Gaqkhoel 26

Heeqphaq Aqgilpav nail sivtavq bhai Paolluv daoq ge-a nail ganl

1Aqgilpav Paolluv bhai ge bhiq-a nail: “Naoq nail ganl naol ge nail ya nail ngaol” dai, ge bhiq-a nail ngaol. Aq-u phao, Paolluv aqlavq gaol tsaoq khi, aivq laiq nail phaq maq aol nail ganl niail hai ge nail ngaol: 2“Heeqphaq Aqgilpav-ol, Yuldav nail tsaol-aq-i mail ngaq bhai oeqbal khal thaq nail yaoq phaq yaoq-ao nee bhai, yaq n n-gaol naoq nail sivtavq bhai ngal ya ge kovq bhiq nail niil neq, ngaq nail haqbhoil geeqlaoq eeq nail teevq phaq ngaol dai, ngal noeq nail ngaol. 3Khul khi mail dai ngal-aq neq, Yuldav nail tsaol-aq nail aolsaolkovq khi aqyu juq teevq yanq maqkhaiq dai jil pheel jaq nail ganl bhai, naol aqmeeq-ai heeq nia nail ngaol. Al heel ngel-i mail, neema heelma ma dai thaq khi, ngal ge nail bhai teevq pov nal daiq lavq yaoq dai, ngal hal nail ngaol” dai, ge bhiq-a nail ngaol.

Paolluv aivq Phaq liq sail jiovq daiq-a nail ganl ge bhiq-a nail

4Paolluv gaoq ge nail: “Ngal yaqnoil ail jiav-u phao nee, ngaq nail jeq-e jaq-a nail lavqkhoel bhai maqkhaiq, Yeiqlulsaqlaiq meenq lavqkhoel bhai maqkhaiq, ngaq-i mail aqdoevq doevq-a nail ganl, Yuldav nail tsaol-aq iqsanl mail heeq nia nail ngaol. 5Aqyu juq ge dov movq ail nul neq, ngadao juq nail uqhuq thaoq nail aolsaolkovq nail lavqkhoel, yu nee mail maq tsil aolsaolkovq bhai tsao the bhee dee dee nail munl pevq nail, Phaq liq sail nail munl lavqkhoel bhai, iqmoeq-u nee ngal aol nail bhai, aqyu juq heeq nia nail ngaol. 6Niil aq-il ngal niai yalkhaq dal nail bhai ya daq thail thaiq nail niil neq, ngadao nail aqphiq aqbhal juq bhai, Miqyail-i mail jaq-ai thaq nail daoqma saljial bhai ngal noeq thunq nail bhaq da nee, ya daq nail phaq pevq nail ngaol. 7Nv juq nail jeq-e tsel-nvq jeq-e nqkiv n-gaol maqkhaiq, lai jai lai jai ail Miqyail bhai uqhuq thaoq nail lavqkhoel, daoqma saljial al bhai ya dai, noeq thunq nail ngaol. Heeqphaq-ol, ngal iqsanl al hai noeq thunq nail bhaq da nee, Yuldav nail tsaol-aq ngaq nail kovtavq bhai oeqbal thaq nail ngaol. 8Miqyail neq, sil nail tsaol-aq bhai bhi doevq kovq lal nia nail ngaol. Khul khi mail, nul juq niil niai neema maq thaq tsaol nail-aiq” dai, ge bhiq-a nail ngaol.

Paolluv aivq Khali ya juq bhai khoeq bhiq jiovq bhiq daiq-a nail ganl ge bhiq nail

9Paolluv gaoq ge nail: “Naq saq lail tsaol-aq Yeiqsul nail aqmil bhai lav tsoiq dai, mee nia phaq nl nail neq, tsaq nail ngaol dai, ngal noeq daiq-a nail ngaol. 10Yeiqlulsaqlaiq meenq lavqkhoel bhai, ngal al hai nl daiq-a nail ngaol. Philma juq bhai aqkhaoq-anq hal ya khi, Khali yaq mao dai gaq bhai nieivq khi, thaonq bhai laol-a nail ngaol. ‘Aqyu juq bhai deeq heivq nail tsaq naol laiq’ dai, yu nal daiq-u phao, ngal iqsanl, aqlavq bavq dil-a nail ngaol. 11Uqhuq thaoq nail ilkhaol juq nail lavqkhoel bhai ngal aqyu juq bhai mee nia pov khoeq bhiq jiovq bhiq khi, aqyu juq Yeiqsul bhai khal ge movq ail ge dai, ngal lai jai daiq-a nail ngaol. Ngal neema phail dee dee nail ngel-i mail, yu nail milkhaoq bha jiav nail meenq juq bhai kev dai, lai lai ail khi aqyu juq bhai khoeq bhiq jiovq bhiq-a nail ngaol” dai, ge bhiq-a nail ngaol.

