Khiav Dim 28

Tej Tsoostsho Rau Cov Povthawj Hlob

(Khiav Dim 38:1-7)

1“Ciali hu koj tus tijlaug Aloos thiab nws cov tub: Nadas, Anpihus, Ele-axas thiab Ithamas tuaj. Muab lawv cais tawm ntawm cov neeg Yixalayees, kom lawv thiaj ua tau haujlwm rau Kuv li cov povthawj hlob. 2Xaws cov khaubncaws povthawj hlob uas zoo-zoo rau koj tus tijlaug Aloos hnav, kom tsav nws lub meejmom. 3Hu tagnrho cov neeg txujtes zoo uas Kuv tau pub lawv muaj peevxwm ua txhua yam tuaj, thiab qhia kom lawv xaws ib co khaubncaws rau Aloos, es muab nws tsa ua povthawj hlob ua Kuv haujlwm.

4“Qhia kom lawv ua ib lub awv, lub tsho efauj, lub tsho ntev, lub tsho txaij, txoj phuam uas ntoo, thiab txoj hlab sia. Lawv yuavtsum ua cov tsho povthawj hlob no rau koj tus tijlaug Aloos thiab nws cov tub hnav, kom lawv thiaj ua tau haujlwm rau Kuv li cov povthawj hlob. 5Cov neeg uas txujtes zoo ntawd yuavtsum muab xov xiav, xov tsamxem, xov liab, xov kub, thiab cov ntaub mag uas zoo heev xaws ua cov tsoostsho ntawd.

6“Lawv muab xov xiav, xov tsamxem, xov liab, xov kub, thiab muab cov ntaub mag uas zoo heev xaws ua lub tsho efauj thiab xaws pajntaub txaij nraug zees rau. 7Yuavtsum muaj ob pluaj ntaub khuam xubpwg, uas zawm tau, uas txuas tau rau ob lub kaum tom nrobqaum thiab tom xubntiag. 8Txoj hlab sia yog muab cov ntaub uas xaws lub tsho efauj los ua, thiab muab xaws lo uake rau ntawm lub tsho efauj.

9“Muab ob lub qe zeb kanelis txaug Yakhauj kaum-ob tug tub cov npe rau; 10txaug kom rawsli lawv tej hnubnyoog ib tug zujzus, txaug rau lub npe rau ib lub qe zeb thiab txaug dua rau lub npe rau lwm lub qe zeb. 11Kom ib tug uas txawj ntaus nplhaib, txaug Yakhauj cov tub tej npe rau ntawm ob lub qe zeb, thiab muab ob lub qe zeb ntawd cog rau ntawm ob daim phiaj. 12Muab ob lub qe zeb ntawd tis rau ntawm lub tsho efauj ob txoj hlab saum xubpwg, ua lub cim nco txog kaum-ob xeem Yixalayees. Ua li ntawd Aloos thiaj tau coj rawv lawv tej npe rau saum nws ob sab xubpwg, kom Kuv, uas yog tus TSWV, thiaj ncontsoov Kuv haivneeg. 13Muab tej tseem kub nchuav ua ob lub haum txaij nraug zees, 14thiab ua ob txoj saw uas tseem-tseem kub ntswj zooli txojhlua, thiab muab tis rau ntawm ob daim phiaj ntawd.

Daim Awv

(Khiav Dim 39:8-21)

15“Ciali ua daim awv rau tus Tuam Povthawj Hlob tau siv kom nws paub nrhiav Vajtswv tus dejsiab. Muab cov ntaub uas xaws lub tsho efauj ua daim awv thiab xaws pajntaub txaij nraug zees rau thiab. 16Daim ntaub ntawd yuavtsum yog daim xwmfab xwmmeem thiab muab tais ua ob tsem, ntev 22 xatimev thiab dav 22 xatimev. 17Cog plaub leej qe zeb uas muajnqis rau; thawj leej cog ib lub liab daj lis, ib lub daj ntshiabsi, thiab ib lub liab tshiab-tshiab; 18leej thib ob, cog ib lub ntsuab ci hob, ib lub xiav, thiab ib lub dawb ci hob; 19leej thib peb, cog ib lub liab ntshiabsi, ib lub txho taws, thiab ib lub liab ua tsamxem ntsha; 20thiab leej thib plaub, cog ib lub txho xiav, ib lub dawb txho, thiab ib lub dawb ci ntshiabsi. Cov qe zeb no puavleej muab cog rau ntawm ob daim phiaj kub.

