Debtere ba'ad waa ba'ad voo nɔ 25

Pól dɨ tíŋ́ guvɛrnə́ər woolı̵́

1Guvɛrnə́ər Feetús ka ya̧ ya hág yȩlȩ́ máa, bá' idú, ta̧a̧nɔ́ woo máa, daa lúú kaa Sezaréelı̵́ dɔg Yerúsalemmé. 2Gbanaa hȩn ha"ı̵́ vu̵ kan nán gbo̧o̧ hág Yúúdalı̵́ vu̵, vu̵ ká̧ŋ́ ya maawo̧ moo Pól woo, vu̵ vigi 3ba a ba' bee Pól a dɔgɔ Yerúsalemmé. A̧máa vu̵ ta ya̧g ba a yaa tée, bi nɔɔwo̧ hi̧naalȩ́. 4Feetús hí̧i̧d vu̵ Pól ba dɨ lig púúsinalȩ́ kaa Sezaréelı̵́, zaa ba bíń vȩ́' zu̵u̵ sı̵́ wu̵lı̵́ ú̵ á̧ḿ. 5Ma duu o̧d vu̵: “Pól yȩ, a kɔ́ dɨ ȩnáa tée, ı̵́ nii víí u̵u̵ ba'an zu̵u̵ tée, vú̵ń la doowu̵ wu̵lı̵́.”

6Feetús səə Yerúsalemmé, bá' ka'andaddú̵, tóó tée bá' wa̧nɓó', ma daa vȩ́' zu̵u̵ kaa Sezaréelı̵́.

Ya̧g ka̧'a̧m woo máa, ya mbaa ya moo sə̧"ȩ́lȩ́, o̧d vu̵ u̵u̵ la pa̧ŋ Pól yaanɔ́.

7Pól ka ya̧ ya máa, nán Yúúda vu̵n zu̵u̵ Yerúsalemmé pee vu̵ gbɔ daa kannɔ, vu̵ gaŋ dom voo yaan, vu̵ o̧ moo, maa moo gbo̧o̧ vu̵ mɛ́ń. A̧máa aga vu̵ gaan moo sú̵u̵ do̧o̧ woo tú"í ní á̧ḿ. 8Ma Pól kpad ya̧g, o̧: “Mí o̧n míí moo ɓı̵́d tóó yúú debtere Tayɨɨ nán Yúúda voolı̵́ né, kan lig hȩn ha"ı̵́ á̧ḿ, kóó yúú gbanii nán Róma voo woolı̵́.”

9Feetús ka hí̧í̧ bi kɔ́ hȩn a to̧o̧d nán Yúúda vu̵ ú̵ máa, hí̧i̧d Pól o̧: “Mɔ́ hí̧í̧ bi dɔg Yerúsalemmé aa la sə̧' ví moo yɛ tíŋ́ míílí̧ wu̵láa?”

10Pól hí̧i̧du̵: “Mí dɨ ya moo sə̧"ȩ́ gbanii nán Róma voo woolı̵́, séý u̵u̵ sə̧'ə̧n zu̵u̵ moo wu̵lı̵́ yɛlı̵́. Aga ví gaa á̧ḿ, mí kɔ́n míí nán Yúúda vu̵ hȩn ɓı̵́d tóó né. 11Tow moo a dɨ míílí̧, a̧n kɔ́ hȩn tóó a maa ba vú̵ń nɔɔnɔ́ tée, mí ndɔgɔ né á̧ḿ. A̧máa hȩn ku̵u̵ doon wu̵lı̵́ yȩ, a moo yȩ́ńne pɛ́lı̵́ tée, nán a dɔn voolı̵́ nagá máa pɛ́lı̵́ á̧ḿ. Mí ka míí doo gbanii nán Róma voo woo nɔ.”

12Feetús ka mba moo kan nán moo mbɔ́ggı̵́ vu̵ máa, hí̧i̧d Pól: “Mɔ́ ka sı̵́ doo gbanii nán Róma voo woo ú̵, mɔ́ń dɨ laalı̵́ woolı̵́.”

