Khiav Dim 29

Kevcai Tsa Aloos Thiab Nws Cov Tub Ua Povthawj Hlob

(Levis Kevcai 8:1-36)

1“Nov yog tej uas koj yuavtsum ua rau Aloos thiab nws cov tub, uas yog muab lawv tsa ua povthawj hlob ua Kuv li haujlwm. Muab ib tug ntsuag nyuj thiab ob tug laug yaj uas tsis muaj ib qho phem li. 2Muab cov hmoov nplej zoo-zoo uas tsis xyaw keeb zuaj ua ib co ncuav, muab ib co hmoov ntse roj txivntoo ua dua ib co ncuav, muab ib co puab ua tej lub nyias-nyias thiab muab roj txivntoo pleev rau. 3Koj muab cov ncuav ntawd ntim rau hauv tawb coj tuaj fij rau Kuv thaum uas koj muab tus ntsuag nyuj thiab ob tug laug yaj tuaj fij.

4“Koj coj Aloos thiab nws cov tub mus rau tom lub qhovrooj uas yuav mus rau hauv lub Tsevntaub Sibntsib, thiab muab dej los ua kevcai ntxuav lawv. 5Koj muab cev tsoostsho povthawj hlob rau Aloos hnav, uas yog lub tsho ntev, lub tsho uas hnav tuaj hauvqab lub efauj, lub efauj, daim awv thiab txoj hlab rau nws sia. 6Kho txoj phuam rau Aloos ntoo saum taubhau, thiab muab daim phiaj kub dawbhuv uas txaug cov lus ‘Dawbhuv rau tus TSWV,’ khi rau saum txoj phuam. 7Ces koj muab cov roj uas txhawb meejthawj hliv rau Aloos taubhau thiab muab nws tsa ua povthawj hlob.

8“Koj coj Aloos cov tub tuaj thiab muab tsho rau lawv hnav; 9muab hlab rau lawv sia thiab muab kausmom rau lawv ntoo. Qhov ntawd yog kev tsa Aloos thiab nws cov tub ua povthawj hlob. Lawv thiab lawv cajces yuav ua povthawj hlob ua Kuv tes haujlwm mus ibtxhis li.

10“Ciali cab tus txiv nyuj mus rau tom hauvntej ntawm lub qhovrooj Tsevntaub Sibntsib, hais rau Aloos thiab nws cov tub kom lawv tsa tes rau saum tus txiv nyuj taubhau. 11Muab tus txiv nyuj ntawd tua tabmeeg tus TSWV rau ntawm lub qhovrooj Tsevntaub Sibntsib. 12Muab koj tus ntivtes tub tus txiv nyuj ntawd cov ntshav mus pleev cov kub nyob rau ntawm plaub cegkaum ntawm lub thaj. Ces dua li cov ntshav uas seem muab hliv ywg lub taw thaj kom tag. 13Dhau ntawd, koj muab cov pavywj, nplooj siab uas zoo tshajplaws, thiab ob lub raum nrog cov npluag roj uas qhwv ob lub raum ntawd, coj mus hlawv rau saum lub thaj fij rau Kuv. 14Tiamsis muab tus nyuj cov nqaij, daim tawv, thiab cov plab hnyuv coj mus hlawv rau sabnraum ntug yeej. Qhov no yog muab fij ua kev tshem cov povthawj hlob lub txim.

15“Muab ib tug yaj los thiab hais rau Aloos thiab nws cov tub, kom lawv tsa tes rau saum tus yaj ntawd taubhau. 16Muab tus yaj ntawd tua, muab cov ntshav coj mus ywg thoobplaws lub thaj ntawd plaub sab huv tibsi. 17Ces muab tus yaj ntawd txiav ua tej daim; ntxuav tej plab hnyuv thiab cov cesqab kom huv, coj mus tso tshooj rau saum lub taubhau thiab saum cov nqaij. 18Muab tagnrho tus yaj ntawd coj mus hlawv rau saum lub thaj ua khoom noj rau tus TSWV, kom tej pa tswqab ntxiag rau tus TSWV. #Efex 5:2; Filipi 4:18

19“Koj muab dua ib tug yaj los thiab hais kom Aloos thiab nws cov tub tsa tes rau saum tus yaj ntawd taubhau. 20Muab tus yaj ntawd tua, thiab muab mentsis ntshav coj mus pleev rau Aloos thiab nws cov tub sab taubntseg xis, rau lawv tus taubtes sab xis, thiab rau lawv cov taubtaws sab xis. Muab cov ntshav uas seem coj mus ywg thoobplaws lub thaj ntawd plaub sab huv tibsi. 21Koj muab mentsis ntshav uas nyob saum lub thaj thiab mentsis roj txhawb meejthawj coj mus nchos rau Aloos thiab nws cov tub tej tsoostsho, kom nws thiab nws cov tub, nrog rau lawv tej tsoostsho thiaj dawbhuv txaus Kuv siab.

22“Muab tus yaj ntawd tej nqaij rog hlais tseg, tus kotw uas rog, tej pavywj, nplais siab uas zoo tshajplaws, ob lub raum nrog cov npluag roj uas qhwv ob lub raum, thiab cesqab sab xis. (Nov yog tus laug yaj uas siv los rau kev tsa povthawj hlob). 23Rho cov ncuav hauv lub tawb uas twb muab fij rau Kuv lawm los, muab ib yam ib lub li no: muab ib lub uas xyaw roj txivntoo, muab ib lub uas tsis xyaw roj, thiab muab ib lub uas nyias-nyias. 24Koj muab tagnrho cov khoom fij no rau Aloos thiab nws cov tub, kom lawv muab yom fij tshwjxeeb rau Kuv. 25Ces koj rov txais cov zaub-mov ntawm lawv tes los, thiab muab coj mus hlawv rau saum lub thaj, tso tshooj ntxiv rau saum cov uas twb muab hlawv fij ua khoom noj rau Kuv. Tej pa ntawd yuav tswqab ntxiag txaus Kuv siab heev.

