Debtere ba'ad waa ba'ad voo nɔ 26

Pól duu kpad ya̧g tíŋ́ gbanaa Agrípa woolı̵́

1Sey woolı̵́ Agrípa o̧d Pól: “Mɔ́ dɨ kan ya̧g moo hí̧í̧lí̧ á̧ḿ.”

Ma Pól luu dɔg nag yúba, kpad ya̧g, o̧: 2“Ba' naa Agrípa, zó̧ó̧ míí dȩ', moo káń nuŋ hi̧naa ya̧g kpanné tíŋ́ víílí zá̧ga̧ ɓəə, yúú hȩn nán Yúúda ku̵u̵ baa doon wu̵lı̵́ 'waapád yɛ nɔ. 3Ví gaa hȩn dikab nán Yúúda voo 'waapád, kan moo fanné voo á̧ḿ. Moo woo nɔ, mí hí̧í̧ bi vi ví i ma' zó̧ó̧ kin moo míí yɛ ú̵. 4Nán Yúúda 'waapád vu̵ gaa mbaalı̵́ míí sey náásaalı̵́, diga dəné sa̧a̧m nán míí voolı̵́, kan Yerúsalemmé á̧ḿ. 5Vu̵ gaan ɗii sú̵'ú̵. Ʉu̵ hí̧í̧ ú̧ tée, aga vú̵ń o̧ ya, ká ba mín míí nán farísaɨ á̧ḿ; ı̵́ vóó nán farísa, vóo duu debtere mba. 6A̧máa 'ya̧'a̧ yɛ, vu̵ duun mí kan moo, moo káń 'yɛ́ zó̧ó̧ yúú ya̧g talı̵́ Tayɨɨ woo, ka tad a vɔ́ yée vu̵ yȩlȩ́. 7Zig vóó wa̧nɓó' zu̵u̵ idú vu̵ pi zó̧ó̧ kɔ́ ba'ad vid kan zá̧ga̧ á̧ḿ, moo ya̧g talı̵́ Tayɨɨ woo yȩ a dɔ́ sé' woolı̵́ pȩ́ń. Ma yúú zó̧ó̧ 'yɛ́lı̵́ yȩlȩ́, nán Yúúda vu̵ duu doon wu̵lı̵́, ba' naa. 8Ɨ́ víí nán Yúúda vu̵, moo ȩn ví fȩȩn víí moo Tayɨɨ ban nim nánán vu̵ nɔmmé ú̵ nélá? 9Mí á̧ḿ, ká mí taa bin kɔ́ hȩn hí̧í̧lí̧ Tayɨɨ woo nɔ, séý mí kɔ́ sɨɨ za̧a̧ná, moo bi há' yɛ́g Yesu nán Naazaréd woo yȩ la kəd. 10Hȩn káń kɔ́ Yerúsalemmé máa, wu̵ yɛ nɔ. Ma mí nuŋ néélȩ́ ya̧g ba'ad gbanaa hȩn ha"ı̵́ voolı̵́, mí má'a nán Tayɨɨ woo vu̵ ɓu̵u̵lı̵́ na'a dɔd lig púúsinalȩ́. Sey ku̵u̵ sə̧' moo bi nɔɔ vu̵ ú̵ máa, ká to̧o̧n á̧ḿ. 11Mí baa si̧'i̧d vu̵ lig sú̵ggı̵́ nán Yúúda voolı̵́ ya 'waapád. Mí yú vu̵, u̵u̵ sa̧a̧ hȩn moo zó̧ó̧ 'yɛ́lı̵́ voo yȩ ó̧. Zó̧ó̧ yȩ́ȩ́ ka kɔ́n máa, míi bi duun vu̵ la kan moo hág tóó vu̵lı̵́ á̧ḿ.”

Pól duu pá'ad vu̵ moo zó̧ó̧ tiiní woo

(Debtere ba'ad waa ba'ad voo nɔ 9:1-19; 22:6-16)

12Pól duu o̧: “Gbanaa hȩn ha"ı̵́ vu̵ pú̵n ɗerwəl kan néélȩ́ tóó, mí daa laa kaa Damásdı̵́. 13Káń dɨ laalı̵́ hi̧naalȩ́, zá̧ga̧ ka ya̧ sa̧a̧mé máa, ba' naa, mí ho̧ túlí tóó zu̵u̵ be"ı̵́, tú mba zá̧ga̧ á̧ḿ, tú daa gbɔ kan vɔ́, kan dan 'yȩ́m vu̵. 14Ya vóó 'waapád, vɔ́ wá̧á̧ zu̵u̵ hágá, ma mí ki yɛ́g tóó o̧n moo kan ya̧g eebərə́ə: ‘Sól, Sól, moo ȩn mɔ́ duun mí kan moolá? A̧m hı̵́'ɨ vı̵́d dȩŋ sa̧'a̧d sá.’

