Gaqkhoel 27

Paolluv laovq jeeq khi Lolmav meenq bha lai-a nail ganl

1Nv juq bhai Iqtaq liq milkhaoq bhai bhi ail nail dai, ge ceiv gaq-u phao, Paolluv khi thaonq bhai laol-ai thaq nail tsaol-aq yaoq juq yaoq bhai iqsanl, genl dev nail teevq ya gaq nail aqivq Yulluv dai, mil-ai thaq nail gaq nail aqlavq lavqkhoel bhai av bhiq-a nail ngaol. Yulluv neq, Aol gul tuv genl mavq dai khul nail Lolmav genl dev nail munl teevq munl bhai aol nail ngaol. 2Aq sil-aq milkhaoq lavqkhoel khe, iqyaq iqma daol jail bhai jiav nail meenq juq bhai ail nail dai, ge-i mail, nv juq Aqdaqmuldil meenq bhai jaol nail tsaol-aq nail laovq jeeq-a nail ngaol. Maqgeiqdaolnil milkhaoq bhai jiav nail Theilsaqlolni meenq bhai jaol nail, Aqliqdaqgul iqsanl nv juq nee mail jeeq jaol nail ngaol.

3Yaoq n yaoq, nv juq Sildoq meenq bhai ail kev-a nail ngaol. Yulluv daiq khul nail aqivq al gaq Paolluv bhai gaoq haq nail ngel-i mail, aqtsaoq juq bhai thaoq phuq lai khi, khal loq nail phaq bhi bivq nail haqbhoil, Paolluv bhai aqyanq bivq-a nail ngaol. 4Nv juq a bhai nee dov ail-u phao, lilmoel bhoe nail phaoq maq tsaq nail ngel-i mail, Gulbhaqlul eel jaol laol-n bhai juq khi, lilmoel maq yao nail phao nee laovq jeeq khi ail-a nail ngaol. 5Gillilciv milkhaoq khi Paq bhullil milkhaoq nail aqjail bhai jiav nail iqyaq iqma nee ail pav khi, Lulsil milkhaoq bhai jiav nail Muqlal meenq bhai ail kev-a nail ngaol. 6A bhai ail kev-u phao, Aqleiqsaqdul meenq nee lee khi, Iqtaq liq milkhaoq bha lai nail laovq teevq laovq bhai aqivq al gaq hal pov moel khi, nv juq bhai bhi jeeq lavq-a nail ngaol. 7Nv juq aqya ya dai, mee nia n haqhaq-ai ail khi, Gaq nil meenq nail aqjail bhai, ail kev-a nail ngaol. Thail hai ngaol-aoq, lilmoel bhoe nail phaoq maq tsaq nail ngel-i mail, nv juq iqmoeq phao maq ail kivq ail, Gaqlaqdeiq eel jaol laol-n bhai juq khi, lilmoel maq yao nail, Saqmoqneiq meenq phao nee ail-a nail ngaol. 8Nv juq haq dee dee nail lavqkhoel nee, eel jaol laol-n al nail aqjail bhai ail khi, Laqsail meenq nail aqjail bhai, mao ail meeq nail naq duq dai khul nail bhai ail kev-a nail ngaol.

9Nv juq a bhai al jaiq jaol maoq jel khi, iqmoeq phao gailkhaol dov-ail nail haqbhoil ya gee sil nail aqyanq kev lee-aoq nail ngaol. Khul khi mail dai ngal-aq neq, maq jaq nail aol nl nail aqyanq jel ail-aoq nail ngaol. #Aq yanq al neq, nqjaiq lilmoel al jaiq-ail jiav nail ngel-i mail, laovq jeeq khi gailkhaol dov-ail nail haq dee dee nail yanq ngaol. Al heel ngel-i mail, Paolluv aqyu juq bhai niail hai ge bhiq-a nail ngaol: 10“Aq tsaoq juq-ol, niil aq-il laovq jeeq khi ail haq neq, laovq khi yalkav taivq-ail ya luq ya seil ail nail maq ngel-ail. Ngadao iqsanl ya sil nail ngaol dai, ngal heeq kivq nail ngaol. Al heel ngel-i mail, yaol phaol yaoq” dai, ge bhiq-a nail ngaol. 11Thail hai ngaol-aoq, genl dev teevq yal gaq nail aqivq al gaq, Paolluv nail daoq nal daiq nail nee maq tsil, laovq e nail gaq khi, laovq nail aqheel gaq nail daoq bhai, nal daiq nail ngaol. 12Aqcoevq coevq nail yanq bhai naq duq al dao bhai, maq jaol meeq nail ngel-i mail, a bhai nee dov-ail khi, khi kivq haq neq, Philnil meenq bhai jiav nail laovq naq duq bhai ail kev khi, aq coevq coevq nail yanq jel ail-u kev dai, a bhai jaol naol dai, tsaol-aq mao dai teevq pav neema tsaq nail ngaol. Philnil meenq neq, Gaqlaqdeiq eel jaol laol-n bhai jiav nail ngaol. A bhai jiav nail laovq naq duq al duq neq, nlma dov khoeq nail pultavq phao khi nlma dov khoeq nail pul-nvq phao phaoq nail ngaol.

