2 Kevcai 4

Mauxes Ntuas Cov Yixalayees Kom Mlooglus

1Ces Mauxes hais rau cov Yixalayees tias, “Nej yuavtsum coj rawsli txhua nqe kevcai uas kuv qhia rau nej no, nej thiaj muaj sia nyob ntev hauv lub tebchaws uas tus TSWV, uas yog nej cov yawgkoob tus Vajtswv, muab pub rau nej. 2Tsis txhob ntxiv ib lolus lossis rho ib lolus tawm ntawm tej lus xaaj uas kuv hais rau nej. Yuavtsum ua rawsli tus TSWV, uas yog nej tus Vajtswv tej lus xaaj uas kuv tau hais rau nej lawm. #Tshwm 22:18-19 3Nej puavleej pom tej uas tus TSWV tau ua saum Roob Pe-aus lawm. Nws tau tua txhua tus uas pe tus mlom Npa-as saum lub roob ntawd huv tibsi, #Teev 25:1-9 4tiamsis nej cov uas ncajncees rau tus TSWV, uas yog nej tus Vajtswv, puavleej tseem ciajsia los txog niajhnub no.

5“Kuv twb qhia tagnrho tej kevcai uas kuv tus Vajtswv tau xaaj kom kuv qhia rau nej lawm. Thaum nej mus nyob hauv lub tebchaws uas nej tabtom yuav mus txeeb ntawd, nej yuavtsum ua rawsli tej kevcai ntawd. 6Yuavtsum ua tibzoo mloog thiab ncajncees rau tej kevcai ntawd, kom thiaj yuav qhia tau rau luag lwm haivneeg pom tias nej ntse npaum licas. Thaum luag hnov txog tej kevcai no, luag thiaj yuav hais tias, ‘Haivneeg no muaj tswvyim thiab muaj kev totaub heev!’

7“Tsis muaj ib haivneeg twg, txawm lawv yuav loj npaum licas los xij, uas muaj ib tug tswv nyob ze lawv thiab pab lawv yam li tus TSWV uas yog peb tus Vajtswv, nyob ze peb thiab pab peb. Thaum twg uas peb tsa ncauj thov Nws, mas Nws yeej pab peb. 8Tsis muaj ib haivneeg twg, txawm lawv yuav loj npaum licas los xij, uas muaj tej kevcai ncajncees yam li tej uas hnubno kuv qhia rau nej. 9Nej yuavtsum ceevfaj zoo thiab ncontsoov tej uas nej qhovmuag pom no mus tas nej simneej! Yuavtsum muab piav qhia rau nej tej tubki thiab tej xeebntxwv mloog 10txog tej xwm uas hnub nej mus sawv tabmeeg tus TSWV, uas yog nej tus Vajtswv, saum lub Roob Xinais.#4:10: Xinais; lossis Haules. Hnub ntawd Nws hais rau kuv tias, ‘Koj ciali hu cov pejxeem tuaj uake. Kuv xav kom lawv hnov Kuv tej lus qhia, kom lawv thiaj yuav paub hwm thiab mloog Kuv lus mus tag lawv tiam neej, thiab thiaj yuav paub qhia lawv tej tubki kom hwm Kuv ib yam nkaus thiab.’”

11“Nej yuavtsum piav qhia rau nej tej menyuam mloog txog tej xwm uas nej tau mus sawv ntawm taw roob, es muaj huab los laum nkaus lub roob ntawd tsaus nti li pataws thiab muaj nplaimtaws cig nto ntuj plaws. #Khiav 19:16-18; Henpl 12:18-19 12Qhia rau lawv txog qhov uas tus TSWV tau haislus hauv cov nplaimtaws tuaj rau nej. Nej hnov Nws haislus ntag, tiamsis nej yeej tsis pom dabtsi hlo li. 13Nws qhia tej uas nej yuavtsum tau ua kom nej thiaj yuav coj tau rawsli tej lus uas Nws tau cogtseg rau nej, uas yog Kaum Nqe Kevcai uas Nws tau sau rau ntawm ob daim txiag zeb. #Khiav 31:18; 34:28; 2Kev 9:10 14Tus TSWV kom kuv qhia tagnrho Nws tej kevcai uas nej yuavtsum coj thiab ua, thaum nej mus nyob hauv lub tebchaws uas nej tabtom mus txeeb ntawd. #Khiav 21:1

Tsis Txhob Pe Mlom

15“Thaum tus TSWV haislus hauv cov nplaimtaws uas nyob saum Roob Xinais tuaj rau nej, nej tsis pom Nws tuskheej li. Yogli ntawd, nej yuavtsum ceevfaj 16tsis txhob ua kev txhaum los ntawm qhov uas nej ciali puab ib tug mlom, txawm yuav puab tus zoo licas los xij, tsis hais zooli pojniam lossis zooli txivneej, #Khiav 20:4; Levi 26:1; 2Kev 5:8; 27:5 17zooli tsiaj lossis zooli noog, #Loos 1:23 18zooli nab lossis zooli ntses.

