1 Petus 1

1Los ntawm Petus, uas yog Yexus Khetos ib tug timthawj.

Xa mus rau cov neeg uas Vajtswv tau xaiv cia, uas tau khiav uasab uasua mus rau txhua qhov chaw hauv lub xeev Pootus, Kalatias, Kapadaukias, Exias thiab Npithinias lawm. 2Nej yog cov uas tau raug xaiv rawsli Vajtswv uas yog Leejtxiv lub homphiaj, thiab raug ntxuav kom dawbhuv los ntawm Nws tus Ntsujplig, kom nej mloog Yexus Khetos lus thiab raug ntxuav los ntawm Nws cov ntshav.

Thov kom nej puvnpo Vajtswv txoj hmoovhlub thiab kev nyabxeeb.

Txoj Kev Ciasiab Uas Ciajsia

3Cia peb ua Vajtswv tus uas yog peb tus Tswv Yexus Khetos Leejtxiv tsaug! Vim Nws tabncuab peb kawg nkaus, Nws thiaj pub peb yug dua tshiab nyob rau hauv txoj kev ciasiab uas ciajsia los ntawm qhov uas Yexus Khetos tau sawv hauv qhovtuag rovqab los, 4kom peb tau txais tej qubtxeeg qubteg uas tsis txawj lwj, tsis txawj phem thiab tsis txawj qub kiag li; tej ntawd Vajtswv twb muab khaws cia rau saum ntuj ceebtsheej tos nej lawm. 5Vajtswv tus uas muaj hwjchim yuav tsomkwm nej mus txog thaum uas nej tau txais txoj kev dim txim no, vim nej ntseeg Nws. Thaum txog hnub kawg Vajtswv yuav muab tej ntawd nthuav rau sawvdaws pom.

6Txawm yog nej yeej yuav raug ntau yam kev txomnyem nyuajsiab ib nyuag ntu los nej ciali zoosiab rau tej ntawd. 7Tej uas nej raug ntawd yog kev sim seb nej txoj kev ntseeg puas tseeb tiag. Txawm yog kub los neeg yuavtsum muab hluavtaws sim seb puas yog tseem kub. Yogli ntawd, nej txoj kev ntseeg uas tseem muajnqis dua kub yuav tau raug muab sim kom thiaj yuav ruaj-khov tiag. Yog nej thev taus, thaum txog hnub uas Yexus Khetos los nej yuav tau txais kev qhuas, tau txais tshwjchim, thiab nej yuav tau ntsejmuag. 8Txawm yog nej yeej tsis tau pom Nws li los nej yeej hlub Nws, thiab txawm yog tamsim no nej tsis pom Nws los nej yeej ntseeg Nws. Yogli ntawd, nej thiaj zoosiab kawg nkaus tsis pom qab yuav piav li, 9rauqhov nej tabtom txais txoj kev dim txim uas yog lub homphiaj ntawm nej txoj kev ntseeg.

10Twb yog txoj kev dim txim no ntag, cov xibhwb cev Vajtswv lus thiaj ua tibzoo tshawbfawb thiab nrhiav, lawv yog cov uas qhia uantej hais txog Vajtswv txoj kev hlub uas Nws yuav muab pub rau nej. 11Lawv niajhnub ua tibzoo saib seb lub sijhawm yog thaum twg thiab yuav tshwmsim licas.#1:11: lub sijhawm yog thaum twg thiab yuav tshwmsim licas; lossis seb yog tus neeg twg, thiab nws yuav los thaum twg. No yog Khetos tus Ntsujplig uas nyob hauv lawv lub siab qhia rau lawv txog lub sijhawm uas Khetos yuav raug kev tsimtxom thiab tomqab ntawd Nws yuav tau koobmeej. 12Vajtswv tau qhia rau cov xibhwb cev Vajtswv lus paub tias tej haujlwm uas lawv ua ntawd tsis yog lawv ua rau lawv, tiamsis yog lawv ua rau nej; tej uas nimno cov qhia Txoj Moo Zoo tau muab qhia rau nej, yog los ntawm Vaj Ntsujplig tus Dawbhuv uas los saum ntuj los. Txawm yog cov timtswv ceebtsheej los lawv tseem tosntsoov xav pom tej no thiab.