Paolluv aivq Khali yaq pevq lal-a nail ganl ge bhiq-a nail

12Paolluv gaoq ge nail: “Ngal al hai nl lai nail haqbhoil, Philma juq bhai aqkhaoq-anq hal khi, Daq maqsail meenq bhai ngal lai-a nail ngaol. 13Aq-u phao, heeqphaq-ol, gail phail bhai n-gaol gaol kavkav lee-u phao, nqtavq nee mail nlma nee maq tsil kav nail aqbhaq, ngal khi ngaq-ai nee mail ail thail thaiq nail juq bhai teevq jaoq bha lee-a nail bhai, ngal ya moel-a nail ngaol. 14Nv juq iqsanl mail, bavq tsuq ail-a nail ngaol. Aq-u phao, Heiqbhail daoq nee mail niail hai ge nail bhai ngal ya gaiq-a nail ngaol: ‘Saol luv-ol, Saol luv-ol, khul khi mail naol ngaq bhai khoeq lavq jiovq lavq nail-aiq. Niaoqnel bhai coev nail khaoltsoe bhai naol thoel nail neq, naol ya nal ail teevq-eel ngaol’ dai, ge lavq-a nail ngaol.

15‘Heeqphaq-ol, naol khaq sil gaq’ dai, ngal nal daiq-u phao, ‘Ngal neq, naoq-i mail khoeq lavq jiovq lavq thail thaiq nail Yeiqsul ngaol’ dai, aivq ge lavq-a nail ngaol. 16Yeiqsul ngaq bhai gaoq ge nail: ‘Thul khi daol coev dai, thul phaol yaoq. Naoq bhai ngaq nail ganl bhi nl khi, salkhil bhiq khanq nail dai, ngaq-i mail tsel dov-ai thaq nail ngel-i mail, naoq nail sivtavq bhai ngal dov lee-a nail ngaol. Yaq n n-gaol naol ngaq bhai ya moel-a nail ganl niil khi, yaqhao ngaq-i mail naoq bhai bhi moel nail ganl juq bhai, naol yu bhai salkhil ya khanq bhiq nail ngaol. 17Yu nail jeq-e jaq-a khi Yuldav nail tsaol-aq nail aqlavq lavqkhoel nee, ngal naoq bhai bhi jel-ail naol. Al ovqtavq, ngal naoq bhai yu nail jeq-e jaq-a jaol nail bha khoel gai aivq naol. 18Aqyu juq maivneev moel lal khi, aqnav nail lavqkhoel nee, aqbhaq bhaq nail bha aol lal nail nee ovqtavq, neivq Saq daq nail bhaqaoq lavqkhoel nee Miqyail jaol nail phao kovq lal dai, ngal naoq bhai khoel gai aivq nail ngaol. Al heel ngel-i mail, Miqyail aqyu juq nail oeqbal phaiq bhiq khi, ngaq bhai neema thaq tsaol nail lavqkhoel nee, Miqyail aqyu juq bhai aivq nail tsaol-aq bhi pevq lal naol’ dai, ge lavq-a nail ngaol.”

