Hechos 8

So Saulo ÿauo'o da nque'ejnaxac na 'amqajnataxanaxaicpi

1Qaq so Saulo ÿataqta ÿaÿamaxadeeta da nalaataguec so Esteban.

Qaq nachi huetoigui se'eso na'a'q da qaicanaxangui na 'amqajnataxanaxaicpi yi Jerusalén, nachi huo'o na taÿa yi 'alhua Judea qataq yi Samaria. Qaq chaqsouate' soua Jesús lamaxa'shi n'oidañi. 2Qaq huo'o nam shiÿaxauapi mayi quetague' ñi Dios nam ilayiñi co'ollaxa so Esteban, nachi ÿataqta noÿiitapeguelec somayi. 3Qaq so Saulo nachi ÿataqta ÿoqopitaxanapec da icaatac na 'amqajnataxanaxaicpi, inoxotta'pe naua noiqa. Cam ilalec ÿale, huo'otaq 'alo, nachi ÿauogonnauec, nachi ÿauegueuo, da yaqto' qaicoñi'.

Qai'axattac da no'on qad'axaÿaxac yi Samaria

4Qalaxayi nam nlagaxattacpi mayi chigaqaña yi Jerusalén, namayipi i'axattac da n'aqtac mayi chigaqaigui da nca'alaxa, da huo'o da ividegue. 5Qaq huo'o so 'oonolec namayipi, l'enaxat Felipe, somayi co'ollaxa taÿa yi pueblo Samaria. Huaña, nachi i'axattac so nta'a mayi qadca'alaxaqui. 6Nachi na shiÿaxauapi laponeu'a somayi. Qaq 'enauac namayipi ÿataqta huo'o da lqochoxo da l'aqtaxanaxac so Felipe, qataq nataq'en qaÿauaatapigui na n'anecpi sa qaÿauanapega mayi i'ottac. 7Cha'ayi qalota na shiÿaxauapi na huo'o na l'ec leguemaxaic na qanataden, qaq nam n'ecpi mayi inoxoneec, namayipi i'alaqtagui. Qataq nataq'en qalota na qanataden nam sa da'añiigue qataq nam huaÿodaxaicpi. 8Qaq 'eda da 'eetec da huo'o mshi 'enauac nam netaña se'eso pueblo ÿataqta huo'o da ntonaxac.

9Qalaxayi huo'o so shiÿaxaua l'enaxat Simón. Somayi co'ollaxa do'onataxaatega da napinshaxac da ÿatenachittac na shiÿaxauapi mayi hueta'a yi'iyi pueblo Samaria. Somayi 'eetego' naxa da ÿataqta huo'o naq 'enec. 10Nachi 'enauac na shiÿaxauapi ÿataqta n'axaÿaxaachiguiñi da n'axaÿaxaatega somayi, ivida'a na 'amaqtaqaicpi qataq nam saq 'amaqtaq. Nachi namayipi 'eetaco':

–De'eda shiÿaxaua nachida da lta'adaic l'añaxac ñi Dios.

11Nachi ÿataqta qaÿoqocha'a, cha'ayi dam napinshaxac ÿataqta sa lcoshi'igue da ipi'itaqchit somayipi. 12Qalaxayi co'ollaq qai'amaqten dam no'on qad'axaÿaxac mayi i'axattapeguem somayipi so Felipe co'ollaq i'axattac da ilo'ogue 'enauacna ñi Dios, qataq i'axattac da l'enaxat so Jesucristo, nachi huo'o na ÿallippi qataq na 'alpi na da'amqajnataxan, nachi qanachilaxan. 13Nachi nataq'en ÿalecteuo so Simón da da'amqajnataxan, nachi qanachilaxan. Huaña, nachi ca'attague' so Felipe, ÿataqta huo'o da l'aalaxa da imeteetac nam lta'adaicpi mayi sa qaÿauanapega qataq nam n'anecpi mayi i'ottac somayi.

