Tsiqeeq 37
37
Tsiq eeq 37
Tsaq nail daol nail tsaol-aq khi haqeiv nail tsaol-aq nail daoq loi loi lai duq
Daq bhil nail daoqsel
1Naol haqeiv nail juq nail haqbhoil
khaoq thaq laol.
Laiq nail tsa nail phaq nl nail juq bhai
neekhaol thaq jiav.
2Khul khi mail dai ngal-aq neq
aqyu juq neq, teevq pov taivq-ail
pavq leivq pavq khuq khe-ai, gee lai gil khi
moeqgaq khe-ai, sil gil nail ngaol.
3Naol Heeqphaq Miqyail bhai
neema thaq tsaol khi
aqmeeq phaq bhai nl yaoq hal yaoq.
Al hai nl haq neq
naol milkhaoq niil khaoq bhai ya jaol khi
nee sal ovq nail lavqkhoel ya doevq nail ngaol.
4Heeqphaq Miqyail nail lavqkhoel bhai
lavqkhiq tsail yaoq.
Naol khal loq nail yaoq phaq yaoq-ao nee
aivq naoq bhai bivq lavq nail ngaol.
5Naoq-i mail doevq nail jaol nail iqsanl mail
Heeqphaq Miqyail bhai av bhiq yaoq.
Aivq bhai neema thaq tsaol khi doevq haq neq
aivq naoq nail haqbhoil tsao jao-ai lavq nail ngaol.
6Naoq-i mail oeqbal maq aol nail phaq neq
nqhao khe aqbhaq khe-ai, bhi bhaq nail ngaol.
Naoq nail tsaq nail daol nail phaq iqsanl
n-gaol khe aqbhaq khe-ai, bhi dov lal nail ngaol.
7Naol Heeqphaq Miqyail nail sivtavq bhai
neema heelma ma dai thaq khi
aq tsi tsu dai daonq yaoq.
Yu doevq jaq nail bhai khaoq thaq laol.
Haq eiv nail phaq nl nail bhai neekhaol thaq jiav.
8Neema phail nail phaq liv ha khi
neema bhao nail phaq lav phal yaoq.
Khaoq laol nail phaq thaq bhi aol.
Naoq bhai lav haq nail phaq teevq-eel ngaol.
9Khul khi mail dai ngal-aq neq
haqeiv nail tsaol-aq
bhi lav luq bhi lav seil nail ngaol.
Thail hai ngaol-aoq
Heeqphaq Miqyail bhai noeq thunq nail juq neq
milkhaoq jaiq bhoil ovq nail ngaol.
10Aq yanq teevq yanq lal yanq nail lavqkhoel
haqeiv nail tsaol-aq peivq gil ail nail ngaol.
Aqyu juq bhai naol hal pov doi khi ngaol-aoq
ail duq lal duq maq heeq kivq yaoq-aol.
11Thail hai ngaol-aoq
neema nee nuq nee beiv aol nail juq neq
milkhaoq jaiq bhoil ovq nail lavqkhoel
nee sal ovq khi lavqkhiq tsail dee dee nail ngaol.
12Tsaq nail daol nail juq bhai
aqdoil nl nail dai khi
haqeiv nail juq maoq bhaoq nl khi
haoq gil keivq nail ngaol.
13Thail hai ngaol-aoq, Heeqphaq Miqyail neq
haqeiv nail tsaol-aq juq bhai
hel sil bhiq nail ngaol.
Aqyu juq cov ail nail aq n
kev lee aiq naol dai
aivq heeq nia nail ngaol.
14Tsaq nail daol nail tsaol-aq juq bhai heivq khi
haq yaq aoq yaq juq bhai neq
bhi gaq tsuq ail nail dai khi
haqeiv nail tsaol-aq juq
thaoma gaol dov-a nail nee ovqtavq
heeqnav he thao khi lainq-ai thaq nail ngaol.
15Thail hai ngaol-aoq, yovqgavq nail thaoma-i mail
yovqgavq nail neema coev pav khi
heeqnav khoi ail loi ail gil nail ngaol.
16Haq eiv nail juq nail
phul heel ildaoq maoqgaiq neq
tsaq nail daol nail juq-i mail
micil jiav nail nail ee dai, maq thaoq-ail.
17Khul khi mail dai ngal-aq neq
haqeiv nail juq nail bhaqaoq
oil kovq bhiq nail ngaol.
Thail hai ngaol-aoq
Heeqphaq Miqyail tsaq nail daol nail juq bhai
ivq dao dai, bhi thul phaol nail ngaol.
18Heeqphaq Miqyail neq
tsaol meeq juq nail aqn aqyanq bhai heeq nia khi
aqyu juq nail jaiq bhoil
nqmaq maqluv halyeel bhi ivq nail ngaol.
19Haq eiv nail aqyanq kev lee khi ngaol-aoq
aqyu juq maq ya haq sil dai
moevq nail sivq nail aqn kev lee khi ngaol-aoq
maq jaq gil tsaol dai, jiav nail ngaol.
20Thail hai ngaol-aoq
haqeiv nail juq neq, ya luq ya seil nail ngaol.
Heeqphaq Miqyail bhai neejiav jiav nail juq
aqeiv khe-ai, ya ga kha-ail khi
miq khoiq khe-ai, ya peivq ail nail ngaol.
21Haq eiv nail juq yu bhai
phal jaq phal daol-u phao
bivq kovq khaoq kovq nail maq bhao-ail.