26“Koj muab tus yaj lub hauvnrob coj los yom fij tshwjxeeb rau Kuv. Thooj nqaij hauvnrob no yog koj tug.

27“Thaum ua kevcai tsa tus povthawj hlob, yuavtsum muab lub hauvnrob thiab cesqab ntawm tus yaj uas muab tua yom fij rau Kuv ntawd tshwj rau ibcag, es tseg rau Aloos thiab nws cov tub uas yog cov povthawj hlob. 28Thaum Kuv haivneeg fij lawv tej khoom ua kev sib raugzoo, yuavtsum muab lub hauvnrob thiab cesqab ntawm tus tsiaj rau cov povthawj hlob; txojcai no Kuv yuav tsis hloov li. Qhov no yog cov pejxeem qhov khoomplig uas muab rau Kuv, uas yog tus TSWV.

29“Tomqab Aloos tuag lawm, yuavtsum muab nws cov tsoostsho povthawj hlob rau nws cov tub, rauqhov lawv yuav hnav thaum uas tsa lawv ua povthawj hlob. 30Aloos tus tub uas yuav los ua povthawj hlob hloov nws chaw, uas yog mus ua Kuv tes haujlwm hauv Chav Dawbhuv hauv lub Tsevntaub Sibntsib, yuavtsum hnav cev ristsho ntawd xya hnub.

31“Coj tus yaj uas tua ua kevcai tsa Aloos thiab nws cov tub ntawd, mus hau rau hauv chav dawbhuv. 32Lawv yuav noj cov nqaij yaj thiab cov ncuav uas tseg rau hauv lub tawb nyob ntawm Kuv lub Tsevntaub Sibntsib lub qhovrooj. 33Lawv yuavtsum noj tej zaub-mov uas siv los ua kevcai ntxuav zamtxim thaum tsa lawv ntawd. Tsuas yog cov povthawj hlob thiaj noj tau cov zaub-mov ntawd xwb, rauqhov tej ntawd yog zaub-mov dawbhuv. 34Tsis txhob noj tej nqaij lossis tej mov uas seem txog tagkis sawvntxov, ciali muab hlawv povtseg; rauqhov tej ntawd yog tej khoom uas dawbhuv lawm.

35“Koj ua kevcai tsa rau Aloos thiab nws cov tub kom txwm nkaus xya hnub, rawsli Kuv tau xaaj rau koj lawm. 36Txhua hnub twg koj yuavtsum muab ib tug txiv nyuj los tua theej txhoj, ua kev zam lawv lub txim. Qhov no yog kev ua kevcai ntxuav lub thaj, thiab muab roj txivntoo hliv rau lub thaj ua kom lub thaj dawbhuv. 37Ua li no txhua hnub kom txwm xya hnub. Ces lub thaj yuav dawbhuv, thiab txhua tus neeg lossis txhua yam uas mus chwv lub thaj ntawd yuav ciali dhau mus ua yam dawbhuv, vim chwv raug yam uas dawbhuv lawm.

Kev Fij Khoom Txhua Hnub

(Teev Npe 28:1-8)

38“Txhua hnub twg, yuavtsum muab ob tug menyuam yaj uas muaj ib xyoo mus tua hlawv rau saum lub thaj. 39Muab ib tug tua rau yav sawvntxov thiab muab ib tug tua rau yav tsausntuj. 40Luj 1 kilus hmoov nplej zuaj xyaw ib lamhwj tseem roj txivntoo, thiab ib lamhwj cawv txivhmab fij nrog thawjtug menyuam yaj. 41Tus menyuam yaj thib ob uas hlawv theej txhoj thaum yav tsausntuj, muab hmoov nplej, roj txivntoo, thiab cawv txivhmab sibnpaug zos li tus uas fij thaum sawvntxov thiab. Cov no yog tej uas fij ua khoom noj rau Kuv, uas yog tus TSWV. Tej pa ntawd yuav tswqab ntxiag txaus Kuv siab.

42“Ib tiam rau ib tiam, nej yuavtsum ua kevcai hlawv khoom fij li no tabmeeg Kuv rau ntawm lub Tsevntaub Sibntsib lub qhovrooj mus li. Qhov chaw ntawd yog qhov chaw uas Kuv yuav ntsib Kuv haivneeg thiab nrog koj tham. 43Kuv yuav ntsib cov Yixalayees ntawm qhov chaw ntawd, thiab Kuv tus tshwjchim uas ci ntsa-iab yuav ua rau qhov chaw ntawd dawbhuv. 44Kuv yuav ua kom lub Tsevntaub Sibntsib thiab lub thaj dawbhuv, thiab Kuv yuav tsa Aloos thiab nws cov tub ua cov povthawj hlob ua Kuv tes haujlwm. 45Kuv yuav nrog cov Yixalayees nyob, thiab Kuv yuav ua lawv tus Vajtswv. 46Lawv yuav paub tias Kuv yog tus TSWV, yog lawv tus Vajtswv uas coj lawv tawm hauv tebchaws Iziv los, Kuv thiaj nrog lawv nyob. Kuv yog tus TSWV uas yog lawv tus Vajtswv.

Currently Selected:

Khiav Dim 29: MWW2022

Highlight

Copy