Khiav Dim 33
33
Tus TSWV Ntiab Cov Yixalayees Tawm Ntawm Roob Xinais
1Tus TSWV hais rau Mauxes tias, “Koj thiab cov neeg uas koj coj hauv tebchaws Iziv los, nej ciali tawm ntawm qhov chaw no, thiab mus rau lub tebchaws uas Kuv tau coglus tseg hais tias Kuv yuav muab rau Anplahas, Ixaj, thiab Yakhauj thiab lawv cajces nyob. #Chiv 12:7; Chiv 26:3; Chiv 28:13 2Kuv yuav tso ib tug timtswv los coj nej kev, Kuv yuav ntiab cov neeg Kana-as, cov Amaules, cov Hitis, cov Pelixes, cov Hivis, thiab cov Yenpus kom khiav tawm mus. 3Nej yuav mus nyob hauv lub tebchaws uas muaj kua mis thiab zib ntab ntws nto. Tiamsis Kuv yuav tsis nrog nej mus, rauqhov nej yog cov neeg tawv ncauj heev, nyobtsam Kuv muab nej ua puastsuaj tag tom ib tog kev.”
4Thaum cov pejxeem hnov zaj xov tsis zoo no, lawv txawm pib quaj thiab tsis coj saw nyiaj saw kub li lawm. 5Vim tus TSWV tau xaaj rau Mauxes kom hais rau lawv tias, “Nej yog cov neeg tawv ncauj. Yog Kuv nrog nej mus, txawm yog nyuamqhuav mus ibpliag xwb los xij, nyobtsam Kuv ciali ua rau nej puastsuaj tag. Zaumno ciali hle nej tej nyiaj tej kub cia, kom Kuv thiaj paub tias yuav ua licas rau nej.” 6Yogli ntawd, tomqab uas lawv tawm ntawm Roob Xinais mus lawm, cov Yixalayees thiaj tsis coj nyiaj tsis coj kub li lawm.
Lub Tsevntaub Sibntsib
7Txhua qhov uas cov Yixalayees tsuam chaw so, Mauxes yeej coj lub Tsevntaub dawbhuv mus tsa rau sabnraud uas deb ntawm lub yeej. Lub tsev ntawd hu ua lub Tsevntaub Sibntsib; yog leejtwg xav mus ntsib tus TSWV nws yuavtsum mus rau ntawm lub Tsevntaub uas nyob rau sabnraud uas deb lub ntug yeej. 8Yog thaum twg Mauxes tawm mus rau tom lub Tsevntaub ntawd, mas cov pejxeem puavleej tawm tuaj sawv ntawm lawv tej qhovrooj tsevntaub thiab saib Mauxes mus kom nkag plaws rau hauv lub Tsevntaub.
9Thaum Mauxes mus rau hauv lub Tsevntaub lawm, tus ncej huab txawm dauv kiag los nres rau ntawm lub qhovrooj Tsevntaub, thiab tus TSWV haislus hauv tus ncej huab ntawd tuaj rau Mauxes. 10Thaum twg cov pejxeem pom tus ncej huab nres ntawm lub qhovrooj Tsevntaub, lawv nyias yeej sawv ntawm nyias lub qhovrooj tsevntaub pehawm kiag tus TSWV. 11Tus TSWV nrog Mauxes tham timntsej timmuag, ib yam li ob tug phoojywg sibtham. Ces Mauxes mam rovqab los rau tom lub yeej. Tiamsis Mauxes tus tubtxib hluas uas yog Noos tus tub Yausuas, nws yeej tsis tawm hauv lub Tsevntaub mus li.
Tus TSWV Coglus Yuav Nrog Nws Haivneeg
12Mauxes hais rau tus TSWV tias, “Koj yeej txeev hais kom kuv coj cov neeg no mus nyob hauv lub tebchaws ntawd, tiamsis Koj tsis tau qhia rau kuv paub tias tus uas Koj yuav tso nrog kuv mus ntawd yog leejtwg. Koj tsuas qhia hais tias Koj paub kuv zoo thiab txaussiab rau kuv xwb. 13Yog Koj yeej txaussiab rau kuv tiag, thov qhia tej kev uas Koj npajsiab yuav ua ntawd rau kuv, kom kuv thiaj yuav ua tau tej uas haum Koj siab. Thov Koj suav hais tias haivneeg no yog Koj tug lawm.”
14Tus TSWV teb tias, “Kuv yuav nrog koj mus thiab pub kom koj muajyeej.”
15Mauxes teb tus TSWV hais tias, “Yog Koj tsis nrog peb mus, thov tsis txhob coj peb tawm qhov chaw no mus. 16Yog Koj tsis nrog peb mus, leejtwg yuav paub tias Koj txaussiab rau kuv thiab rau Koj haivneeg? Qhov uas muaj Koj nrog peb mus ntawd yuav qhia tau rau luag lwm haivneeg uas nyob hauv lub ntiajteb no hais tias peb yog Koj haivneeg.”
17Tus TSWV hais rau Mauxes tias, “Kuv yuav ua rawsli qhov uas koj thov ntawd, rauqhov Kuv paub koj zoo thiab Kuv yeej txaussiab rau koj.”
18Ces Mauxes txawm thov hais tias, “Thov Koj ua Koj tus tshwjchim uas ci ntsa-iab rau kuv pom.”
19Tus TSWV teb tias, “Kuv yuav cia tagnrho Kuv tej kev zoo los hla kiag ntawm koj lub xubntiag mus, thiab Kuv yuav qhia Kuv lub npe uas yog tus TSWV tabmeeg koj; Kuv pomzoo tabncuab tus twg, Kuv yuav tabncuab tus ntawd, thiab Kuv pomzoo hlub tus twg, Kuv yuav hlub tus ntawd. #Loos 9:15 20Koj yuav pom tsis tau Kuv lub ntsejmuag, rauqhov yeej tsis muaj leejtwg uas pom Kuv tag es tseem muaj sia nyob, 21tiamsis muaj ib qho chaw nyob ntawm Kuv ib sab no, uas koj muaj peevxwm mus sawv rau saum lub pobzeb. 22Thaum Kuv tus tshwjchim uas ci ntsa-iab hla los, Kuv yuav muab koj tso rau hauv ib kis pobzeb, thiab muab Kuv txhais tes thaiv koj mus txog thaum Kuv hla dhau koj mus lawm. 23Ces Kuv yuav tshem Kuv txhais tes tawm, koj tsuas pom Kuv lub nrobqaum xwb tiamsis yuav tsis pom Kuv lub ntsejmuag.”
Currently Selected:
Khiav Dim 33: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
This chapter is not available in this version. Please choose a different chapter or version.