Tito 1
1
So Pablo ÿamaxa aso lede so Tito
1Aÿim Pablo, aÿim l-latac ñi Dios qataq aÿim lamaxashic so Jesucristo da setauan da lpi'iÿaxac na lca'aguishicpi ñi Dios, yaqto' namayipi ÿauattoota da 'eesa lataxac dam qad'amqajnataxanaxac, 2qataq ÿauattoota nataq'en da aquitaxac da achaalataxac mayi chochaq tateec. Qaq ñim Dios mayi sa datenataxan ñimayi ÿachaxanapec co'olloxochiyi de'eda achaalataxac co'ollaq saxanaqaca ana 'alhua. 3Qaq co'ollaq ivita so laloqnec ñim Dios mayi qadca'alaxaqui da qomi' ÿauattonaxanaxanque da l'aqtac, nachi aÿim ipataxalec da sa'axateec de'eda l'aqtac. 4'Am Tito, 'en'am da 'am ÿalec, cha'ayi aÿim 'auachigoxottot da 'adpi'iÿaxac dam qomi' hueto'oto. 'Am samaxa ana ÿide, cha'ayi ñishitaique da 'auaconguet da nqouagaxanaqtaic, nataq'en da nchoxonnataxanaxa, qataq da nlagaxayic mayi chigoqo'ot ñi qadta'a Dios, nataq'en so qadataxala' Jesucristo mayi qadca'alaxaqui.
Da l'onataxanaxac so Tito co'ollaq netaña yi 'alhuolec Creta
5Se'eso na'a'q co'ollaq 'am ñi'onaxataña yi 'alhuolec Creta, cha'ayi ñishitaique da 'auaÿamaxajñi na saxana sematpi, qataq da 'edeuo na lataxala'pi na 'amqajnataxanaxaicpi mayi netaña na pueblopi. Qaq 'eda da 'am sepataxalec da 'au'axat: 6Ca lataxala' na 'amqajnataxanaxaicpi sa ishit da huo'otaq sa ÿaÿamaxañi ca n'aqtaguec, qataq 'oonole aca lhua naq'en, qataq da'amqajnataxan naq'en na llalaqpi, yaqto' sa ishit da huo'o ca qaÿasaxalec, souaxat ca n'onataxac sa ÿaÿamaxañi, qataq souaxat da sa ÿalaq. 7Cha'ayi ca qaipataxalec da ilo'ogue na 'amqajnataxanaxaicpi, camayi ilo'ogue 'enauac na l'onataxanaxacpi ñi Dios. Ÿoqo'oyi iuen da qui'itta naq'en da nachaalataxac. Sa ishit da hua'auaqchaqaic da damaxasoxon, qataq sa ishit da lemataqaic, sa ishit da taxaic, sa ishit da sa lhuanguit da lalemataic, sa ishit da quetaigui da latenataxanaxac da nmitta'a aca plata. 8Chaqdata da nloshiguem, sa ishit da sa ilo'oguet ca lÿa da namaxasoxoic, qataq nqopita da i'ot ca ÿaÿamaqchiguiñi. Nloteec, no'on da lataxac, qui'itta, ilotegue da nachaalataxac. 9Qataq ÿataqta n'añaxattec da n'aqtac mayi 'eesa lataxac dam mashi qaÿapaxaguenec, yaqto' nataq'en ishit da i'añaqchit ca lÿa da idolec da no'oita napaxaguenataxanaxac, qataq nloqteneec ca depa'aguenataxaatac.
10Cha'ayi mashi saqalota na sa ÿalaq, lamaaxa na judiopi. Namayipi ltaxaÿaxaco naua chochi n'ajnaxaiqa, qataq ÿatenachittalec na shiÿaxauapi. 11Namayipi iuen da qaÿapoguilo naua ala'pi, cha'ayi ÿataqta saq maÿa't naq'en na nhuo' l'ecpi, souaxat da dapaxaguenataxaatapeguec na sa lataxac, cha'ayi chochi nshitaique da nauec añi plata.
12Huo'o so ÿajnaxanaxaic co'olloxochiyi lma' yi Creta. Somayi co'ollaq i'axat na maichi lauo' l'ecpi, 'eeta' da l'aqtac: “Nam Creta l'ecpi ÿataqta shipecaicpi, qataq yiloxoicpi 'ico' shiguiÿac, qataq saq llalcolec na chic, qataq hualaicpi.” 13Qaq ÿataqta 'eesa da l'aqtac. Ÿoqo'oyi nagui ÿataqta 'avidaxato'ot namayipi da qonapega, yaqto' ishit da no'oita da lpi'iÿaxac, 14qataq nal'en da sa ÿoqocha'a na chochi n'aqtaxanaxacpi mayi chigaqaigui na judiopi, qataq da lamaxasoxonaxac nam mashi ca'ai da 'eesa lataxac.
15Ca shiÿaxaua, da qui'itta da lhuennataxa, qaq qui'itta naq'en 'enauac na chochina lataxaguesat. Qalaxayi na sa da'amqajnataxan, qataq saxanaxa da qui'itta da lhuennataxa, namayi qaica ca qui'itta naq'en. Cha'ayi da lhuennataxa qataq da lavilÿaxac ÿataqta nshipaxan. 16Namayipi 'eetega da ÿauatton ñi Dios, qalaxayi da lataxac ÿataqta sa natenguet. Cha'ayi ÿataqta sa qaishiteguet, souaxat da sa ÿalaq qataq saq taiguet ca camachaqca n'onataxanaxac ÿaÿamaqchiguiñi.
Currently Selected:
Tito 1: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
