Kalatias 5

Ceev Nej Txoj Kev Ywjpheej

1Qhov uas Khetos tso peb dim ntawd twb yog Nws xav kom peb muaj kev ywjpheej ntag. Yogli ntawd, nej yuavtsum sawv khovkho tsis txhob cia leejtwg coj nej rovqab mus ua qhev dua.

2Nej ua tibzoo mloog kuv tej lus! Kuv yog Paulus, kuv qhia rau nej hais tias yog nej tseem kam ua kevcai txiav thiab, ces txhais tau hais tias tej uas Khetos tau ua rau nej tas los lawm yeej tsis muaj qabhau dabtsi hlo li. 3Kuv rovqab qhia dua rau nej hais tias tus uas ua kevcai txiav lawm, nws yuavtsum coj rawsli txoj Kevcai txhua nqe huv tibsi. 4Nej cov uas xav tias nej yuav ua rawsli txoj Kevcai ntawd kom nej yog neeg ncajncees, ces twb yog nej raug txiav tawm ntawm Yexus Khetos mus lawm; nej twb poob ntawm Vajtswv txoj hmoovhlub mus lawm.

5Tiamsis peb txoj kev ciasiab yog qhov uas Vajtswv yuav coj peb los nrog Nws sib raugzoo; qhov ntawd yog qhov uas peb niajhnub ua siabntev tos, los ntawm Vaj Ntsujplig lub hwjchim uas ua haujlwm nyob rau hauv peb txoj kev ntseeg. 6Rauqhov thaum peb nrog Yexus Khetos koom uake lawm, txawm yuav ua kevcai txiav thiab tsis ua los tsis tseemceeb dabtsi. Qhov uas tseemceeb ces yog txoj kev ntseeg uas ua haujlwm tshwm los ntawm txoj kev hlub xwb.

7Nej twb khiav tau zoo heev lawm! Leejtwg ho los ntxias nej tsis pub nej ntseeg Vajtswv Txojlus tseeb? 8Tej uas lawv ntxias nej ntawd yeej tsis yog los ntawm Vajtswv tus uas hu nej los cuag Nws. 9Sawvdaws yeej ibtxwm hais tias, “Ib qhov nyuag keeb xwb, los yeej ua rau ib thoob ncuav su tagnrho.” #1Klt 5:6 10Tiamsis kuv yeej ruajsiab rau ntawm Vajtswv hais tias nej yuav tsis lam ciali mus ntseeg lwm zaj. Tus uas tuaj ua rau nej ntxhov ntawd, txawm nws yog leejtwg los xij, Vajtswv yeej yuav rautxim rau nws.

11Cov kwvtij, yog tias kuv tseem pheej niajhnub qhuabqhia kom sawvdaws yuavtsum ua kevcai txiav, vim licas kuv ho raug tsimtxom? Yog muaj li ntawd tiag, ces zaj uas kuv qhuabqhia hais txog Khetos tus ntoo khaublig kuj yuav tsis ua teebmeem rau sawvdaws. 12Kuv xav kom cov neeg uas tuaj tsim kev kubntxhov rau nej ntawd, lawv kavtsij ua kom kawg thiab ciali rov muab lawv sam kiag xwb!

13Cov kwvtij, qhov uas Vajtswv hu nej los, yog Nws xav kom nej muaj kev ywjpheej. Tiamsis nej tsis txhob muab txoj kev ywjpheej ntawd ua txoj haukev rau nej mus ua kev phem kev qias rawsli nej lub siab nyiam. Cia txoj kev hlub ua rau nej ib tug txaussiab hlo pab ib tug. 14Rauqhov txhua nqe Kevcai puavleej muab sau zog los ua ib nqe uas hais tias, “koj yuavtsum hlub koj tus kwvtij zejzog ib yam li koj hlub koj tuskheej.” #Levi 19:18 15Tiamsis yog nej ua li tej tsiaj nyaum, es nej ib tug tom ib tug thiab ib tug noj ib tug li nqaij, ces ceevfaj, nyobtsam nej txhua tus yuav puastsuaj mus tag huvsi.

Vaj Ntsujplig Thiab Neeg Nqaijtawv

16Kuv hais li no rau nej: nej yuavtsum cia Vaj Ntsujplig ua tus coj nej lub neej, nej thiajli yuav tsis ua rawsli neeg nqaijtawv lub siab ntshaw. 17Rauqhov neeg nqaijtawv lub siab yeej tsis nyiam tej uas Vaj Ntsujplig nyiam, thiab Vaj Ntsujplig yeej tsis nyiam tej uas neeg nqaijtawv lub siab nyiam. Neeg nqaijtawv lub siab thiab Vaj Ntsujplig yeej ua yeebncuab, yogli ntawd, nej thiaj ua tsis tau rawsli nej lub siab nyiam. #Loos 7:15-23 18Yog Vaj Ntsujplig ua tus coj nej lawm, ces nej tsis nyob hauvqab txoj Kevcai lawm.

19Sawvdaws yeej paub txog tej uas neeg nqaijtawv lub siab nyiam ua. Tej ntawd yog tshwm nyob rau hauv kev nkauj kev nraug, kev phem kev qias thiab kev ua li dev li npua; 20pe dab pe mlom, ua khawvkoob; ua yeebncuab, sibcav sibceg, sibkhib, npautaws, xav ua tus hlob, muaj pab muaj pawg thiab sibfaib, 21ntshaw luag tug, qaugcawv, qw ua nqaj ua nqug, thiab ua ntau yam uas zooli tej no. Yav tas los kuv twb ntuas nej lawm, tiamsis nimno kuv rov ntuas nej dua ib zaug ntxiv hais tias: cov neeg uas ua tej ntawd, yuav tsis tau Vajtswv lub Tebchaws los ua lawv tug.

22Tiamsis lub txiv ntawm Vaj Ntsujplig yog kev hlub, kev zoosiab, kev kajsiab, kev ua siabntev, kev muaj siabdawb siabzoo, kev ua zoo, kev ncajncees, 23kev ua siabmos siabmuag, thiab kev paub tswj tuskheej. Yeej tsis muaj ib txoj kevcai yuav txwv tej no kiag li. 24Cov uas nyob rau hauv Yexus Khetos, lawv twb muab tagnrho tej uas sab nqaijtawv nyiam thiab ntshaw ntsia rau saum tus ntoo khaublig lawm. 25Vim Vaj Ntsujplig tau ua rau peb ciajsia, peb yuavtsum cia Nws ua tus coj tagnrho peb lub neej. 26Peb yuavtsum tsis txhob muabhlob, tsis txhob khav tias yus zoo dua luag, lossis ib tug tsis txhob khib ib tug.

Currently Selected:

Kalatias 5: MWW2022

Highlight

Copy