Pól dɨ tíŋ́ gbanaa Agrípa voolı̵́, kan Bereníi

13Bá' tóó pig woolı̵́ máa, gbanaa Agrípa#25:13 gbanaa Agrípa Agrípa ı̵́ yɛ waa Agrípa tóó kíí záŋ́ga moo woo sapíitər 12, vɛrsée 1 woolı̵́. vu̵ kan daa kȩ́ȩ́ Bereníi vu̵ yaa kaa Sezaréelı̵́, moo bi vá' guvɛrnə́ər Feetúsdú̵. 14Vu̵ səə wu̵lı̵́ bá' ɓu̵u̵lı̵́ na'a, ma Feetús o̧d gbanaa yȩ moo Pól woo: “Felíg ká 'yɛ́ nán tóó dɨ lig púúsinalȩ́ yɛlı̵́. 15Sey káń dɔg Yerúsalemmé máa, gbanaa hȩn ha"ı̵́ vu̵ kan ı̵́ nii Yúúda vu̵ doowu̵ míílí̧, vu̵ o̧n a̧n sə̧' moo yúú woolı̵́. 16Ma mí hí̧i̧d vu̵: ‘Nán Róma vɔ́ baa si̧'i̧n vóó nánán té' né. Séý vɔ́ su̵gu̵n nán yȩ kan nán dom woo vu̵ ya dágá; vɔ́ soo moo yȩ́ń nán dom woo voolı̵́, ma ı̵́ moo aga a kan ya̧g moo kpanné pɛ́lı̵́ ma, vɔ́ si̧'i̧du̵.’ 17Ma vu̵ duu duun ya yɛlı̵́, a̧máa mí tiin vu̵ daa né á̧ḿ. Ya̧g ka̧'a̧m woo máa, mí la mbaa ya moo sə̧"ȩ́lȩ́. Mí o̧d vu̵ u̵u̵ pa̧ŋ ya nán yȩ ó̧, ma vu̵ pa̧ŋŋɔ ya. 18Daga ı̵́ maag ku̵u̵ daa vúd ya, ku̵u̵ doowu̵ máa, mí ho̧n míí hȩn ɓı̵́d gbo̧o̧ ba'a tóó wu̵lı̵́ né sá̧ḿ. 19Moo káń ki máa, aga vu̵ fan moo yúú debtere Tayɨɨ voo woolı̵́, kan moo nán tóó ku̵u̵ beewu̵ Yesu, ka nɔɔ, ma Pól ka o̧ ba duu mbaa zá̧a̧dɨ máa woo nɔ. 20Káń ki máa, mí gaan hȩn tóó a̧n kɔ́n kan moo máa yȩ né. Mí vi Pól: ‘Mɔ́ hí̧í̧ bi dɔg Yerúsalemmé, moo bii a dɔg la 'wáa wu̵láa?’ 21A̧máa Pól o̧ bi mbaa yɛlı̵́, há̧á̧ u̵u̵ ba' bi la gbanii nán Róma voo woolı̵́, a to̧'o̧n bi moo yɛ ú̵. Ma mí o̧d vu̵ u̵u̵ 'yɛ́gɛ wu̵lı̵́, há̧á̧ míń ba"u̵ la gbanii nán Róma voo woolı̵́.”

22Agrípa ka ki ná' máa, o̧d Feetús: “Mí hí̧í̧ bi ki moo ya̧g nán yȩ woolı̵́ kan tɔ́g míí nu.”

Ma Feetús hí̧i̧du̵: “Yɔ́gɔ́ mɔ́ń ki.”

23Ya̧g ka̧'a̧m woo máa, gbanaa Agrípa vu̵ kan daa kȩ́ȩ́ Bereníi vu̵ dɔ́ sa̧a̧m gbo̧o̧ voo, vu̵ sú̵g dɔ́ la ya moo sə̧"ȩ́lȩ́, kan kolonɛ́l vu̵ kan nán gbo̧o̧ tóó vu̵ kaa yȩlȩ́. Feetús o̧d vu̵, ma vu̵ pa̧ŋa Pól. 24Ma Feetús o̧: “Gbanaa Agrípa kan nán kíí mbaa yɛ, ya víí 'waapád, i ho̧ sı̵́ nán yɛ nɔ. Káń dɔg Yerúsalemmé máa, nán Yúúda vu̵ 'waapád vu̵ ká̧ŋ́ ya maan yúú woolı̵́, vu̵ móó moo ba a mbaa sá, a mbaa zá̧a̧d sá! Vu̵ duu ya kɔ́ yɛlı̵́ ı̵́ yo̧go̧ á̧ḿ. 25Ɨ́ míí máa, mí ho̧n hȩn tóó ka kɔ́, ka maa u̵u̵ nɔɔnɔ wu̵lı̵́ máa né. A̧máa aga ka ka sı̵́ doo gbanii nán Róma voo woo ú̵ máa, mí mbɔ́g moo bi ba"u̵ la ú̵. 26A̧máa mí nugun moo yȩ́ń a̧n bíńda pú̵n gbanii baa ví yȩ né sá̧ḿ. Moo woo nɔ, mí tú'ud ví kannɔ, kan gbanaa Agrípa á̧ḿ. Aa mba ví moo woo tée, míń gaa hȩn a̧n bíńda máa. 27Sey kaa bi ba' nán si̧'i̧ní tóó laan ya tóólı̵́ tée, maa kaa bíńda moo yȩ́ń yúú hȩn ku̵u̵ doowu̵ wu̵lı̵́ máa pȩ́ń.”

Currently Selected:

Debtere ba'ad waa ba'ad voo nɔ 25: DIINT

Highlight

Copy