21“Kaum-ob lub qe zeb ntawd puavleej txaug Yakhauj kaum-ob tug tub npe rau; uas yog sawvcev kaum-ob xeem Yixalayees. 22Muab cov tseem-tseem kub los ntaus ua ib co saw ntswj zooli txojhlua, tis rau ntawm daim awv. 23Ua ob lub khawb kub tis rau daim awv ob lub ntsej sab saud, 24thiab muab ob txoj saw kub tis rau ntawm ob lub khawb kub. 25Muab ob tog qab tis rau ob daim phiaj, ua li no kom ob txoj saw lo lub tsho efauj ob daim tiag xubpwg uas dauv rau ntawm xubntiag. 26Ua dua ob lub khawb kub tis rau ntawm daim awv ob lub kaum hauvqab ntawm tus ntug sabhauv uas npuab lub tsho efauj. 27Ua dua ob lub khawb kub tis ntxiv rau lub tsho khuam ob txoj hlab khuam xubpwg ob tog tw kawg tom xubntiag uas ze kab xaws thiab txuas nkaus txoj hlab sia lub tsho efauj. 28Muab ob txoj hlab ntaub xiav khi daim awv ob lub khawb rau ntawm lub tsho efauj ob lub khawb, kom txuas nkaus rau ntawm txoj hlab liab, kom daim awv nyob ncaj rau ntawm lub tsho efauj thiaj yuav tsis hle.

29“Thaum Aloos mus rau hauv Chav Dawbhuv, nws yuavtsum hnav rawv daim awv uas txaug cov Yixalayees kaum-ob xeem npe rau lawm, kom Kuv, uas yog tus TSWV, thiaj ncontsoov Kuv haivneeg. 30Muab lub Ulees thiab lub Thumees#28:30: lub Ulees thiab lub Thumees: Ob lub no, yog tus povthawj hlob siv kom paub Vajtswv lub siab nyiam, tiamsis tsis paub xyov cov povthawj siv licas. ntsaws rau hauv daim awv, kom thaum Aloos tuaj cuag Kuv timntsej timmuag, nws thiaj nqa rawv ob yam ntawd. Txhua zaus nws yuavtsum npua daim awv tuaj, kom nws thiaj yuav paub txog Kuv tus dejsiab rau cov Yixalayees. #Teev 27:21; 2Kev 33:8; Exala 2:63; Nehemi 7:65

Cov Povthawj Hlob Lwmyam Tsho Ntev

(Khiav Dim 39:22-31)

31“Muab cov ntaub xiav xaws ua lub tsho ntev hnav tuaj hauvqab lub tsho efauj. 32Lub tsho ntawd, xaws looj saum taubhau tuaj, thiab foob lub cajdab tsho kom thoobplaws thiaj tsis ntuag. 33-34Muab xov xiav, xov tsamxem, thiab xov liab khi ua tej lub txiv ntsiav pobkws, dai ib lub txiv ntsiav pobkws quas ib lub tswb kub, thoobplaws lub tw tsho ntev. 35Aloos yuavtsum hnav lub tsho ntev ntawd thaum nws mus ua tes haujlwm li tus povthawj hlob, kom thaum nws mus rau hauv Chav Dawbhuv timntsej timmuag tus TSWV thiab thaum nws tawm rovqab los, thiaj yuav hnov tej tswb ntawd nrov, es nws thiaj tsis raug tua tuag.

36“Thiab koj muab cov tseem-tseem kub ntaus ua ib daim phiaj, thiab txaug ib co lus rau ntawm daim phiaj ntawd hais tias, ‘Dawbhuv rau tus TSWV.’ 37Muab ib txoj hlab ntaub xiav khi daim phiaj ntawd rau saum txoj phuam uas ntoo saum taubhau. 38Aloos yuavtsum coj daim phiaj ntawd rau saum nws hauvpliaj, kom txawm yog cov pejxeem fij tej yam khoom yuamkev mentsis los Kuv, uas yog tus TSWV, thiaj yuav txais cov Yixalayees tej khoom uas lawv coj tuaj fij rau Kuv ntawd.

39“Muab cov xov maj uas zoo-zoo los ntos ua ib lub tsho rau Aloos hnav thiab ntos ua ib txoj phuam rau Aloos ntoo, thiab xaws ua pajntaub rau txoj hlab kom txaij nraug zees.

40“Ua ib co tsho, ib co hlab, thiab ib co kausmom uas zoo-zoo rau Aloos cov tub, kom tsav lawv lub meejmom. 41Muab cov tsho no rau koj tus tijlaug Aloos thiab nws cov tub hnav. Muab roj txivntoo pleev lawv thiab tsa lawv ua cov povthawj hlob ua Kuv li haujlwm. 42Koj muab ntaub mag xaws ib co ris luv-luv rau lawv hnav tuaj hauvqab kom txij ntua ntawm duav rau nram ncejpuab, thiaj tsis pom lawv chaw txajmuag. 43Aloos thiab nws cov tub yuavtsum ncontsoov hnav cov ris no thaum lawv mus rau hauv lub Tsevntaub Sibntsib lossis thaum lawv mus sawv ntawm lub thaj ua tes haujlwm povthawj hlob hauv Chav Dawbhuv, kom lawv thiaj tsis raug tua vim pom lawv tej chaw txajmuag. Qhov no yog txoj kevcai uas Aloos thiab nws cajces yuav tau coj mus ibtxhis li.

Currently Selected:

Khiav Dim 28: MWW2022

Highlight

Copy