Hechos 7
7
Da ltaxaÿaxac so Esteban
1Nachi so lta'a na ntaxaÿaxanaxanecpi, somayi inattac so Esteban, 'eeta':
–¿Peta'a 'eesa 'enauac de'eda qai'axattac?
2Nachi somayi 'enapeco':
–Qami' ÿaqaÿadolqa, qataq qami' ita'alpi, ñaq aÿim qan'axaÿaxañiÿa. Ñim qadta'a Dios mayi ÿi'oxodaic, ñimayi nachaxana co'ollaxa so qadta'a Abraham co'ollaq somayi hueta'a yi 'alhua Mesopotamia, co'ollaq somayi saxanaxa da taÿa yi Harán. 3Nachi ñimayi 'enapego' somayi, 'eeta': “Qoca'ai qome na 'an'alhua, qataq 'enauac nam 'adhuo' l'ecpi, nachi 'anqo'ona qome yi 'alhua mayi 'am sachaxana.” 4Nachi so Abraham ca'ai yi 'alhua Caldea, nachi taÿa yi Harán da nalec. Qaq co'ollaq qaÿata'ague, nachi so lta'a ileu, nachi ñi Dios nauega so Abraham ne'ena 'alhua mayi qoñiitalec nagui. 5Qalaxayi ñimayi sa ishit da ÿashiitem da ÿauo'o ca ÿoqta lalamaxat lma', da yaqto' ÿauo'o ca chochi lanataqa', qalaxayi ñimayi ÿachaxanapecot somayi da ÿanem ne'ena 'alhua, qaq da ivita da ileu, qalaq nachica ca llalaqpi ca talec. Qaq nai'ctaxa da se'eso na'a'q so Abraham saxanaxa da huo'o ca llalaqpi. 6Ñi Dios nataq'en 'enapego' somayi da ca llalaqpi qome taÿa'a da netalec ca ÿaqa'a 'alhua, 'eeta'am ca ÿaqa'a ca chigaqa'ague, nachi chochi nlatacpi qataq ÿataqta huo'o da n'enaguec, chochi ivittrauec caua cuatrocientos vi'iyi. 7Qalaxayi ñi Dios nataq'en 'enapeco': “Aÿim qome sauo'o ca nhuaxanaguec que'eca shiÿaxauapi mayi ÿauo'o l-latac camayipi. Qaq qom ime, nachi ca'ai que'eca hueta'a. Huaña, nachi camayipi aÿim natamnot da huaña ne'ena 'alhua.” 8Nachi ñi Dios naÿamaxate' so Abraham, nachi 'enapega somayi da ÿauo'o ca n'anaxashit na l'oc. Camayi nachica ca l'anaxat de'eda aÿamaxataxac. Qaq ÿoqo'oyi co'ollaq ñiguiñi so llalec Isaac, nachi so Abraham ÿauo'o so n'anaxat na l'oc co'ollaq mashi ivi' naua ocho na'axa'te. Qataq nachi 'en'am so Isaac co'ollaq huo'o so llalec Jacob, nachi nataq'en i'ot de'eda. Nataq'en so Jacob i'otec de'eda so llalaqpi, som doce qadta'alpi.
9Qaq se'eso llalaqpi so Jacob mayi sachigoxosoxoiguipi, somayipi co'ollaxa nquiÿa so lqaÿa José. Nachi somayi qaimen, nachi qaido'ogue da Egipto. Qalaxayi ñi Dios hueta'aguet somayi, 10ÿoqo'oyi ÿiltaxanguet 'enauac na nque'ejnaxaguesat, qataq ÿanem da laÿajnaxanaxa qataq ÿanem da nchoxonnataguec. Nachi so lta'a nam netaña yi Egipto, l'enaxat Faraón, ÿanagui so José da nta'a yi 'alhua Egipto, qataq da ilo'ogue so lma' somayi.