Nquahu Kom Ua Lub Neej Dawbhuv

13Yogli ntawd, nej yuavtsum npaj nej lub siab kom txhij. Yuavtsum ceevfaj thiab ciasiab ntsoov rau Vajtswv txoj hmoovhlub uas Nws yuav muab rau nej thaum Yexus Khetos rovqab los. 14Yuavtsum mloog Vajtswv lus, thiab tsis txhob ua rawsli nej lub siab ntshaw uas yog zooli yav tas los thaum nej tseem tsis tau paub Vajtswv. 15Vajtswv tus uas tau hu nej, Nws yog tus uas dawbhuv, yogli ntawd, nej yuavtsum dawbhuv nyob rau hauv txhua yam uas nej ua. 16Vajtswv Txojlus hais tias, “Nej yuavtsum dawbhuv, rauqhov Kuv yog tus dawbhuv.” #Levi 11:44-45; 19:2

17Thaum nej thov Vajtswv, nej hu Nws hais tias Txiv, Nws yog tus uas txiavtxim rau txhua tus rawsli tes haujlwm uas lawv ua uas yeej tsis xaiv leejtwg ntsejmuag li; yogli ntawd, nej yuavtsum paub ntshai Vajtswv mus tas nej simneej uas nyob hauv ntiajteb no. 18Rauqhov nej yeej paub lawm hais tias Vajtswv twb txhiv nej dim ntawm lub neej uas tsis muaj qabhau uas yog nej cov yawgkoob muab cev rau nej. Yam uas Vajtswv muab txhiv nej, yam ntawd tsis poob nqi zooli tej nyiaj tej kub, 19yam ntawd yog Khetos cov ntshav uas muajnqis heev, zooli tus menyuam yaj uas tsis muaj ib qho phem lossis dub doog li. 20Vajtswv twb xub xaiv Nws uantej uas tsim lub ntiajteb no los lawm, thiab lub sijhawm kawg no Vajtswv thiaj txib Nws los pab nej.

21Twb yog vim Nws ntag, nej thiaj ntseeg Vajtswv tus uas tau tsa Nws sawv hauv qhovtuag rovqab los thiab pub tus tshwjchim rau Nws; kom nej txoj kev ntseeg thiab kev ciasiab thiaj yuav muaj nyob rau hauv Vajtswv.

22Nimno nej muaj lub siab dawbhuv vim yog nej ua rawsli txoj kev tseeb, nej thiaj muaj txoj kev hlub pub rau txhua tus uas ntseeg Vajtswv; nej ib leeg yuavtsum hlub ib leeg kom kawg siab kawg ntsws.#1:22: kom kawg siab kawg ntsws; tej phau ntawv qub uas xuas tes sau, muaj los ntawm lub siab uas dawbhuv. 23Rauqhov nej twb yug dua tshiab los ntawm Vajtswv Txojlus uas muaj txojsia nyob mus ibtxhis lawm, tus uas yug nej ntawd Nws tsis txawj tuag, Nws muaj txojsia nyob mus ibtxhis. 24Rawsli Vajtswv Txojlus hais tias:

“Neeg txhua tus puavleej zoo ib yam li tej nrojtsuag,

thiab lawv lub hwjchim zoo ib yam li tej paj nroj.

Thaum tej nrojtsuag tuag, ces tej paj nroj yuav zeeg tag, #Yaxaya 40:6-8

25tiamsis Vajtswv Txojlus yuav nyob mus ibtxhis li.”

Txojlus no yog Txoj Moo Zoo uas twb muaj neeg muab qhia rau nej lawm.

Currently Selected:

1 Petus 1: MWW2022

Highlight

Copy