Malashi 3
BEK12

Malashi 3

3
1Ma Mahwətə nde berete sha zhɛne ŋayɛ: «'Ya kateghwene nde geze ghena ta ɗa kezha hi ɗa hweŋkwa. Kala metɛ ta ntsə ne, katedzembe ghɛa ŋkɛ Shala nya zele nya yɛ. Wa nya nde geze ghena ta jikə geva nya neghe nya yɛ kase.» 2Wa nde tenza kasəwəte vecia se ta ŋkɛ wa? Wa nde teghereŋe yitea ghweme vəa ŋkwa nya nca ŋkɛ wa? Katenza ŋkɛ kala ghwə ta gezla, kala sempere ta nde tsewe lekwesa. 3Katentishɛ ŋkɛ kezha rɛɗɛ mze kwa tɛawetɛa ba'a kezha zhɛre ŋkɛ wɛŋe. Katezhɛre hwelefefia Lɛvi ŋkɛ wɛŋe, kala nya zhɛre mze kwa tere tere ba'a mze kwa tɛawetɛa mbeli wɛŋe. Tagha gɛ, katenza hɛ kambeli nyi kefə nda wəshi ke Mahwətə kala nya kehi. 4Zeɗehwe nda tenza wəshi nyi fə nda ka Zhəwda ba'a ka Zhɛrəzalɛm ke Mahwətə kala nya vəashi, kala nya mbe va nyi heca heca. 5Kaganda ne, ma ke Mahwətə nde berete gezete: «Katese 'ya kadzehwa gheyɛ kezha meha ghwə te gheyɛ. Kateve nda fete 'ya kahe kahe ke ka mene ghwɛ, ke ka vale tahe, ke ka zeme fela tseŋwə, ke ka ŋki nda ma wəsə tiɗiɗi ke ka mene slene, ke ka sa nda yaka ke ka wedidi ba'a ka mezhɛtiti keɗema ka beze nda ghena ke ka se se, pɛtɛa ka hawema va 'ya.
Zhɛne geva kase sha Mahwətə
6Ma 'ya, 'ya Mahwətə, kazhɛre pa 'ya we. Ma gheyɛ ne, kefɛa yɛ kenza kaŋwalea Zhakob we. 7Kala ka shihɛ ŋayɛ ne, nahe yɛ kehendemte geva vare wəshi nyi gezete 'ya, kese yɛ kamene slene le hɛ we. Zhɛne mə geva kase sha 'ya, tagha gɛ, katezhɛne geva 'ya kase sha gheyɛ, 'ya Mahwətə nde berete nde gezete. Ama ma pe yɛ sha geze: ‹Tsema nza ghen'yɛ kazhɛneke geva kase sha gha wa?› 8Ma 'ya sha zhɛne ŋayɛ: ‹Wərə wəndə ŋelɛ kaghwetete Shala na? Ama gheyɛ ne, 'ya yaghwete yɛ!› Ma pe yɛ sha geze: ‹Laka wa ghwetete ŋa n'yɛ wa?› Ma 'ya sha gheyɛ: ‹Laka kwa meŋe ta bela ta wəshi ba'a laka wəshi nyi fə ɗa yɛ.› 9Nahe yɛ kenza kebezla bezla va nya nza yɛ kaghwete ɗa, gheyɛ pɛtɛa ka Israyɛl. 10Fə mə kwa meŋe ta bela ta wəshi tserame kase kadzembe cɛ kebete wəshi, kezha nza wəsə kezeme kevə kevə mbe ghɛa ɗa. Dzeghakɛ ɗa mə te ghena nya, 'ya Mahwətə nde berete nde geze. Kaganda ne, katenewe yɛ tsema tsema teghwene ŋayɛ ŋkwa nya pelɛ ghweme 'ya ba'a tsema tsema tewəpi ŋayɛ 'ya kwele kwele. 11Katefɛa yɛ geteɗə 'ya kebeze wəshi nyi wəzate yɛ, kateɗema yɛ rɛzɛŋea ŋayɛ ya we, 'ya Mahwətə nde berete nde gezete. 12Pɛtɛa hwelefefi kategeze nza ta ŋayɛ mbe zeɗe nza, kwa nza ŋkɛ megela tenza nza te hɛɗia ŋayɛ, 'ya Mahwətə nde berete nde gezete.»