11Qaq anac so nqouaxa, nachi ÿataqta qalota da nachoxoyic yi 'alhua Egipto qataq yi Canaán. Nachi som qadta'alpi sa ishit co'ollaxa da ÿanata ca chic. 12Qalaxayi so Jacob co'ollaq huo'o da l'axaÿaxac da qoÿinac huo'o na nallic yi Egipto, nachi ÿamaxa yimayi so llalaqpi mayi qadta'alpi. Qaq de'eda lliquiaxa'c, nachida da hua'auchiguiñi lliquiaxa'c. 13Qaq soomayi co'ollaq qaltaq ÿi'iguela'q, nachi so José nchoxota so lqaÿañicpi. Huaña, nachi so lta'a nam netaña yi Egipto ÿaÿaten so lauo' l'ecpi so José mayi chigoxoigui. 14Nachi so José damaxasoxona so lta'a Jacob da qanavigui' qataq 'enauac so llalaqpi, qaq somayipi ivi' setenta y cinco da ima'a't. 15Qaq 'eda da 'eetec so Jacob da taÿa yi Egipto da naña. Qaq nachi huaña yimayi co'ollaq ileu somayi, nataq'en so llalaqpi mayi qadta'alpi. 16Qaq co'ollaq qaÿoqtegue, nachi qanlayishiguem somayipi da qaido'ogue da Siquem, nachi qailayiña som 'alhua mayi deshijnaxana co'ollaxa so Abraham, ÿachigoxotaigui so llalaqpi so Hamor mayi lma' yi Siquem da ÿauotaique da lma' na lqatacpi.
17Qaq co'ollaq mashi yaqta'a da ivita so laloqo' da ipacchigui dam ÿachaxanapec ñi Dios co'ollaq ÿanem da l'aqtac so Abraham mayi 'eetega da ÿataqta ipacchigui, nachi nam llalaqpi so Israel mayi netaña yi Egipto ÿataqta nquictauec yi lcata. 18Qaq co'ollaq dalaxaic som lta'a nam netaña yi Egipto. Qaq somayi sa ishit da ÿauatton so José. 19Nachi se'eso nta'a ÿatenachit so qadhuo' qataq sa ishit da iyacnapec se'eso qadta'alpi, qataq damaxasoxoolec da qaÿalat na llalec nam chita'ague da ñiguiñi, da yaqto' ileu. 20Qaq se'eso na'a'q, nachi huetoigui da ñiguiñi so Moisés. Qaq se'eso nogotolec, somayi ÿataqta lauotaxat ñi Dios, nachi soua lta'al ivi' naua tres ca'agoxoiqa da ilotrague', ÿaatraña ca lma't. 21Qaq co'ollaq ivita so laloqo' da ÿala't somayi, nachi aso maichi llale som lta'a na netaña yi Egipto, asomayi ilalec somayi, nachi ÿacona, nachi ÿaqchit, 'eeta'am da llalec. 22Qaq ÿoqo'oyi so Moisés qaÿapaxaguenec 'enauac nam ÿaÿatenpi nam lma' so Egipto. Nachi somayi ÿataqta 'añaxaic cam 'enapec qataq cam i'ot.
