Filemón 1
1
So Pablo ÿamaxa aso lede so Filemón
1Aÿim Pablo, aÿim qaicoñittai' souaxat da sasoilec so Cristo Jesús. Aÿim qataq ñi Timoteo 'am samaxa ana ÿide, 'am qanauochaxaua qadqaÿa Filemón mayi 'am qad'onataxanaxaua, 2qataq 'enauac nam 'amqajnataxanaxaicpi mayi laponqa' na 'adma', nachi 'en'am aca qadqaÿa Apia, qataq ca Arquipo mayi nataq'en ale, 'eeta'ama qomi'. 3Qaq qauacoñiiguet qome da nqouagaxanaqtaic qataq da nlagaxayic mayi chigoqo'ot ñi qadta'a Dios qataq so qadataxala' Jesucristo.
Da lsoxoyic qataq da lpi'iÿaxac so Filemón
4Aÿim nachi 'eetai' naxa da saatacot da ñi'achiquiaxac ñi Dios da tachigui yi iuel da qoneta da ñoqouagaxaueetac. 5Cha'ayi aÿim huo'o da i'axaÿaxac da 'adauotaxanaqtaic qataq da 'adpi'iÿaxac so qadataxala' Jesús qataq da 'adauotaxanaqtaic 'enauac nam lalamaxatpi ñi Dios. 6Nataq'en seÿaxaatacot ñi Dios, da yaqto' nam da'amqajnataxanpi mayi chigoqchigui da 'adpi'iÿaxac, da yaqto' namayipi ÿataqta ÿaÿateetegue ca lataxac 'enauac na nqouagaxanaqtaicpi mayi chigoqo'ot so Cristo Jesús. 7Qaq ÿoqo'oyi aÿim ÿataqta samachiguiñi qataq huo'o da i'añaxac souaxat da 'adauotaxanaqtaic, cha'ayi 'am ÿaqaÿa, ÿataqta 'am chigoqchigui da huo'o da l'añaxac da lquiyaqteÿaxac 'enauac na qadqaÿañicpi.
So Pablo iÿaxanaique ca nchoxonnataguec so nlatac Onésimo
8Qaq ÿoqo'oyi aÿim nai'ctaxa da aÿim lamaxashic so Cristo qataq huo'o naq shinec da huo'o ca 'am samaxalec da 'au'ot, 9qalaxayi aÿim sepacapegue' da 'am ñachoxodeetot, souaxat da nsoxoyic. Aÿim Pablo nagui mashi aÿim ÿi'axaiqui qataq aÿim qaicoñittai', souaxat da sasoilec so Cristo Jesús, 10qaq nagui 'am seÿaxanot da 'auchoxoden qome na Onésimo. Namayi mashi ivida'a da 'eeta'am ñaq'en ca yi'oqchigui ÿalec ana'ana sootaigui ncoñitaxanaxaqui.
11Ne'ena Onésimo soua lÿa't na'axa'te namayi chochi 'adlatacolec qaica ca taiguet, qalaxayi nagui namayi ÿataqta ipe'et nataq'en 'am. 12Qaq nagui namayi qaltaq 'am samaxa, qaq 'auaconguet qome, qalaxayi qoneta'am qome da nachaÿim da aÿim 'auaconguet. 13Qaq aÿim ishíttaxa da ñillañi namayi, da yaqto' aÿim neto'ot, da yaqto' 'anmenguet da namayi aÿim do'onataxanot nagui da ñaq aÿim qaicoñittai' souaxat da n'aqtac. 14Qalaxayi aÿim sa ishit da huo'o ca sa'aulec, cha'ayi sa iuena'a da huo'otaq sa 'auaÿamaxaden, yaqto' que'eca 'adqouagaxanaqtaic da shiita, sa ishit da 'ico' 'am qaÿamaqtalec. Chaqdata da maichi 'am chigoqchigui. 15Cha'ayi sa iuena'a da na Onésimo cada'ac da saq 'am no'ot, yaqto' nagui da 'am ÿi'iguelqot, nachi sa ishit da 'am ca'ai. 16Qaq nagui namayi sa ishit da 'ico' 'adlatac. Cha'ayi namayi saq 'en'am ca chochi nlatac, cha'ayi namayi 'eeta'am ca 'anauochaxaua 'adqaÿa. Namayi ÿataqta sauotec, qalaxayi ÿataqta ÿacteec 'anqa'en qome da 'adauochi. Sa ishit da chaqdata da 'auauotec, cha'ayi qoneta'am shiÿaxaua, cha'ayi namayi 'eeta'am ca 'adqaÿa 'ad'amqajnataxanaxaua so qadataxala'.
17Qaq ÿoqo'oyi qom ÿoqta 'eesa da aÿim 'adÿa, qaq ÿataqta qoneta'am aÿim da 'auaconguet namayi. 18Qaq da huo'otaq huo'o ca 'am i'otec co'ollaxa sa ÿaÿamaxañi, huo'otaq huo'o aca lavigaxaiste, qaq no'on da aÿim 'auÿaxanot da seshiiten. 19Qaq aÿim maichi semapegue' da shiyiñi de'eda i'aqtac da aÿim 'am seshiiten qome, nai'ctaxa da huo'otaq 'am ishit da tachigui yi 'adhuel ñaqshin da aÿim neto'ot nataq'en añi 'adavigaxaiste, souaxat da maichi 'anachaalataxac. 20Aja', 'am ÿaqaÿa, 'auauo'o qome ca 'adqouagaxanaqtaic da shiita, cha'ayi 'am mashi 'au'amaqteetac so qadataxala'. 'Au'añaqchit qome da iquiyaqteÿaxac, cha'ayi maichi qomi' n'amqajnataxanaxa'u so Cristo.
21Qaq aÿim 'am samaxa ana'ana ÿide, cha'ayi saÿateeta da ÿataqta huo'o da 'adalaxayic, qataq ishit da 'ai'agaqteeteec da 'an cam seÿaxanaique. 22Nataq'en soqopitaxanapec da 'am shinapega da 'auqataxanai' qome ca i'ochaqa', cha'ayi aÿim seuattaique da huo'otaq qaÿasateguet que'eca qanqouagaxaunaxaqui. Nachi ñi Dios ishit da aÿim ÿanem da yaqto' qami' ñoqo'onalo.
Da pa'ateec nquinaxanaxac qataq da nqouagaxanaqtaic
23Qaq 'am ÿamaxa da lquinaxanaxac ñi Epafras, ñim ñicoñitaxaua souaxat da sasouaxalec so Cristo Jesús, 24qataq ñi Marcos, Aristarco, Demas qataq ñi Lucas mayi aÿim itauaata'pe de'eda i'onataxanaxac.
25Qaq so qadataxala' Jesucristo qami' ÿanema qome ca no'on qoyiquiaxaqui. Aja', nachi 'eetec de'eda.
Currently Selected:
Filemón 1: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
