2 Corintios 8
8
Da 'eetec da nachitaqtaxanaxac
1Qaq nagui qami' qadqaÿa't, sauoqtaique da qami' sa'aqtaxanaxama da 'eetec da lqouagaxanaqtaic ñi Dios mayi ÿanem nam 'amqajnataxanaxaicpi mayi netalec yi 'alhua Macedonia. 2Cha'ayi nai'ctaxa da lqalaic yimayipi souaxat da ñi'iguenataguec, qalaq nachi 'en'am ÿataqta machiguiñi. Qataq nai'ctaxa yimayipi da ÿataqta choxodaq, qalaxayi ÿataqta chitaqtaxanaxaicpi, 'eeta'am da sallaxanecpi. 3Qaq aÿim ÿataqta sauaachigui yimayipi da ÿataqta huo'o da lyaxa da detaunaxan. Qaq ÿan 'enauac dam nalotau'a, ivida'a da ÿataqta ÿapacauec naq'en da lachitaqtaxanaxac. 4Qataq ÿataqta qomi' nachoxodeetapoiguilo da sauaxasoqta'a da nhuanau'a de'eda ntaunaxanaxac da qaitauan ca qadqaÿañicpi. 5Qataq yimayipi ivida'a da i'ot dam qaica da seuennaqtapega. Cha'ayi yimayipi i'auaxaañi da nañanot so qadataxala', ime, qataq jec qomi'. Qaq damayi chigoqchigui ñi Dios. 6Qaq ÿoqo'oyi qomi' ñachoxodenaqtacot so Tito, da yaqto' nachi 'eetai' da quetot naq'en da qoñiita de'eda nachitaqtaxanaxac mayi sogote co'ollaxa da i'ottac can qami' huetaiguilo. 7Cha'ayi qami' qaica 'enauac ca qanqalaachi': huo'o da qadpi'iÿaxaqui, qataq sa ishit da qanqalaachi da qauapaxaguenataxañi, qataq huo'o da qadauattonaxanaxaqui, qataq da qan'añaxataxaqui, qataq da qauauochi da shinaqta. Qaq ÿoqo'oyi no'on da sa ishit da huo'o ca qoue qanqashiñi nataq'en de'eda nachitaqtaxanaxac.
8Qaq de'eda shinapec sa ishit da ÿamaxasoxonaxac. Chaqdata da ñishitaique da qami' qauaÿajñi da n'añaxataxac cam qadÿai, yaqto' ishit da qaila'a de'eda qadsoxoyiqui qom ÿoqta 'eesa da 'en. 9Cha'ayi mashi qauauattoñi qami' da lqouagaxanaqtaic so qadataxala' Jesucristo, da somayi ÿataqta sallaxanec. Qalaxayi somayi ÿataqta nachoxoden, souaxat da lauotaxanaqtaic da qoñiita, yaqto' qami' ishit da qami' sallaxanqa, souaxat da lachoxoyic somayi.
10Qaq qami' sanema de'eda iuennataxac, yaqto' saqca ca da da qoñiita. Qami' so lÿa vi'i sogote da qau'ochiitac de'eda. Qaq saqdata da qau'ochiitac damayi, cha'ayi ÿataqta huo'o da qadhuogoqoi. 11Qaq ÿoqo'oyi nagui no'on da qoquiitot da qau'ochi damayi, ivitta'a da qaumachi. Ÿataqta qau'enaxachiichigui da qadhuogoqoi can chita'ague da qauachitaqtaxañi, da qai'añi acam qanaloitau'a. 12Cha'ayi ca shiÿaxaua da ÿoqta 'eesa da lhuennataxa da huo'o aca ÿan, qalaq ñi Dios ÿataqta ÿaÿamaxadeeta acam nalotau'a da ÿan camayi. Cha'ayi ñimayi sa ishit da iÿaxanaique acam sa ishit da qanalou'a.