23Qaq somayi co'ollaq mashi ivi' naua cuarenta vi'iyi, nachi nshitaique da namaqtega nam lauo' Israel llalaqpi. 24Huaña, nachi somayi ÿauaachigui cam Egipto l'ec da iuaxaatac cam 'oonolec namayipi. Nachi iuejlec somayi, qataq ipalaique lvi', nachi ÿalauat se'eso Egipto l'ec. 25Cha'ayi somayi ipi'itaxaatega co'ollaxa da na lqaÿañicpi mayi llalaqpi so Israel ishit da ÿaÿateeteguet da nachiñi ñi Dios ñi do'onataxana somayi da isouec somayipi. Qalaxayi somayipi sa ishit co'ollaxa da ÿaÿajneguet de'eda. 26Qaq so lÿa na'a'q, nachi so Moisés ilalguete soua dos Israel lashi' deloctega't. Nachi somayi nshitaique da nmanaqchi't, nachi 'eetegalo', 'eeta': “Qami' maichi qami' nqaÿa't. Qalaq ¿tá'ainco' yi maichi qauloquiitega't?” 27Nachi som iuaxaatac so lÿa, nachi ÿamaxañi so Moisés, nachi 'eetego', 'eeta': “¿Négue't ca 'am ÿanagui da 'am qadta'a, qataq da yaqto' ishit da 'anmit ca huo'o ca lasouaxashit da shinaqta? 28¿Peta'a 'anshitaique da nataq'en aÿim 'aualauat, qoneta'am da 'eetec yim Egipto l'ec mayi 'aualauat shicait?” 29Nachi so Moisés co'ollaq hua'axaÿa de'eda, nachi datauec, nachi taÿa yi 'alhua l'enaxat Madián, nachi naña, 'eeta'am ca shiÿaxaua mayi ÿaqa'a ca chigaqa'ague. Huaña, nachi huo'oi soua dos llalqa.
30Qaq co'ollaq inoxoodeec soua cuarenta vi'iyi, qaq so Moisés hueta'a ca tojlec 'alhua mayi sa qaÿapeque aca qasoxonaxa l'enaxat Sinaí. Huaña, nachi nachaxana somayi so namaxashic piguem l'ec huetaigui aso qo'ipaq lapole mayi 'ettaigui. 31Nachi so Moisés ÿataqta huo'o da l'elaxa souaxat se'eso lauanaqchic. Nachi co'ollaq nqochineu'a da huotaique da ÿoqta ichimaxatta, nachi hua'axaÿa so l'aqtac ñi qadataxala', 'eeta': 32“Aÿim mayi nachaÿim nDios som hua'au 'adta'alpi, nachaÿim nDios so Abraham, qataq so Isaac qataq so Jacob.” Nachi so Moisés ÿataqta iviloxolaqchit da lcolanaxa, nachi sa ishit da ÿañoxot da namatashiguem. 33Nachi ñi qadataxala' 'enapego' somayi, 'eeta': “'Anqa't qome naua 'adapela'te, cha'ayi ne'ena 'alhua mayi 'auapetalec, namayi ÿataqta sa qaishitapec. 34Aÿim selota'a da nqui'ic yi ÿalamaxatpi mayi netaña yi Egipto, aÿim sa'aqtega da l'alaxac. Ÿoqo'oyi aÿim senoteeguesop yimayipi, da yaqto' sesouec. Qaq 'am qojec qome da 'am samaxa yi Egipto.”
35Qaq nai'ctaxa co'ollaxa somayipi da i'otan so Moisés, nachi 'eetega, 'eeta': “¿Négue't ca 'am ÿanagui da 'am qadta'a, qataq da yaqto' 'anmit ca huo'o ca lasouaxashit?” Qalaxayi ñi Dios ÿachigoxotchigui so lamaxashic piguem l'ec mayi nachaxana so Moisés co'ollaq huaigui aso qo'ipaq lapole, da ÿamaxa somayipi da ÿauo'o lta'a qataq da yaqto' isouec. 36Qaq nachiso so Moisés so nqateeguesop yi Egipto so hua'au qadta'alpi. Qataq nachiso so i'ot nam sa qaÿauanapigui qataq na n'anecpi yi'iyi 'alhua, qataq co'ollaq huaña aso auaxai togaxadai, qataq so tojlec 'alhua se'esoua cuarenta vi'iyi. 37Qataq nachiso se'eso Moisés so da'aqtaxanem co'olloxochiyi so Israel llalaqpi, 'eeta': “Ñi Dios qami' namaxalo qome ca l'aqtaxanaxanec, camayi maichi qadalamaxachi qadqaÿai, camayi 'eeta'am aÿim da qami' qanamaxalo. Qaq camayi ÿataqta qaualaqaileco' qome.” 38Qataq nachiso so Moisés som huetaigui so shiÿaxauapi co'ollaq huaña so tojlec 'alhua. Qataq nachiso so detaqtague' so namaxashic piguem l'ec co'ollaq huaña aso qasoxonaxa l'enaxat Sinaí, qataq hueta'aguet som hua'au qadta'alpi. Qataq nachiso so ÿaconguet co'ollaxa da n'aqtac mayi chigaqaigui da nca'alaxa, da yaqto' qomi' ÿanema.
