Hebreos 1
1
Ñi Dios ÿachigoxotchigui so llalec da l'aqtac
1Soua hua'a'u vi'iyi co'ollaq ñi Dios qalota da da'aqtaxanem som hua'au qadta'alpi, qalaq ÿotta'a't da 'eetec naq'en da i'aqtaxanaxan som l'aqtaxanaxanecpi. 2Qaq ne'enaua pa'atreec na'axa'te, qalaq ñimayi ÿachigoxotchigui so llalec da qomi' da'aqtaxanema. Ñi Dios ÿachigoxotchigui co'ollaxa se'eso llalec da i'ot 'enauacna, qataq nachiso so ipataxalec da ilo'ogue 'enauac namayipi. 3Qaq somayi nachiso som lli'oxoyic da l'edaxa ñi Dios, qataq somayi nachiso som lqui'iÿaxac ñimayi, qataq somayi nachiso som nllitañi 'enauacna, nam l'aqtaqa mayi qaica ca ÿaqalana'pe. Qaq somayi co'ollaq imat da iÿouec 'enauac nam qadasouaxashitpi, nachi somayi nso'ongue da aloic ñi Dios mayi nso'ootangui aca nso'onaxaqui da nta'a mayi neta'ague da piguem.
So llalec ñi Dios, somayi nataÿaña na namaxashic piguem l'ecpi
4So llalec ñi Dios, somayi nataÿaña 'enauac nam namaxashic piguem l'ecpi, cha'ayi somayi qoÿanagui da l'enaxat mayi ÿataqta napacalec da l'amaqchic namayipi. 5Cha'ayi ñi Dios sa ishit da huo'otaq iÿaxana ca lamaxashic piguem l'ec da 'eeta':
'Am mayi nachi'am ÿalec;
'Am seco'oic ne'ena na'a'q.
Qataq sa ishit da detaxaÿa ca lamaxashic piguem l'ec da 'eeta':
Aÿim qome aÿim lta'a somayi,
qaq somayi qome ÿalec.
6Qalaxayi co'ollaq anacot so l'auaxanec llalec da namaxa ana 'alhua, nachi 'enapeco':
'Enauac qome nam lamaxashic piguem l'ecpi ñi Dios,
namayipi qome i'adoto naua l-llicte.
7Qaq da n'aqtaguec nam namaxashic piguem l'ecpi, qalaq ñi Dios 'eeta':
Ñimayi i'otec na lamaxashic piguem l'ecpi da 'eeta'am naq'en na l'at,
qataq ne'ena l'onataxanaxanecpi 'eeta'am naq'en na nodec l'edaxa.
8Qaq da n'aqtaguec so llalec, qalaq ñi Dios 'eeta':
Añi 'anso'onaxaqui da 'am nta'a,
'am Dios, añimayi qaica ca loga't;
qataq da 'ad'onataxanaxac da 'am nta'a,
damayi ÿataqta ÿaÿamaqchiguiñi.
9'Am ÿataqta 'anqopita da 'au'ot ca ÿaÿamaqchiguiñi,
qataq ÿataqta sa 'anqopita ca sa ÿaÿamaxañi.
Qaq ÿoqo'oyi ñi 'adta'a Dios,
ñimayi icodelec 'am da lta'adaic 'adamaiquiaxac,
qaq saq 'en'am naq'en na 'adaÿipi.
10Nataq'en 'enapeco':
'Am mayi 'am nataxala', so hua'auchiguiñi co'ollaq 'am 'au'ot ana 'alhua,
qataq naua 'adhua'q nachi l'onata'c na piguem.
11Qaq namayipi taÿa'a da imeuo, 'am, qalaxayi nachi qonetai'.
Qataq 'enauac namayipi taÿa'a da lto,
'eeta'am ca chochi nogoxot.
12Qataq da 'aunana't namayipi, qalaq qoneta'am 'anqashin ca npo'.
Qataq namayi taÿa'a da qanadalaxat, 'eeta'am ca nogoxot.
'Am, qalaxayi nachi qonetai',
qataq da 'anachaalataxac sa ishit da huo'o ca loga't.
13Qataq ñi Dios sa ÿauango' da 'enapega ca 'oonolec nam lamaxashicpi da 'eeta':
'Anso'oota'ague qome da aÿoic,
to' qom mashi sacho'oto naua 'adchil nam 'am ipa'agueetacpi.
14Qataq 'enauac nam namaxashicpi, namayi saq cha'a, do'onataxaatacot ñi Dios. Namayi qanamaq, da yaqto' itauan nam ÿaconguet qome da nca'alaxa.
Currently Selected:
Hebreos 1: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