Paolluv aivq-i mail ganl nl-a nail ganl ge nail

19Paolluv gaoq ge nail: “Al heel ngel-i mail heeqphaq Aqgilpav-ol, nqtavq kovtavq nee lee-a nail Yeiqsul-i mail aqhaqlal lavqkhoel nee bhiq heeq bhiq moel lavq-a nail juq bhai, ngal maq nal daiq ail, khul maq khi kivq-ail. 20Iqmoeq Daq maqsail meenq bhai jaol nail juq bhai maqkhaiq, haoqnao Yeiqlulsaqlaiq meenq khi Yuldav milkhaoq khaoq lao bhai jaol nail juq bhai maqkhaiq, yu nail jeq-e jaq-a bhai maqkhaiq, ngal cavq-a nail ngaol. ‘Nul juq oeqbal noeq pov khi, Miqyail jaol nail phao kovq lal yaoq. Nul juq oeqbal noeq pov aoq thaq nial dai, yu heeq nia dai doevq yaoq’ dai, ngal cavq bhiq-a nail ngaol. 21Al heel ngel-i mail, uqhuq thaoq nail ilkhaol il ma bhai Yuldav nail tsaol-aq ngaq bhai nieivq khi, deeq heivq nail dai, lai jai nail ngaol. 22Thail hai ngaol-aoq, yaq n n-gaol kev dai, Miqyail ngaq bhai tsao jao-ai lavq nail ngel-i mail, niai thul phaol khi, eeq yaq nil yaq nii dai nail gaiqlaq bhai salkhil ya khanq nail ngaol. Niil aq-il ngaq-i mail ge thail thaiq nail ganl niil neq, Miqyail nail haqbhoil ge dan nail juq khi mail Maolseiq-i mail niail hai pevq lal nail ngaol dai, ge thaq ail ceevq-a nail ganl al ganl nee teevq phaq ngaol. 23Aqyu juq niail hai ge-ai thaq nail ngaol: ‘Khali neq, ya sil khi, sil nail lavqkhoel nee iqmoeq ilmoeq doevq kovq lal nail gaq pevq khi, Yuldav nail tsaol-aq khi, yu nail jeq-e jaq-a bhai aqbhaq nail ganl aivq cavq bhiq nail ngaol’ ” dai, Paolluv ge bhiq-a nail ngaol.

Aqgilpav Yeiqsul bhai neema thaq tsaol lal dai, Paolluv cavq bhiq-a nail ganl

24Paolluv al hai ge kovq bhiq thail thaiq-u phao, Bheiqthul ge nail: “Paolluv-ol, naol neq, naiquq uq ail-aoq thaq nail ngaol. Naol haoqgavq mao dai saol thaq nail ngel-i mail, uq ail-aoq thaq nail niil” dai, mail ma-ail ge nail ngaol.

25Paolluv ge nail: “Heeqphaq Bheiqthul-ol, ngal naiquq maq ngel-ail. Ngal aqmeeq-ai saol-nvq saol-nvq ail mal dil ngel nail phaq bhai, ngal ge thail thaiq nail ngaol. 26Heeqphaq Aqgilpav, aivq ganl niil juq heeq nia nail ngel-i mail, aivq nail sivtavq bhai daol coev dai, ngal ge tseq naol. Ganl niil neq, bhallal bhai pevq lal-a nail maq ngel nail ngel-i mail, yaoq phaq yaoq-ao nee aivq heeq gil nia nail ngaol dai, ngal ge tseq nail ngaol. 27Heeqphaq Aqgilpav-ol, Miqyail nail haqbhoil ge dan nail juq bhai naol neema thaq tsaol naol laiq. Naol neema thaq tsaol nail ngaol dai, ngal heeq kivq naol” dai, ge bhiq-a nail ngaol.

28Aqgilpav Paolluv bhai ge bhiq-a nail: “Aq yanq nii dai nail lavqkhoel nee, ngal Khali yaq pevq lal dai, naol nl kivq nail dai, noeq nail laiq” dai, ge bhiq-a nail ngaol.

29“Aq yanq teevq yanq nail lavqkhoel bhai maqkhaiq, mao dai nail lavqkhoel bhai maqkhaiq, naol khi yaq n n-gaol ngaq nail daoq bhai ya gaiq thail thaiq nail tsaol-aq iqsanl mail, hailcav pheethaiq-ai thaq nail niil maq ngel nail neq, ngaq-ai khe-ai dul lal dai, ngal Miqyail bhai geeqlaoq hal nail ngaol” dai, Paolluv ge kovq bhiq-a nail ngaol.

30A bhai nee ngal-aq, heeqphaq Aqgilpav maqkhaiq, heeqphaq Bheiqthul maqkhaiq, Bheiqlaq nil maqkhaiq, aqyu juq nee mail khal jaol deel-nvq thaq nail juq maqkhaiq, kovq-ail nail khi thul gil lal-a nail ngaol. 31Aqyu juq dov lee khi teevq gaq nee teevq gaq ge nail: “Tsaol-aq niil gaq bhai heivq heeqphaq ail, maq ngel haq neq, thaonq bhai laol heeq phaq-ail nl laiq thaq nail teevq phaq iqsanl, maq jiav lao thaq-il laq” dai, ge nail ngaol.

32Aqgilpav Bheiqthul bhai ge bhiq-a nail: “Tsaol-aq niil gaq, heeqphaq Gailsaq-i mail yalkhaq bhi dal ail lavq yaoq dai, maq hal-ai thaq-al nul neq, aivq bhai phaiq bhiq kivq lao thaq nial” dai, ge bhiq-a nail ngaol.

Currently Selected:

Gaqkhoel 26: aeu

Highlight

Copy

Compare