Tsiqeeq 38
38
Tsiq eeq 38
Haq aoq nl nail gaq nail geeqlaoq hal daoq
Daq bhil nail daoqsel. Noeq kev noeq moel daoqsel.
1Heeqphaq Miqyail-ol
neema phail khi ngaq bhai thaq khaq lavq.
Neema bhao khi ngaq bhai
thaq khoeq thaq jiovq lavq.
2Naoq nail heeqnav maq tsoe bev tsaoq lavq khi
ngaq bhai khoeq lavq jiovq lavq ail nial.
3Naol neema phail dee dee nail bhaq da nee
ngaq nail aqmaol oil nail phaq maq aol-aoq nial.
Ngaq-i mail nl-a nail oeqbal bhaq da nee
ngaq nail haqeeq haq lao nal dee dee ail nial.
4Oeqbal mao nail uqhuq deq pheeq lal khi
maq daq tsaol dai, aqliq liq dee dee ail nial.
5Ngal yaq jaoq khe-ai
oeqbal nl-a nail ngel-i mail
ngaq nail mal yal bheel bheel khi aqnil nil ail nial.
6Ngal kaol ceevq bhil khu lu-ai
nal dee dee khi maq thul tsaol dai
teevq n n lao ya nioil kivq ail nial.
7Aqjiovq bhai aqphil aqlaol laol khi
ngaq nail aqmaol oil nail phaq maq aol-aoq nial.
8Ngaq nail aqmaol maq luv maq lav.
Aq khoi aq loi dai ga khi
neema haq aoq nl nail ngel-i mail
maq gul dai maq jeeq thaiq tsaol-il.
9Heeqphaq Miqyail-ol
ngal khal loq nail phaq iqsanl bhai
naol heeq nia nail ngaol.
Ngaq-i mail meel nail aqthel iqsanl bhai
naol ya gaiq thail thaiq nail ngaol.
10Neema gov thaoq thaoq dee dee khi
gaq teevq peivq ail maq aol dai
maivneev aqbhaq bhai
maq moel haol lal-aoq nial.
11Mal yal daol nail ngel-i mail
ngaq nail aqtsaoq juq
aqjail bhai maq lal tseq ail
ngaq nail ilkhaiq tavq nail juq iqsanl
eqyal bhai jaol nail ngaol.
12Ngaq bhai heivq movq nail juq
ngaq nail sivtavq bhai lavq phee khail nail ngaol.
Ngaq bhai lav haq movq nail juq
lav luq lav seil nail daoq ge khi
goiqbhaoq bhaoq nail lavqkhoel nee
maq meeq nail phaq nl lavq nail dai
lainq-ai thaq nail ngaol.
13Ngal neq, naq khaol maq gaiq nia nail naq thaoq
teevq gaq khe-ai dul khi
moeqthaoq daoq maq ge dov nia nail yaq jaoq
teevq gaq khe-ai, dul nail ngaol.
14Al heel ngel-i mail
naq khaol maq gaiq kivq nail tsaol-aq pevq lal khi
maq ge maq thail kovq kivq nail
tsaol-aq khe-ai dul nail ngaol.
15Thail hai ngaol-aoq, Heeqphaq Miqyail-ol
ngal naoq bhai noeq thunq nail ngaol.
Ngaq nail Heeqphaq Miqyail-ol
ngaq-i mail hal nail daoq bhai ge kovq lavq yaoq.
16"Ngal phaq thiq thiq ail-u phao
ngaq bhai neejiav jiav nail juq
ngal haq thail thaiq nail bhai
khaoqsail he khi thaq bhi hel sil lavq" dai
ngal hal nail ngaol.
17Nal goel jeeq nail maq gaq lai dai
miltsaq bhai ga tsuq ail nail kev lal-aoq nial.
18Ngaq nail oeqbal ge dov nail ngaol.
Ngaq-i mail nl laiq-a nail phaq bhai
neema maq sal-il.
19Ngal maq laiq nail bhai
ngaq bhai neejiav jiav nail juq
gaq kav dee dee khi
ngal maq bheeq nail bhai bhe nail tsaol-aq
mao dee dee nail ngaol.
20Ngal aqmeeq phaq nl nail ngel-i mail
aqmeeq phaq bhai aqdoil phaq-i mail
khaoq lavq-a nail juq
ngaq bhai neejiav jiav nail juq pevq nail ngaol.
21Heeqphaq Miqyail-ol
ngaq bhai thaq khaonq ha lavq.
Ngaq nail Miqyail-ol
ngaq-ai nee eqyal bha thaq jaol lavq.
22Heeqphaq Miqyail-ol
ngaq bhai hevq kovq lavq-a nail gaq-ol
lavqtsail mail tsao jao-ai lee lavq yaoq.
Currently Selected:
Tsiqeeq 38: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