15“Mí vigi: ‘Ɨ́ 'yɛ́lı̵́ míí, ví nɔ́nná?’ Ma ı̵́ 'yɛ́lı̵́ o̧n: ‘Mí Yesu wu̵, mɔ́ duun míw kan moo yȩ nɔ. 16A̧máa a̧m lúú dii dɔg yúba. Mí tú'um fó̧ó̧ míí, moo bi 'yɛ́m nán ba'ad míí nu. Mɔ́ń baa du̵n ya̧g, mɔ́ń o̧d nán tóó vu̵ ba bin ho̧n sı̵́ ɓəə ú̵, tée mɔ́ń duu o̧d vu̵ hȩn kɔ́ ı̵́ a̧n duu tú'um máa wɔgɔ. 17Zig móó kan nán ı̵́ ku̵u̵ Yúúda pɛ́lı̵́ máa, u̵u̵ bi kɔ́m hȩn tóó nɔ tée, míń ɓɛ luum. Míń ba'am la nán ı̵́ ku̵u̵ Yúúda pɛ́lı̵́ máa voolı̵́, 18moo a̧m la kuu vu̵ nɔ́ɔ́, moo a̧m vud vu̵ ya dimmí, u̵u̵ yaa ya túlílí. A̧m vud vu̵ nag Seeɗán woolı̵́, u̵u̵ yaa Tayɨɨ woolı̵́. Ʉu̵ 'yɛ́ zó̧ó̧ míílí̧ sú̵'ú̵ tée, míń kéé hȩn ɓı̵́d voo gbɔ la, vú̵ń nuŋ ya mbaalı̵́ sa̧a̧m nán Tayɨɨ woo voolı̵́ á̧ḿ.’

Pól moo moo yúú ba'ad woolı̵́

19“Ba' naa Agrípa, mí ɓéen hȩn sa̧ga̧ káń ho̧, ka zu̵u̵ be"ı̵́ yȩ né, 20a̧máa mí bé' moo Tayɨɨ palı̵́, mí dəŋ pad nán Damásdı̵́ vu̵ yu̵ tíŋ́, kan nán Yerúsalemmé vu̵, kan nán ı̵́ ku̵u̵ dɨ hág Yúúdalı̵́, kan hág tóó vu̵lı̵́ á̧ḿ. Mí o̧d vu̵ u̵u̵ gbɔ mbaalı̵́ see voo, u̵u̵ duu Tayɨɨ yȩ́ńná, u̵u̵ kɔ́ ba'ad ka maa kɔ́lı̵́ tíŋ́ Tayɨɨ woolı̵́ máa á̧ḿ. 21Moo woo nɔ ma, nán Yúúda vu̵ ma'an lig hȩn ha"ı̵́lı̵́, vu̵ hí̧í̧ bi nɔɔnɔ́. 22A̧máa Tayɨɨ wu̵ tu̵n há̧á̧ 'ya̧'a̧ yɛ, ma káń baa dɨd Tayɨɨ ya̧g du̵lı̵́ tíŋ́ nán gbo̧o̧ voolı̵́, kan nán tóó vu̵ á̧ḿ yɛ nɔ. Míń moon moo tóó kə́d né, séý moo anábi voo, kan moo Múúsa woo ku̵u̵ moo, hȩn woo ban dɨ kɔ́yné pȩ́ń má nɔ. 23Ká vu̵ o̧: ‘Ɨ́ nán sənné ban nuŋ hȩn ndɔ́gɔné nɔm pȩ́ń, tée ban duu dəŋ níḿ nɔmmé, tée ban tú'ud zig woo yɛ moo to̧o̧ 'maŋ, kan zig tóó vu̵ á̧ḿ.’ ”

Pól hí̧í̧ gbanaa Agrípa a 'yɛ́ zó̧ó̧ woo Yesu woolı̵́ á̧ḿ

24Pól ka kpad ya̧g ı̵́ yo̧go̧ máa, Feetús o̧ddu̵ dɔg moo yúba o̧: “Mɔ́ ya̧ŋŋɨ! Hȩn kúguní móó na'a yȩ, tiim sı̵́ ya̧ŋŋɔ́.”

25A̧máa Pól hí̧i̧du̵: “Ba' naa Agrípa, mí ya̧ŋ pɛ́lı̵́, a̧máa moo káń moo yɛ, vu̵ moo yȩ́ń vu̵ yu̵, vu̵ maa hȩn moo taalı̵́ mɛ́ń. 26Gbanaa Agrípa ki moo yɛ sú̵'ú̵, ma mí duu o̧ddu̵ la had, a ki du̵u̵lı̵́ na'a! Mí taa hȩn tóó tinnɔ woo wu̵lı̵́ dágá aga né, moo hȩn woo kɔ́yya zo"ı̵́. 27Gbanaa Agrípa, ví fȩȩ moo anábi voo yɛ sá'áa? Mí gaa ví fȩȩ sú̵'ú̵.”

28Ma Agrípa hí̧i̧d Pól o̧: “Sey waa waaná' yɛ, mɔ́ taa ba bíń tiin kirtȩ́nnáa!”

29Pól duu hí̧i̧du̵: “Kóó sey waaná', kóó sey woo téé si̧', mí ɓá' Tayɨɨ yúú víílí, kan nán ku̵u̵ ki moo míí ɓəə yɛ vu̵ 'waapád, ka víń tii ya kɔ́ ı̵́ káń mbaa yɛ wɔgɔ, a̧máa moo u̵u̵ ta ví kɔ́ ı̵́ ku̵u̵ tan yɛ wɔgɔ má nɔ pɛ́lı̵́.”

30Pig woolı̵́ guvɛrnə́ər vu̵ kan gbanaa, kan daa kȩ́ȩ́ Bereníi, kan nán vu̵n mbaa wu̵lı̵́ á̧ḿ máa, vu̵ daa lúú dii dɔg. 31Vu̵ vúd, vu̵ ó̧ń ya voolı̵́: “Nán yȩ kɔ́n hȩn tóó ka maan nɔm, tóó tée ka maa tú̵"ı̵́ lig púúsinalȩ́ máa né.”

32Ma gbanaa Agrípa o̧d Feetús: “Nán yȩ kan kan doo gbanii nán Róma voo woo né tée, ka vu̵n gbɔgɔ, kan laa la ú̵.”

Currently Selected:

Debtere ba'ad waa ba'ad voo nɔ 26: DIINT

Highlight

Copy