13Qaq damayi sa ishit da naigui da yaqto' qami' huo'o da qadhuenaxanqai souaxat da qautauañi ca qadÿai. 14Cha'ayi damayi naigui da yaqto' 'eeta'a't na shiÿaxauapi. Cha'ayi nagui qami' qautauañiic cam iueetaique yimayipi. Qaq qom huo'o ca na'a'q, qaq yimayipi ishit da qami' itauaneque cam qaviñiitaique. Qaq da qoñiitec de'eda, nachi ishit da 'eeta'a't na shiÿaxauapi. 15Cha'ayi nachi 'enapec naua ñiyigui'shi l'aqtaqa ñi Dios, 'eeta': “Cam qalota na laponguishic, qalaq qaica ca lli'iÿoxot; qaq cam saq 'amaqtaq ca laponguishic, qalaq qaica cam iueetaique.”
So Tito qataq soua lÿata'pe
16Qaq sanot da ñi'achiquiaxac ñi Dios, cha'ayi ñimayi ÿachanguit ana lquiyaqte so Tito da 'eeta'am naq'en aÿim da huo'o da lyaxa da qami' itaua'n. 17Cha'ayi somayi ÿalaxaguet dam i'aqtac mayi sami', qataq somayi yi nachi 'eetai' da huo'o da lyaxa da qoñiita, qaq nagui maichi chigoqchigui da maichi qami' nqo'onalo.
18Qaq sa ishit da chaqsota so Tito. Nataq'en huo'o so lÿa samaxasoq qadqaÿa som ÿataqta no'on da n'aqtaguec da n'aqtaxaatapigui 'enauac nam 'amqajnataxanaxaicpi ne'ena souaqta'a, souaxat da i'axattac da n'aqtac mayi chigaqaigui da nca'alaxa. 19Qaq saqdata de'eda, cha'ayi 'enauac nam 'amqajnataxanaxaicpi qalca'ateu'a se'eso qadqaÿa, da yaqto' ñinaigaqtague', qataq da yaqto' qomi' itaua'n de'eda souaqtapegue' nachitaqtaxanaxac mayi so'otaqtac da yaqto' ÿi'oxodaq naq'en ñi qadataxala' qataq yaqto' ishit da qaila'a de'eda qan'añaxataxaqui. 20Qaq shinaqtec de'eda, cha'ayi huo'o da qadvitaxa da huo'otaq qomi' qanayictapeguelguete souaxat ana nachitaqtaxanaqte mayi llaÿonaqtac. 21Cha'ayi qomi' ñipogoxoinaqtapegue' da so'otaq ca ÿaÿamaqchiguiñi, qaq sa ishit da sauoqtaique da nachaqñita ñi qadataxala' da qomi' ÿauaachiguilo, nataq'en 'enauac na shiÿaxauapi.
22Qaq soomayi saqsouate'. Nataq'en samaxasoq so lÿa qadqaÿa mayi nataq'en qomi' saÿajnaqta da 'eetec da ltaunaxanaxac. Qaq nquicteec nagui da ltaunaxanaxac souaxat da lpe'e da qoñiita. 23Qaq da huo'otaq huo'o ca denataxanec so Tito, qaq qau'aqtaxañiim camayi da so Tito maichi itaua, aÿim itauaatac da qami' huetapegueto. Qaq da huo'otaq qainataxanec soua lÿa't qadqaÿa't, qalaq qau'axachi' sa soomayi maichi lamaxa'shi nam 'amqajnataxanaxaicpi mayi hueta'a ne'ena soota'a, qataq soomayi ÿi'oxodeetrac so Cristo. 24Qaq ÿoqo'oyi qami' no'on da ÿataqta qauachaxañiÿalo qome soomayi da qadsoxoyiqui, yaqto' ishit da ÿaÿateeta na 'amqajnataxanaxaicpi ne'ena soota'a da ÿoqta qomi' 'eesoda da qami' shi'oxodenaqta'pe.
Currently Selected:
2 Corintios 8: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
