uas tseb rawsli nws sab nqaijtawv, nws yuav tau sau kev ploj kev tuag; tiamsis tus uas tseb rawsli sab Ntsujplig, nws yuav tau sau txojsia ntev dhawv mus ibtxhis. 9Yogli ntawd, cia peb tsis txhob nkees rau txoj kev ua zoo; yog peb pheej ua tsis tsotseg, muaj ib hnub peb yeej yuav tau sau xwb. 10Yogli, thaum uas muaj zoo sijhawm, cia peb ua zoo rau txhua tus, tshwjxeeb yog ua zoo rau cov uas nyob rau hauv tsev neeg ntseeg Vajtswv.

Lus Ntuas Thiab Lus Xa Xov Thaum Kawg

11Nej sim ua tibzoo saib tej npe ntawv uas kuv txhais tes sau xa tuaj rau nej seb loj npaum licas diam! 12Cov neeg uas pheej yuav yuam kom nej ua kevcai txiav ntawd, twb yog lawv xav khav txog lawv cev nqaij daim tawv sabnraum no xwb. Lawv ua li ntawd, tsuas yog ua kom lawv tsis txhob raug tsimtxom vim Khetos tus ntoo khaublig nkaus xwb. 13Txawm yog cov uas twb ua kevcai txiav lawm los lawv yeej tsis ua rawsli txoj Kevcai li thiab; cov neeg ntawd xav kom nej ua kevcai txiav, kom lawv thiajli muaj lus khav txog nej cev nqaij daim tawv xwb.

14Ntawm kuv, ces kuv tsuas khav txog peb tus Tswv Yexus Khetos tus ntoo khaublig xwb. Twb yog vim tus ntoo khaublig, lub ntiajteb no thiajli tuag rau kuv, thiab kuv los thiajli tuag rau lub ntiajteb no lawm thiab. 15Qhov uas neeg ua kevcai txiav lossis tsis ua, qhov ntawd yeej tsis tseemceeb dabtsi; qhov tseemceeb yog qhov uas neeg tso lawv tej kev txhaum tseg. 16Thov kom cov uas coj thiab ua rawsli tej lus uas kuv qhia no tau txais kev nyabxeeb thiab kev tabncuab, xam cov Yixalayees huv tibsi!

17Thaum kawg no, thov kom tsis txhob muaj leejtwg ua rau kuv nyuajsiab ntxiv lawm, rauqhov tej cawspliav uas nyob ntawm kuv lub cev twb qhia rau sawvdaws pom lawm hais tias kuv yog Yexus Khetos tus tubqhe.

18Cov kwvtij, thov kom peb tus Tswv Yexus Khetos txoj hmoovhlub nrog nej txhua tus nyob. Amees.

Currently Selected:

Kalatias 6: MWW2022

Highlight

Copy