19“Tsis txhob cia nej raug ntxeev ntxias mus teev lossis pe tej uas nej pom nyob saum nruabntug, tsis hais lub hnub, lub hli, thiab tej hnubqub. Tus TSWV uas yog nej tus Vajtswv, tau muab tagnrho tej ntawd rau lwm haivneeg pehawm lawm. 20Tiamsis nej yog cov neeg uas Nws tau cawm tawm hauv tebchaws Iziv, uas yog lub cubtawg, los ua Nws haivneeg, yam li niajhnub no. #Khiav 19:5; 2Kev 7:6; 14:2; 26:8; Titus 2:14; 1Pet 2:9 21Tim nej es tus TSWV uas yog nej tus Vajtswv, thiaj npautaws rau kuv. Nws thiaj hais meej-meej tias kuv yuav tsis tau hla tus Dej Yauladees mus nyob tim lub tebchaws av zoo uas Nws tabtom muab pub rau nej. #Khiav 20:12 22Kuv yuav tuag rau hauv lub tebchaws no thiab yuav tsis tau hla tus Dej Yauladees mus rau sab tid, tiamsis nej yuav tau hla mus nyob hauv lub tebchaws uas av zoo ntawd. 23Nej yuavtsum ncontsoov tus TSWV, uas yog nej tus Vajtswv tej lus uas Nws tau cogtseg rau nej lawm. Mloog Nws tej lus es tsis txhob mus puab ib yam mlom dabtsi hlo li, 24rauqhov tus TSWV, uas yog nej tus Vajtswv, zoo yam li tej nplaimtaws uas cig laim lias, Nws khib nej heev, Nws yuav tiv tsis taus qhov uas nej mus pehawm tej mlom ntawd. #Henpl 12:29

25“Txawm yog nej mus nyob hauv lub tebchaws ntawd tau ntev, thiab muaj tub muaj ki, muaj xeebntxwv lawm los nej tsis txhob ua kev txhaum los ntawm qhov uas nej ciali mus puab ib tug mlom, txawm yuav puab tus zoo licas los xij. Qhov ntawd yog kev txhaum tabmeeg tus TSWV, thiab yuav ua rau Nws npautaws heev. 26Hnubno kuv thov lub ntuj thiab lub teb nrog kuv ua timkhawv hais tias, yog nej tsis mloog kuv lus, tsis ntev nej yuav ploj tag rau hauv lub tebchaws ntawd. Nej yuav tsis tau nyob ntev hauv lub tebchaws uas nej tabtom yuav hla tus dej Yauladees mus nyob ntawd. Nej yuav puastsuaj tag huv tibsi mus. 27Tus TSWV yuav ua rau nej tawg uasab uasua mus nrog lwm haivneeg nyob, uas tsuas yog tshuav nej tsawg-tsawg leej thiaj muaj sia ua neej nyob xwb. #2Kev 28:36 28Nej yuav mus teev tej nyuag vajtswv uas luag xuas tes puab, xuas ntoo txua lossis xuas pobzeb ua. Tej nyuag vajtswv ntawd yeej tsis pomkev, tsis hnov lus, tsis txawj noj, thiab tsis hnov ntxhiab dabtsi li. 29Thaum nej mus nyob li ntawd, yog nej nrhiav tus TSWV, uas yog nej tus Vajtswv, kawg nej lub siab lub ntsws, nej yeej yuav ntsib Nws xwb. #Yelemi 29:13 30Thaum nej raug kev txomnyem ntxhovsiab thiab muaj tej xwm no los raug nej, thaum ntawd nej yuav tig rov los cuag tus TSWV thiab mloog Nws lus. 31Nws yog tus Vajtswv uas muaj kev tabncuab; Nws yuav tsis tso nej tseg lossis ua rau nej puastsuaj, thiab Nws yuav ncontsoov tej lus uas Nws tau cogtseg rau nej cov yawgkoob lawm.

32“Nej sim mus tshawb thoobplaws lub ntiajteb no seb, txij thaum uas tsis tau yug nej mus txog thaum Vajtswv tsim muaj neeg nyob rau lub ntiajteb no los, puas tau muaj dua tej xwm uas loj npaum li tej nej pom no? Puas tau muaj leejtwg hnov dua tej xwm uas zooli no? 33Puas tau muaj dua leejtwg hnov Vajtswv#4:33: Vajtswv; lossis ib tug nyuag vajtswv haislus hauv cov nplaimtaws tuaj, es tseem ciajsia nyob ib yam li nej? 34Puas tau muaj ib tug nyuag vajtswv twg es muaj cuabkav mus coj tau ib haivneeg tawm hauv lwm haivneeg lub tebchaws los ua nws haivneeg li tus TSWV, uas yog nej tus Vajtswv, tau coj nej tawm hauv tebchaws Iziv los? Twb yog Nws lub hwjchim thiab Nws tus zog, Nws thiaj tso subtawg subntsha, kev tsov kev rog, ua tej txujci tseemceeb uas loj kawg nkaus, thiab ua tej uas txaus ntshai heev tabmeeg rau nej qhovmuag pom.