14Nachi soua Jesús lamaxa'shi mayi nejdaña yi Jerusalén co'ollaq ÿaÿate'n da na netaña yi Samaria i'amaqten da l'aqtac ñi Dios, nachi qaÿamaxa yimayi so Pedro qataq so Juan. 15Qaq co'ollaq mashi ivilyi', nachi nqouagaxaueetapeguelguete so 'amqajnataxanaxaicpi mayi netaña yi Samaria, da yaqto' ÿaconguet somayipi so Espíritu Santo. 16Cha'ayi somayipi saxanaxa co'ollaxa da huo'o ca 'oonolec da huo'otaq mashi tanguit so Espíritu Santo, ndoteec da mashi qanachilaxan, qanachilaxangui da l'enaxat so qadataxala' Jesús. 17Nachi so Pedro qataq so Juan, soomayi ÿashildelec somayipi. Huaña, nachi somayipi tanguit so Espíritu Santo.

18Nachi se'eso Simón ÿauaachigui da so Espíritu Santo tanguit so shiÿaxauapi co'ollaq soua Jesús lamaxa'shi ÿashildelec somayipi. Nachi somayi ÿachaxanapec aso alom. 19Nachi 'enapeco':

–Aÿim qai'añiim qome nataq'en de'eda n'añaxac, yaqto' da huo'o ca camachaqca sashil-lec, nachi camayi nataq'en tanguit so Espíritu Santo.

20Nachi so Pedro 'enapego' somayi, 'eeta':

–'Am qataq ana 'om qocaueegue' qome da 'am daqat, cha'ayi 'am 'aupi'itaxaatega da cam ÿan l'añaxac ñi Dios ishit da 'aushijnaxana. 21'Am sa ishit da 'aÿapegueuo qataq saq 'am qoÿami' de'eda n'onataxanaxac, cha'ayi da 'adquiyaqteÿaxac sa ishit da ÿataqtelec da quegue ñi Dios. 22Chaqdata da 'ai'axaañi da 'ayi'itaxaloxo, qataq 'anachoxonnot ñi Dios, shapeegueto' qom ishit da 'am ichoxoden, nachi ÿapalaxat da qauem lhuennataxa añi 'adquiyaqte. 23Cha'ayi aÿim sela'a da ÿataqta 'am nlaqchigui na qauem mayi sa 'adamaqchit, qataq na qauemsat 'eeta'am da 'am icoñittai'.

24Nachi so Simón 'enapeco':

–Aÿim qanqouagaxauñiilec qome, qauÿaxañiÿot ñi Dios, da yaqto' sa ishit da huo'o ca aÿim tagui 'enauac nam qau'axachiitac.

25Nachi soua Jesús lamaxa'shi co'ollaq ima't da l'aqtaxanaxa'c da i'axattrac da l'aqtac ñi Dios, nachi nqo'ooda nam pueblopiolec mayi huaigui yi Samaria da i'axattrac da no'on qad'axaÿaxac. Ime, nachi ÿi'iguelaxadegue da Jerusalén.

So Felipe qataq so shiÿaxaua mayi lma' yi Etiopía

26Qaq co'ollaq ime de'eda, nachi so lamaxashic piguem l'ec ñi qadataxala', somayi 'enapego' so Felipe, 'eeta':

–Qoñishiguem qome, nachi 'aigue da taguiñi, qoquegue so nqa'aic mayi chigaqshiguemec yi Jerusalén, taÿa'a yi Gaza.

Se'eso nqa'aic nachiso so tajlec yi tojlec 'alhua. 27Nachi so Felipe ñishiguem, nachi jec, nachi natena'aguet co'ollaxa so shiÿaxaua mayi chigaqa'ague da Etiopía. Qaq somayi sa deco'o qataq nta'a lta'adaic, somayi nachiso so ilotague' ana alom aso nate'e l'enaxat Candace, asom late'e nam netaña yi Etiopía. Qaq somayi taigue co'ollaxa da Jerusalén da natamnot ñi Dios. 28Qaq somayi ÿi'iguelaxague da lma', netangui aso laigona. Qaq itaxaÿaxaatac co'ollaxa aso lede so l'aqtaxanaxanec ñi Dios, l'enaxat Isaías. 29Nachi so Espíritu Santo 'enapego' so Felipe, 'eeta':

–Sa 'auÿotapeque qome asa'aso naigona.

