2 Corintios 7
7
1Qaq ÿoqo'oyi qami' ñauochaxa'u ÿaqaÿa't, 'eda da qomi' qaÿachaxanapecoto. Ÿoqo'oyi sa ishit qome da huo'o ca ishipaxanaqchit da qad'oquiaxac qataq dam saq cha'a qanachaalataxac 'enauac nam ishit da deshipaxanaqtaxan. Qataq ÿataqta ñipogoxoinaqpegue' qome da qomi' qui'itte', souaxat da souaqtaigui da shi'iÿaxa ñi Dios.
Da 'eetec co'ollaq ca'aisalo naua n'onataxaco so Corinto l'ecpi
2Qaq ÿoqo'oyi qauauo'oi qome ca qaddaqa' naua qadquiyaqchilli'. Cha'ayi sa ishit da huo'o ca seque'emaqchitaq qataq da ñi'axataq qataq da satenachitaq. 3Qaq sa ishit da shinapec de'eda da yaqto' sauo'o ca qadasouaxashichi, cha'ayi mashi ime caillayi da i'aqtac da qami' ÿataqta qanhuañiÿau'a da iquiyaqteÿaxac, da yaqto' qami' ñachaalataxa'u qataq da qami' ileuaxa'u. 4Qaq ÿataqta qalota da ñaquitaxac qataq ñitonaxac souaxat da qoñiita. Qaq nai'ctaxa da souaqtangui 'enauac na qanque'ejnaxaguesat, qalaq aÿim ñanomteguet da i'añaxac qataq aÿim nlaqchigui da ñitonaxac.
5Chigoqta'a can ñividaxa yi Macedonia, nachi saxanaxa da huo'o ca qanmataxac. Chaqdata da qomi' ñatenaqlec 'enauac nam qomi' nqanaxa't qataq pa'aÿauec da qancogaxanataguec qataq mashi leutapigui da qadvilÿaxac. 6Qalaxayi ñim Dios mayi ishit da i'añaqchit cam qaica ca l'añaxac, ñimayi chigoqchigui naq'en da lvidaxac so Tito da qomi' i'añaqchi't. 7Qaq sa ishit da chaqdata da lvidaxac somayi, cha'ayi somayi ÿataqta huo'o da l'añaxac souaxat da qoñiita. Cha'ayi somayi qomi' da'aqtaxaatapeguema da ÿataqta huo'o da qadyaqai da aÿim qanauañi', qataq qomi' da'aqtaxaatapeguema dam qadaquicoqoi qataq da qaica ca qadamaxayiqui souaxat aÿim. Qaq nachida da ÿoqta nquigaxatteec da ñitonaxac.
8Qaq nai'ctaxa da aso ÿide mayi qami' samaxalo co'ollaxa da qami' ÿaquicoqchi't, qalaxayi nagui sa ishit da shicapeguem. Cha'ayi da huo'otaq saÿaténctaxa co'ollaxa da qami' ÿaquicoqchi't, qaq da huo'otaq shicapeguem, qalaxayi saqaÿaloxouec. 9Qaq nagui ÿataqta huo'o da ñitonaxac, qalaxayi damayi sa ishit da souaxat da qami' qauaquicoita. Mayi souaxat da de'eda qadaquicoqoi. Damayi chigoqchigui da qai'axañiideec naua qan'onataxacolli'. Cha'ayi huo'o da qadaquicoqoi mayi ÿaÿamaxadeeta ñi Dios, qaq sa ishit da huo'o ca 'ico' qadasouaqtac da qoñiita. 10Cha'ayi de'eda naquicoxo mayi ÿaÿamaxadeeta ñi Dios, damayi i'ot da qoÿaxaadeec naua 'onataxaco qataq naigui da nca'alaxa. Qaq ÿoqo'oyi sa ishit da qanayictega. Qaq dam laquicoxo nam sa da'amqajnataxanpi, damayi naigui da nleuaxa. 11Qaq qami' huo'o da qadaquicoqoi mayi ÿaÿamaxadeeta ñi Dios, qaq ¡ña qauloÿa nagui dam naigui! Damayi i'ot da ÿataqta sa qauasaguiyiitac, qataq qau'axachi da naigui dam qau'ochi, qataq qami' inogoqchi't, qataq ÿauo'o da qadcolanqai. Ime, qaq ca huo'o ca qadyaqai da aÿim qanauañi'. Huaña, nachi qami' qanasapachiitelec da qauauo'oi da nhuaxanaguec cam i'ot ca qauem. Qaq 'enauac de'eda ichoxot da qami' ÿataqta qaica ca qadasouaxashichi. 12Cha'ayi can settapiguiñi aso ÿide, qalaq sa ishit da ÿapacteec da icouennataxac da huo'otaq tatapigui yi iuel cam shiÿaxaua mayi i'ot ca sa ÿaÿamaxañi, huo'otaq cam huo'o ca qai'otec. Chaqdata da ñishitaique da yaqto' qauaÿajñi de'eda qadhuogoqoi souaxat da shinaqta. Qaq damayi ÿauaachigui ñi Dios. 13Qaq ÿoqo'oyi qomi' ÿataqta huo'o da qan'añaqchitaguec.
Qalaxayi sa ishit da chaqdata de'eda qan'añaqchitaguec mayi saconaxaguet. Cha'ayi can ñauanaxai' so Tito, nachi ÿapacteec da qantonaxac, souaxat somayi da ÿataqta machiguiñi, qataq souaxat qami' da ÿataqta qautauañi somayi, da yaqto' sa ishit da huo'o ca tatapigui yi lauel. 14Qaq sa ishit da huo'otaq ñi'aloxootac can shiitega so Tito da aÿim ÿataqta huo'o da ñitonaxac souaxat da qoñiita. Chaqdata da 'enauac nam qami' sa'axataxama ÿataqta 'eesoda. Qaq nachi 'en'am da qad'aqtac can shinaqtega so Tito ÿataqta 'eesa da qomi' samaqchiguiñi souaxat da qoñiita. 15Qaq somayi ÿataqta ÿacteec da lauotaxanaqtaic da qoñiita naxa da tachigui lauel da qoñiitec da qadalaxayiqui, qataq da 'eetec da qadqochoqoi co'ollaq qauacoñiiguet, qataq huo'o da qadcolanqai. 16Qaq huo'o da ñitonaxac, souaxat da ÿataqta huo'o da ñaquitaxac da qoñiita.
Currently Selected:
2 Corintios 7: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
