2 Timoteo 4
4
1Qaq de'eda ÿaqataxac 'am sami' nagui ÿataqta qomi' ÿauaachiguilo ñi Dios qataq so qadataxala' Jesucristo mayi anac qome da nachaxan da nta'a, qataq nmit ñi 'oonolec na shiÿaxauapi mayi ña nca'altauec qataq na mashi ileu. 'Am shinapega 2da ÿataqta 'au'axat da n'aqtac, ÿataqta 'anpogoxoinapegue' da huo'o ca 'addaqa', nachi 'en'am da qaica ca 'addaqa'. 'Anloqteneec ca shiÿaxaua, 'auachaxana ca lsomaxac, 'auqata, ÿataqta 'anhualaxaune' da 'auapaxaguen. 3Cha'ayi huo'o qome ca na'a'q da na shiÿaxauapi sa ishit da ishiteguet da napaxaguenataxanaxac no'oita. Chaqdata da n'axaÿaxaata'a ca maichi lqopitaxanaqtaic, qataq nmitta'a da ÿotta'a't naq'en na napaxaguenaxala' da qaÿapaxaguenec cam n'axaÿaxaata'ai. 4Qataq ÿapoguilo naua ltela lauaco da sa ishit da n'axaÿaxana da 'eesa lataxac. Chaqdata da n'axaÿaxaata'ai na ÿotta'a't n'aqtaxanaxac mayi n'ajnaxaic. 5Qalaxayi 'am ÿataqta 'anloteeco' qome, qataq 'an'añaxateguet na 'anque'ejnaxaguesat, qoquetot da 'au'axat da n'aqtac mayi chigaqaigui da nca'alaxa, 'aupactelco' da 'ad'onataxanaxac.
6Da ñachaalataxac mashi qoÿanot ñi Dios, 'ico' ca ntago'q da qaicodelguete aca nca'atoxonaxalate. Cha'ayi mashi sa qaÿapque yi ÿaloqo'. 7Mashi semat da seloctapeguelec da i'onataxanaxac, qataq senoxonaqchiteec da ñaloxoyaxac. Ÿataqta soolec da qadpi'iÿaxac. 8Qaq nagui aÿim iuatta'aguet da nshiitenaguec da ñachaalataxac qui'itta. Qaq de'eda aÿim ÿami' que'eca na'a'q so qadataxala' Jesús som sa depe'enaxan da nmit na shiÿaxauapi. Qalaxayi saqaÿimta da aÿim ÿami', nataq'en 'enauac na shiÿaxauapi mayi ÿayiita'aguet ca lli'iguelaxasoxoc.
Lalamaxat nqataxac so Timoteo
9Ÿataqta sa 'anaÿaloxon da 'auanac da aÿim 'anauane'. 10Cha'ayi so Demas aÿim ca'ai, souaxat da lqopichi da 'onataxac lma'na. Nachi nqochingue da Tesalónica. Qaq so Crescente taigue da 'alhua Galacia, qaq so Tito taigue da 'alhua Dalmacia. 11Nachaqñita ñi Lucas ñaq aÿim hueta'aguet. Qaq qom 'auanac, nachi 'ananaÿalec ca Marcos da 'anauec, cha'ayi camayi taiguet da aÿim itauan da qad'onataxanaxac. 12Qaq so Tíquico samaxague da la ciudad Éfeso. 13Qaq qom 'auanac, qaq 'anachi ca ipo' mayi secotano'ot so Carpo mayi netaña yi Tróade. Nataq'en 'anachi aca ÿidepi, qalaxayi sa ishit da 'aucoua'ai aca ÿidaxanaxalatepi.
14So lcat l'o, l'enaxat Alejandro, ÿataqta saqalota na aÿim i'otec qauem. Qaq so qadataxala' ishiitenguet qome 'enauac na i'otpi. 15Maxatchaxa, 'advita'agueto' qome, cha'ayi somayi ÿataqta dataÿa'aguet da qad'aqtaxanaxac.
16Se'eso na'a'q co'ollaq chita'ague da so'ot so hua'auchiguiñi itaxaÿaxac da setaxaÿapegue' na nta'alpi, qalaq 'enauac da aÿim qaÿalata'a't, qaica ca aÿim nachaateu'a da aÿim detaqlec. Qalaxayi 'onaxaic da ñi Dios sa ishit da ilogui qome de'eda. 17Qalaxayi so qadataxala' Jesús saq aÿim iÿoteec, qataq aÿim ÿami' da i'añaxac da ña sepactelec da sa'axat da n'aqtac mayi chigaqaigui da nca'alaxa, yaqto' hua'axaÿa de'eda 'enauac na saq judiopi. Qaq nachi 'eetec de'eda som qadataxala' aÿim nca'alaxateeguesop da 'ico' loxonaxanaxac ca dequi'iÿapec. 18Qaq nachi taÿaueegue da aÿim ntelaqna'aguet 'enauac na sa ÿaÿamaxañisat, chochi aÿim ividaxatta'a da aÿim inoxonaqchiteu'a ca l'onataxanaxac mayi hueta'ague da piguem. Qaq somayi mayi hueto'ot da qadyacnataxanaxac chochaq tateec. Aja', nachi 'eetec de'eda.
Da pa'ateec lquinaxanaxac so Pablo
19Samaxa da iquinaxanaxac aca Prisca qataq ca lhua Áquila, qataq ca lauo' l'ecpi so Onesíforo. 20Qaq so Erasto n'onaña yi Corinto, qaq so Trófimo ñi'onaxataña yi Mileto, souaxat da sa no'on. 21Qaq 'auÿalapigui' qome da 'auanac, llaxatemallaxa saxana nvi' na n'omaxa. 'Am ÿamaxa da lquinaxanaxac ñi Eubulo, Pudente, Lino, qataq añi Claudia, qataq 'enauac na qadqaÿañicpi.
22Qaq ñi qadataxala' Jesucristo 'am hueta'aguet qome, qaq ñi Dios qami' ÿanema qome ca no'on qoyiquiaxaqui. Aja', nachi 'eetec de'eda.
Currently Selected:
2 Timoteo 4: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