30Nachi so Felipe co'ollaq mashi sa qaÿapeque asa'aso naigona, nachi hua'aqtega somayi da itaxaÿaxaatac aso lede so Isaías. Nachi inattaco' se'eso shiÿaxaua, 'eeta':

–¿Peta'a 'auaÿaten ca llic yi 'autaxaÿaxaatac?

31Nachi se'eso shiÿaxaua 'enapeco':

–¿Táloxochi ishito' da saÿaten ca llic, yi sa ishit da huo'o ca aÿim ÿapaxaguenec ca llic yimayi?

Nachi somayi 'enapego' so Felipe da huenotshiguem da nqota'ai'.

32Qaq som n'aqtac mayi itaxaÿaxaatac 'eeta':

Camayi qome 'eeta'am ana qagueta da qaÿauectauga ca nalaataqa';

qataq 'eeta'am ca qagueta llalec da qanpetec,

qalaq sa ishit da i'alaq.

Qaq 'eda qome da 'eetec camayi da sa ishit da ÿauachigui na alap da i'alaq.

33Nachi de'eda nachoxonnataguec ÿataqta qaica ca ishit da iuejlec;

qalaxayi cam llalaqpi ¿negue'tom qome ca ishit da i'axattac?

Cha'ayi da nachaalataxac qanqat,

da yaqto' sa ishit da huetalec ana 'alhua.

34Nachi se'eso nta'a inattac so Felipe, 'eeta':

–Ñaq aÿim 'adqouaguec da aÿim 'au'aqtaxanem, ¿chaq négue't ca l'aqtac de'eda, peta'a nachiso som l'aqtaxanaxanec ñi Dios da maichi n'axattapeguela't, qalqo' lÿa shiÿaxaua ca n'aqtaguec de'eda?

35Nachi so Felipe cot da l'aqtaxanaxac, ÿachigoxotchiguiña som n'aqtac mayi qaitaxaÿaxaatac, qataq i'axatem somayi da no'on qad'axaÿaxac mayi n'aqtaguec so Jesús. 36Qaq co'ollaq ivitra som huaña da huo'o na 'etaxat, nachi se'eso nta'a 'enapeco':

–Ne'ena huo'o na 'etaxat, qaq ¿sa ishito' peta'a da aÿim qanachilaxan?

37Nachi so Felipe 'enapego' somayi, 'eeta':

–Da ÿataqta imauec da 'adquiyaqteÿaxac da 'au'amqajnataxan, nachi ishit.

Nachi se'eso shiÿaxaua 'enapeco':

–Aÿim sa'amaqten so Jesucristo da nachiso so llalec ñi Dios.

38Nachi somayi damaxasoxoolec da qai'axanguet aso nnotaxaqui, nachi soomayi huenotreec, nachi tayingui so 'etaxat. Nachi so Felipe nachilaxan se'eso nta'a. 39Qaq co'ollaq nnoxooyishigue'm so 'etaxat, nachi so n'Espíritu ñi qadataxala' ÿauec so Felipe. Nachi se'eso nta'a sa lÿa da nauane' somayi, qalaxayi somayi ÿi'iguelaxague ca lma', ÿataqta machiguiñi. 40Nachi so Felipe hueta'a co'ollaxa yi Azoto. Huaña, nachi quetaguilo naua pueblolqa, i'axattac da no'on qad'axaÿaxac, chochi ivitta'a yi Cesarea.

Currently Selected:

Hechos 8: TBSNT

Highlight

Copy

Compare