Veci nya tencɛ tiɗiɗia ŋkɛ Shala kwa
13Ma ke Mahwətə gezete: «Kageze ghena nyi dzawe dzawe yɛ te 'ya, ama ma pe yɛ sha 'yɛwe: Wa ghena nyi gezehwe ghen'yɛ te gha wa? 14Yawa, ma pe yɛ gezete: ‹Wəsə shɛ keketekɛ ŋkwa mene nda slene ke Shala le we. Nahe gheɓəmə keyate ghena nyi gezete ŋkɛ ba'a nahe gheɓəmə kese kaŋgaɗe ghə kwa kema ta Mahwətə nde berete, ama gəmə. 15Ma tsetsenya ne, ka ŋkele ntsə yanakɛ gheɓəmə kambeli nyi mbe zeɗe nza, ka 'yaghwa mehele ya kambeli nyi kejive mbe kema. Ya ghenci nza kadzeghe Shala ne, wəsə shɛ kazhɛ nda ke hɛ we.›»
16Tagha gɛ, pa mbeli nyi kehawe va Mahwətə gezete ghena kwelɛ ghəa nci. Pa Mahwətə veyite sleme yitea ghena ta nci, pa fate nda ŋa nci ke hɛ. Ma kwa kema ta ŋkɛ ne, pa mbeli rafete sləa mbeli nyi kehawe va Mahwətə ba'a nyi keve zləvə te sləa ŋkɛ. 17Ma kwa sebe ta ŋkɛ ne, ma ke Mahwətə nde berete gezete: «Ma te veci nya tesate 'ya te ŋkwa ne, katezhɛre mbelia shɛhɛ 'ya kaŋa ɗa, katenza hɛ kambelia ɗa. Katezhɛ heli 'ya yitea hɛ kala yita nya kezhɛ heli yitea wəzege ta ŋkɛ nya kemene nda slene. 18Tagha gɛ, katezhɛne yɛ kanewe ghala nya kwelɛ yɛ wəndə nya tiɗiɗi le nde 'yaghwa mehele, nya kwelɛ yɛ nde mene nda slene ke Shala le nde mene nda ma slene. 19Ma 'ya gezete, 'ya Mahwətə nde berete: Katese vecia ɗa, nahe ŋkɛ kenza kala ŋkwa nya tse ghwə nya wəba kwa. Ma te vecia shɛ ne, katenza ka kele ghə ba'a ka 'yaghwa mehele kala vegheme. Katetere hɛ hɛmɗɛke ɗɛke, katesərə nda yɛ slərə keɗema yɛ dzeve 'ya ke hɛ we. 20Ama kaŋa ŋayɛ, gheyɛ nyi kehawe va 'ya ne, katesame vecia nza tiɗiɗia ɗa kwa ghɛ. Katekele mbe ŋkwa vecia shɛ kase mbe yɛ seɗa ta ŋkɛ. Kateshave yɛ te ŋwela ba'a katejɛgwəli yɛ kala levea lɛməa sla nyi behe behe. 21Ma te veci nya tesate 'ya te ŋkwa, 'ya Mahwətə nde berete ne, kateŋkeɗe ka 'yaghwa mehele yɛ. Katenza hɛ kala keləwə mbe yɛ hwə seɗa ta ŋayɛ.
Zhɛne geva ta Ɛli kase
22Zəzəte mə wəsə mahalegəa Moyize, nde mene slene ta ɗa. Ma pelɛ ghweme ta Horɛb ne, nahe 'ya kendeke nda wəshi mahalegə ba'a wəshi nyi kehi kaŋa pɛtɛa ka Israyɛl.
23Ma nda tese vecia Mahwətə, veci nya wəba ba'a nya dzawe ne, kateghwene ŋayɛ nde mɛ ŋkwa Ɛli 'ya. 24Katezhɛre mehele ta ka yitehɛ ŋkɛ laka ŋwalea nci, tsagha ŋa ŋwale laka ka yitehɛ nci. Tagha gɛ, katese 'ya kaza sebe te hɛɗia ŋayɛ we.»

La Bible en langue Kapsiki avec les livres deutérocanoniques © Alliance Biblique du Cameroun 2012. 


Learn More About Ghena ta Shala