35“Tus TSWV ua tej no qhia rau nej paub tias Nws tibleeg xwb thiaj yog Vajtswv, tsis muaj dua lwmtus Vajtswv lawm. #Malak 12:32 36Nws cia nej hnov Nws lub suab hais saum ntuj tuaj kom Nws thiaj qhuabqhia tau nej; thiab Nws cia nej pom Nws tej nplaimtaws uas cig loj heev nyob rau ntiajteb no, thiab Nws haislus hauv tej nplaimtaws ntawd tuaj. 37Vim Nws hlub nej cov yawgkoob, Nws thiaj xaiv nej, thiab Nws lub hwjchim uas loj kawg nkaus coj nej tawm hauv tebchaws Iziv los. 38Thaum nej txav zujzus mus rau tom hauvntej, Nws tau ntiab tej haivneeg uas loj thiab muajzog dua nej, kom Nws thiaj coj tau nej mus nyob rau hauv thiab muab lawv tej tebchaws rau nej; tej tebchaws ntawd nimno yeej tseem yog nej tug. 39Yogli ntawd, nej yuavtsum ncontsoov hnubno rau nruabsiab hais tias, tus TSWV yog tus Vajtswv uas nyob saum ntuj thiab hauv ntiajteb. Tsis muaj lwmtus Vajtswv li lawm. 40Nej yuavtsum ua rawsli Nws tej kevcai txhua nqe uas hnubno kuv muab qhia rau nej. Nej thiab nej tej tubki thiaj yuav muaj kev nyabxeeb. Nej yuav muaj sia nyob ntev rau hauv lub tebchaws uas tus TSWV, uas yog nej tus Vajtswv yuav muab rau nej ua nej tug mus ibtxhis.”

Cov Nroog Cawmsiav Sab Hnubtuaj Ntawm Tus Dej Yauladees

41Ces Mauxes txawm xaiv tau peb lub nroog uas nyob sab hnubtuaj ntawm tus Dej Yauladees #Yaus 20:8-9 42tseg cia rau tus uas ciali yuamkev tua lwmtus neeg uas tsis yog nws tus yeebncuab, tau khiav mus cawmsiav. Nws muaj cai khiav mus nyob hauv cov nroog ntawd ib lub, kom luag tsis txhob muab nws tua. 43Xeem Lunpees tau lub nroog Npexaws uas nyob ntawm tiaj suabpuam; xeem Nkaj tau lub nroog Lamaus uas nyob hauv cheebtsam Nkile-as; thiab xeem Manaxes tau lub nroog Nkaulas uas nyob hauv cheebtsam Npasas.

Qhia Txog Vajtswv Txoj Kevcai

44Ntawm no yog Vajtswv tej kevcai uas Mauxes muab qhia rau cov Yixalayees. 45-46Mauxes muab tej kevcai no qhia rau lawv tomqab uas lawv khiav hauv tebchaws Iziv los nyob rau hauv lub hav ntawm tus Dej Yauladees sab hnubtuaj uas ntsiantsoov lub moos Npepe-aus. Lub hav ntawd nyob hauv cheebtsam uas cov Amaules tus Vajntxwv Xihoos uas kav lub moos Hesenpoos lub tebchaws. Thaum Mauxes thiab cov Yixalayees khiav hauv tebchaws Iziv los, lawv tau tua yeej Vajntxwv Xihoos lawm. 47Lawv txeeb tau tagnrho Vajntxwv Xihoos lub tebchaws thiab Vajntxwv Aus uas yog cheebtsam Npasas lub tebchaws; Aus yog cov Amaules tus vajntxwv uas nyob ntawm tus Dej Yauladees sab hnubtuaj. 48Lub tebchaws no tus ciam txij ntua ntawm lub moos Alu-aws uas nyob ntawm ntug Dej Anoos mus rau sab qaumteb ti nkaus lub nroog Xili-oos,#4:48: Ib phau ntawv qub-qub thaum ub sau hais tias Xili-oos; phau lus Henplais hais tias Xi-oos. uas yog lub Roob Hawmoos. 49Thiab tagnrho tej cheebtsam uas nyob ntawm tus Dej Yauladees sab hnubtuaj, mus ti nkaus rau nram Hiavtxwv Tuag uas nyob sab qabteb thiab mus txog ntua ntawm taw Roob Pixenkas uas nyob sab hnubtuaj.

Currently Selected:

2 Kevcai 4: MWW2022

Highlight

Copy