39Qalaxayi som hua'au qadta'alpi co'ollaxa sa ishit da ÿalaxalec somayi, chaqdata da qaimaqta'aguet. Nachi somayipi nshitaique da ÿi'iguelaxague da Egipto. 40Nachi somayipi 'enapego' so Aarón, 'eeta': “Qomi' sauoqtaique da 'am 'au'ot qome ca qannatac qadtaxaÿaxaua, da yaqto' nachica ca sataqtalec, cha'ayi qomi' sa ishit da saÿajnaq cam 'eetec cam Moisés mayi qomi' nqateeguesopa co'ollaxa yi Egipto.” 41Nachi som shiÿaxauapi i'ot so ltaxaÿaxaua, 'eeta'am naq'en na huaca llalec. Huaña, nachi qaÿalauat na shiguiÿacpi da qoÿanot somayi, nachi ÿataqta qantootapeguec som maichi n'onatac. 42Huaña, nachi ñi Dios ca'ai somayipi, nachi ÿauaqta'a somayipi da yaqto' natamnot ana huaqajñipi mayi neto'ot na piguem. Cha'ayi nachida dam 'eetec da nanettañi l'aqtac ñi Dios mayi huetalec ana lede so l'aqtaxanaxanecpi, mayi 'eeta':
Qami' Israel l'ecpi,
co'ollaq qoquiitalec so tojlec 'alhua se'esoua cuarenta vi'iyi,
qaq ¿peta'a co'ollaq qaualauachiitac na shiguiÿacpi da qauauo'oi qadachitaqtaxanaqchii,
qaq peta'a nachaÿim da aÿim qai'añiitacot?
43'A'i, sa ishit, chaqdata da qami' qauachiitac so qauauo'oi lpe'l so qadtaxaÿaxauai l'enaxat Moloc,
qataq so lÿa qadtaxaÿaxauai l'enaxat Refán mayi 'eeta'am da n'onataxac ana huaqajñi.
Qaq se'esoua n'enaqtaqa qami' qau'ochi' co'ollaxa da yaqto' qanatamñiitacoto.
Ÿoqo'oyi aÿim qami' ñaqateeguesopa nagui ne'ena qadmayi,
nachi qami' samaxalo yi 'alhua mayi pa'aigue da laÿi yi Babilonia.
44Qaq som hua'au qadta'alpi co'ollaq huetalec so tojlec 'alhua, nachi somayipi ÿachitac so npe'l mayi huetaiguilo soua nanettalguete soua lqataxaco ñi Dios. Qaq se'eso npe'l, somayi qai'enaxachigui co'ollaxa so ÿamaxalec ñi Dios so Moisés, co'ollaq 'enapega somayi da yaqto' i'enaxatchigui da n'onataxac som ÿauaachigui. 45Qaq se'eso hua'au qadta'alpi, somayipi co'ollaxa ÿaconguet se'eso npe'l da chigoqtot som hua'au lta'alpi, nachi som nnaictague'pi co'ollaxa so Josué nda'a ne'ena 'alhua se'eso npe'l co'ollaq somayipi loxonec na lma' so laÿipi shiÿaxauapi mayi nqateec ñi Dios. Cha'ayi ne'ena 'alhua ÿauotaique lma' naq'en somayipi. Qaq 'eda da 'eetec se'eso npe'l, nachi chochi ivitta'a co'ollaq huo'o so nta'a David. 46Qaq se'eso nta'a David co'ollaq ñi Dios ÿanem somayi da lqouagaxanaqtaic, nachi somayi nshitaique da i'ot ca lma' ñi nDios so lta'a Jacob. 47Qalaxayi llalec Salomón co'ollaxa so i'ot ñi lma' ñi Dios. 48Qaq nai'ctaxa da ñim Dios mayi 'amaqtaqaic sa ishit da netaigui ca chochi l'onatac noÿic ca shiÿaxaua. Cha'ayi nachi 'enapec naua nanettrañi l'aqtaqa som l'aqtaxanaxanec, mayi 'eeta':
49Aÿim ñiso'ootalec na piguem da samaxasoxonapec,
qaq nam 'alhua sapetalec.