Thail hai ngaol-aoq
tsaq nail daol nail juq neq
neema kev khi bivq nail ngaol.
22Heeqphaq Miqyail-i mail
geeqlaoq bivq nail tsaol-aq juq neq
milkhaoq jaiq bhoil ovq nail ngaol.
Thail hai ngaol-aoq
aivq-i mail geeqlaoq aqdoil bivq nail juq neq
the ha nail bhai ya daq nail ngaol.
23Tsaol meeq juq-i mail tsao nail phaq khao neq
Heeqphaq Miqyail nail aqlavq bhai jiav khi
aqyu juq-i mail tsao nail gailkhaol bhai
aivq neema tsaq nail ngaol.
24Aqyu juq phaq thiq thiq khi ngaol-aoq
maq ya ga tsuq ail dai
Heeqphaq Miqyail he thaiq bhiq nail ngaol.
25Ngaq nail teevq yeel
joiqmaoq doevq maol leevq-a nail ngaol.
Thail hai ngaol-aoq
tsaq nail daol nail juq bhai
Heeqphaq Miqyail-i mail khaonq ha nail
maq moel dai haq-al.
Aqyu juq nail yaq juq aoq yav hal jaq nail iqsanl
maq moel daiq haq-al.
26Aqyu juq khaq mao iqsanl
yu bhai tsao jao-ai khi aqnieivq ail bivq nail ngaol.
Aqyu juq nail yaq juq iqsanl
aqyu juq nail haqbhoil geeqlaoq pevq nail ngaol.
27Haq eiv nail phaq bhai khaonq ha khi
aqmeeq phaq nl yaoq.
Al hai nl haq neq, nqmaq maqluv halyeel
milkhaoq niil khaoq bhai ya jaol nail ngaol.
28Khul khi mail dai ngal-aq
Heeqphaq Miqyail neq
tsaq nail daol nail phaq bhai gaiq-a khi
tsaq nail daol nail juq bhai
khaonq ha nail maq bhao-ail.
Aivq aqyu juq bhai khaq mao iqsanl
hel daiq phail bhiq nail ngaol.
Thail hai ngaol-aoq
haqeiv nail tsaol-aq juq nail
aqjievq lilheel bhai neq
khaonq ha bhiq nail ngaol.
29Tsaq nail daol nail tsaol-aq juq bhai
milkhaoq ovq khi
nqmaq maqluv halyeel ya jaol nail ngaol.
30Aqyu juq nail moeqthaoq nee
neenoeq neekha aol nail daoq dov lee khi
moevqlal nee khal ge nail daoq juq iqsanl
tsaq nail daol nail daoq pevq nail ngaol.
31Aqyu juq neq, Miqyail nail aolthaq kovqthaq
neema lavqkhoel bhai aol nail ngel-i mail
phaq khao khao laiq nail maq bhao-ail.
32Haq eiv nail tsaol-aq juq neq
tsaol meeq juq bhai heivq nail dai khi
naoq jaoq nail ngaol.
33Thail hai ngaol-aoq
Heeqphaq Miqyail neq
tsaq nail daol nail tsaol-aq juq bhai
haqeiv nail juq nail aqlavq lavqkhoel-ai
maq khaonq ha bhiq-ail.
Yalkhaq dal nail phaq kev lee-u phao
oeqbal maq aol ail dai
bhaq laoq kheq dai, bhi dov lal nail ngaol.
34Heeqphaq Miqyail bhai noeq thunq khi
aivq nail gailkhaol bhai tsao yaoq.
Al hai tsao haq neq
aivq naoq bhai thaq eeq thaq heel nail lavqkhoel nee
milkhaoq bivq lavq nail nee ovqtavq
haqeiv nail tsaol-aq juq luq ail seil ail nail bhai
naol ya moel nail ngaol.
35Miltsaq aqmeeq bhai doevq nail
aqbhaol bhaol ma uv thaiq nail khe-ai
yu bhai kav jaq nail
haqeiv nail tsaol-aq teevq gaq bhai
ngal moel daiq-a nail ngaol.
36Thail hai ngaol-aoq, teevq pov taivq-ail
aivq peivq ail khi, maq jaol yaoq-aol.
Ngal aivq bhai hal pov doi gil khi ngaol-aoq
maq moel-al.
37Tsaol meeq juq bhai hel daiq khi
daol coev dai doevq nail juq bhai saol oil yaoq.
Tsaq lai jil lai nail tsaol-aq juq neq
geeqlaoq bhao nail doevqyeel pevq nail ngaol.
38Thail hai ngaol-aoq
oeqbal nl nail tsaol-aq juq iqsanl mail
ya luq ya seil ail khi
geeqlaoq aqdoil ya nail ngaol.
39Tsaq nail daol nail tsaol-aq juq bhai
Heeqphaq Miqyail hevq kovq bhiq khi
haq nail aoq nail phaq kev lee-u phao
aivq aqyu juq nail haqbhoil juq duq pevq nail ngaol.
40Aivq aqyu juq bhai tsao jao-ai bhiq khi
hevq kovq bhiq nail ngaol.
Aivq bhai juq nail ngel-i mail
haqeiv nail juq nail
aqlavq lavqkhoel nee iqsanl
aivq hevq kovq dov bhiq nail ngaol.
Currently Selected:
Tsiqeeq 37: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
