Malashi 2
2
Ghena ke ka dzeghe Shala
1Ma tsetsenya ne, ma 'ya sha gheyɛ, gheyɛ ka dzeghe Shala: 2«Fa ɗa mə ŋa ɗa ba'a ntsə mə geva kave ɗa zləvə nya kehi va 'ya, 'ya 'Mahwətə nde berete. Ma keɗema ŋkɛ tsagha ne, 'ya kateghwene ndiremi kadzete gheyɛ, 'ya katezhɛre zeɗe nza nya meɗeyi ŋayɛ 'ya kandiremi. Kaganda ne, 'ya katemene tsagha, va nya pele se yɛ yitea yayata wəsə. 3Tsetsenyanyɛ ne, 'ya kave ɗa te ŋwalea ŋayɛ. Ma gheyɛ le ŋa ŋayɛ ne, 'ya katebete ŋayɛ dədə kwa kema, dədəa wəshi keseɗa nyi dzeghekɛ melɛ yɛ le hɛ hwa gəsəkəa ŋayɛ. Tagha gɛ, katefəmte ŋayɛ mbeli zlaɓe le dədəa shɛ. 4Tsagha gɛ, kateɗepe yɛ 'ya Shala Mahwətə nde gezete ŋayɛ ghena shɛ kezha ya jikə geva nya menete 'ya le ka Lɛvi. 5Ma laka jikə geva shɛ ne, nahe 'ya kendeke nda nza teghweme ba'a kwelɛŋe ke hɛ kezha hawe hɛ va 'ya. Tagha gɛ, nahe hɛ keyɛte ɗa ghena ba'a nahe hɛ kese kaghazlənə va 'ya. 6Nahe hɛ ketekete nda kaganda ke mbeli, kese hɛ kasla tseŋwə we. Nahe hɛ kenzahwe nza megela ba'a tiɗiɗi le 'ya, nahe hɛ kezhɛreke mbeli kwele kwele shave mbe wəsə kwa ndiremi. 7Kaganda ne, slene ta nde dzeghe Shala ŋkɛ kezha teke nda ɗepe Shala ke mbeli, gheŋkɛ ya'yɛwe ghena mbeli ve kezha ɗepe wəsə mahalegə. Kwa nza ŋkɛ ne, gheŋkɛ ya kande geze ghena ta Mahwətə nde berete. 8Ama gheyɛ ne, nahe yɛ kesame ŋayɛ kwa hweŋkwa. Laka wəshi nyi teke nda yɛ ke mbeli ne, nahe yɛ kezamte mbeli kwele kwele, nahe yɛ kepelemte jikə geva ta ɗa le gheyɛ, gheyɛ ka Lɛvi. 'Ya Mahwətə nde berete nde gezete. 9Ma 'ya le ŋa ɗa gɛ ne, 'ya katekele zləvə seyi te gheyɛ ba'a kateshifə ŋayɛ kwa kema ta pɛtɛa ka Israyɛl, va nya ɗema yɛ kese kahawe va 'ya ba'a va nya se yɛ kanta ghala kwelɛ mbeli vəa ŋkwa nya meha ghwə yɛ.»
Hawema ta ka Israyɛl va Shala
10Ashɛ yita nya kwetɛŋe ya te gheɓəmə wəka? Ashɛ Shala nya kwetɛŋe nde pate ɓəmə wəka? Va wa nza gheɓəmə kaka pamte ghəa ɓəmə laka hawema va jikə geva nya menete Shala le ka shihɛ ɓəmə wa? 11Nahe ka Zhəwda kepamte yɛ meɗe mɛa nci. Nahe hɛ kemenete wəshi nyi ndiremi ndiremi kashasha mbe Zhɛrəzalɛm ba'a te pɛtɛa hɛɗia Israyɛl. Kwa nza ŋkɛ nahe hɛ kekelemte zləvə te ŋkwa nya keveyi geva tekeleke nya ɗe Mahwətə, laka wəme mi nyi kehawe va kweci shala. 12Ma wəndə nya kemene kala nya ne, zamte sebe Mahwətə te pɛtɛa mbeli nyi ki ghɛa ŋkɛ, ɗema wəndə tene ki kezha fə nda wəshi ke Mahwətə nde berete te sləa ŋkɛ!
13Wa nya kwete nya wəsə nya mene yɛ nya: kazhɛre reghwetɛa Mahwətə yɛ bətə mbe nehwene. Kanehwene yɛ ba'a kaŋgaɗe ghə yɛ va nya zhɛnema ŋkɛ kave zəzə te wəshia ŋayɛ ba'a nya zhɛnema ŋkɛ kayɛ wəshi nyi fə nda yɛ. 14Ama ka'yɛwe yɛ va wa va wa zhɛnema ŋkɛ kaɗe hɛ. Yawa, va nya meɗeyi yɛ kwa kema ta Mahwətə kezha nza le male mempɛhweta ta ŋayɛ. Nahe nde kese kamale ta ŋayɛ, nahe yɛ kejikəte geva le malea shɛ, ama pa yɛ pamte ŋkɛ. 15Ashɛ Mahwətə kejikəte ŋayɛ kanza kwetɛŋe le malea shɛ laka geva ba'a mehele wəka? Wa yazele nza kwetɛŋea shɛ wa? Ashɛ kemave ŋwale nyi kese va Shala wəka? Ntsehwele mə yitea ghəa ŋayɛ gɛ! Pamtema male mempɛhweta ta ŋayɛ yɛ gɛ ma! 16Kwa nza ŋkɛ ne, wa nya ghena nya geze Mahwətə, Shala ta Israyɛl nya: «Ma keŋkamte male ta ŋkɛ wəndə va nya ɗema ŋkɛ ŋkɛ ne, nahe ŋkɛ kenza kande beze ghena laka mene berete.» Mahwətə nde berete le ghəa ŋkɛ nde gezete. Ntsehwele mə yitea ghəa ŋayɛ gɛ! Pamtema yɛ meɗe mɛa ŋayɛ yɛ gɛ ma!
Kateghwene nde geze ghena ta ŋkɛ Mahwətə
17Mahwətə yaleɓe yɛ le ghena nyi geze yɛ. Ama ma pe yɛ sha 'yɛwe: «Laka wa leɓe ŋkɛ ghen'yɛ wa?» Yawa, ma pe yɛ sha geze: «Ma mbeli nyi kemene wəsə kwa ndiremi ne, kamene nda ganyɛ Mahwətə ke hɛ, zeɗehwe nda mbelia shɛhɛ.» Ma pe yɛ sha geze ɓiyitsa: «Tema Shala nya kemeha ghwə tiɗiɗi gɛ wa?»
Currently Selected:
Malashi 2: BEK12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.