Qaq ¿huá'ago' ca 'eetec ca noÿic mayi qau'ochi da iuo'? 'enapeco' ñi Dios,
qataq ¿huá'ago' ca 'eetec cam ñimataqa'?
50¿Peta'a sa i'onataco' 'enauac nam huetalecna?
51Qaq ñaq queta da ltaxaÿaxac so Esteban, 'eeta':
–Qami' nachi 'eetai' da ÿataqta sa qaualaqai, qataq da qan'axaÿaxanaxaqui qataq naua qadquiyaqchilli' 'eeta'am ca saxanaxa da ÿauatton ñi Dios. Qataq nachi 'eetai' da qanpa'aguiñiitague' so Espíritu Santo. Qaq nachi qoñiita'am som hua'au qadta'alliipi. 52Cha'ayi ¿chaq négue'to' cam l'aqtaxanaxanec ñi Dios da huo'otaq sa iuaxan som hua'au qadta'aipi? Cha'ayi somayipi nachi ÿalauat co'ollaxa som hua'auchiguiñi da i'axatta'aguet da lvidaxac som shiÿaxaua mayi no'on da lataxac. Qaq somayi co'ollaq nvi', nachi qami' qauacoñiu'a, nachi qaualauachi. 53Qamaq nachiqami' mayi qauacoñiiguet co'ollaxa na lqataxacpi ñi Dios mayi ndoi' so lamaxashic piguem l'ec. Qalaxayi qami' sa ishit da qaualaqaiguet namayipi.
Da l-leuaxa so Esteban
54Nachi somayipi co'ollaq hua'axaÿa de'eda, nachi ÿataqta dalemata, qataq 'eeta'am da inaga't naua lhue da lquiÿaxa so Esteban. 55Qalaxayi so Esteban, yi somayi ÿataqta nlaqchigui so Espíritu Santo, nachi ÿamato'ot na piguem, nachi somayi ila'a da lli'oxoyic ñi Dios, qataq ila'a so Jesús nachattañi, hueta'ague na aloic ñi Dios. 56Nachi somayi 'enapeco':
–¡Ña qauloÿa! Aÿim sela'a da nauatoigui na piguem qataq ñim shiÿaxaua llalec, ñimayi nso'oota'ague da aloic ñi Dios.
57Qalaxayi somayipi lamaaxa ÿapoguilo naua ltela, ÿataqta n'axannec da l'alaxac, nachi ÿataqta qaipadenaxaneu'a somayi da qaÿaconeu'a. 58Nachi qanqateeguesop so la ciudad, nachi qaida'a na coma' da qaÿasaq. Qaq 'enauac nam ÿalectau'a de'eda nasaxasoxonaxac, namayipi icotano'oto naua lapo'te so nsoq l'enaxat Saulo. 59Qaq co'ollaq ña qaÿasaqtalec so Esteban, nachi somayi nqouagaxaueetac, 'eeta':
–'Am ÿataxala' Jesús, 'auaconguet qome ñi shicapegue' iqui'i.
60Qaq co'ollaq ime, nachi i'alyiñi naua l-llicte, nachi ÿataqta n'axannec da l'alaxac, 'eeta':
–'Am ÿataxala', sa ishit qome da 'aulogui da lasouaxashit ne'enapi.
Qaq co'ollaq ime da nasaxauec de'eda l'aqtac, nachi ileu.
Currently Selected:
Hechos 7: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