Iqyaq iqma nail lavqkhoel bhai lilmoel lil ma bhoe lal-a nail ganl

13Pul-nvq phao nee bhoel lavq nail lilmoel al, aqya ya dai, bhoel lavq nail ngaol. “Nv juq-i mail noeq thunq-ai thaq nail khe-ai pevq lal-aoq nail ngaol” dai, aqyu juq noeq nail ngaol. Al heel ngel-i mail, hail khulu he dov khi, Gaqlaqdeiq eel jaol laol-n nail aqjail bhai ail-a nail ngaol. 14Thail hai ngaol-aoq, mao ail maq maoq lal mail, daoltavq phao khe lilmoel lil ma nlma dov khoeq nail pultavq phao nee mail, lilmoel bhoe leevq-a nail ngaol. 15Lil moel lil ma al, laovq bhai tsiqthaoq lee-u phao, laovq maq khanq tsaol dai pevq lal-a nail ngaol. Al heel ngel-i mail, nv juq laovq bhai aivq bhai aivq bhi ail khi, lilmoel khal bhoe nail phao ail-a nail ngaol. 16Gaqlaoldeiq dai khul nail eel jaol laol-n laol yaq bhai juq khi lilmoel maq yao nail phao nee ail thail thaiq-u phao, laovq laovq yaq maq ya luq maq ya seil ail dai, lai jai dee dee-a nail lavqkhoel nee, laovq laovq ma nail kovtavq bhai he dav-ai thaq nail ngaol. 17Laovq laovq ma maq ya pav ail dai, aqyu juq neeqtsaq oil khi, aqmeeq-ai pheethaiq-a nail ngaol. Aq-u phao, Sultiv dai khul nail, iqyaq iqma nail lavqkhoel bhai jiav nail tsalhail bhai laovq tsiq thaoq ail nail khul-il dai, aqyu juq gee sil nail ngel-i mail, haqphal keiv ma al he kha khi, laovq bhai lilmoel khal bhoe nail phao bhi ail-a nail ngaol. 18Lil moel lil ma al maq naq lai dai bhoe khi, laovq al jaiq-ail tsaoq thoiq tsaoq dav ail pevq lal-a nail ngel-i mail, yaoq n yaoq laovq lavqkhoel bhai thaonq thaq nail yalkav teevq pav ga nav juq bhai, aqyu juq bavq ha-a nail ngaol. 19Hail n bhee lal-u phao, laovq nail yalkav bhai iqsanl, aqyu juq yovqgavq nail aqlavq nee mail yovqgavq bavq ha-a nail ngaol. 20Aqn aqyanq maodai, nlma khi aqgil bhai maq ya moel nail nee ovqtavq, lilmoel lil ma iqsanl bhoe nail ngel-i mail, nv juq ya jel-ail naol dai, teevq peivq ail noeq thunq duq, maq jiav-ail.

21Aqyu juq khul teevq phaq iqsanl, maq jaq dai jeeq-a nail, maoq lal-aoq nail ngaol. Aq-u phao, Paolluv aqyu juq nail sivtavq bhai thul phaol lal khi, niail hai ge nail ngaol: “Aq tsaoq juq-ol, nul juq ngal ge nail bhai nal daiq khi, Gaqlaqdeiq eel jaol laol-n nee mail maq dov lee dai jaol-al nul neq, luq ail seil ail nail niil juq bhai maq ya thaoq phuq-ail. 22Thail hai ngaol-aoq, niil aq-il gaq thaq gaoq bhaq dai, ngal nul juq bhai hal nail ngaol. Nul juq teevq gaq iqsanl, maq ya sil-ail. Laovq niil laovq taivq-ail luq ail seil ail nail ngaol. 23Khul khi mail dai ngal-aq neq, ngal uqhuq thaoq nail, ngaq bhai uv thaiq nail Miqyail nail nqtavq gaqkhoel teevq gaq, milkiv ngal jaol nail bha lee khi, niail hai ge lee-a nail ngaol. 24‘Paolluv-ol, thaq gee sil. Heeqphaq Gailsaq nail sivtavq bhai naol ya thul phaol nail ngaol. Naoq-ai nee mail laovq jeeq jaol nail tsaol-aq iqsanl mail, naol bhaq da nee, ya jel-ail naol’ dai, ngaq bhai ge lavq-a nail ngaol. 25Al heel ngel-i mail, aqtsaoq juq-ol, gaq thaq gaoq bhaq. Yaoq. Ngaq bhai ge lavq-a nail khe-ai pevq lal nail ngaol dai, ngal Miqyail bhai neema thaq tsaol naol. 26Thail hai ngaol-aoq, ngadao juq-i mail jeenq thaq nail laovq niil laovq neq, eel jaol laol-n teevq dao bhai ya tsiq thao ail nail ngaol” dai, aqyu juq bhai ge bhiq-a nail ngaol.

Laovq luq ail seil ail-a nail ganl

27Tsel liq n nqkiv, nv juq Aqdillail dai khul nail iqyaq iqma bhai ail thail thaiq nail ngaol. Hul-iq tsil lee-u phao, “Ngadao juq miltsaq teevq tsaol ga nav bhai aqjail jail lee-aoq thaq nail khul-il” dai, laovq lavqkhoel bhai ganl nl nail juq noeq nail ngaol. 28Aqyu juq ulcuvq bhai tsadaiq-u phao, nvq tsel lail navq nail bhai heeq nia-a nail ngaol. Teevq yanq gaoq kev lal-a ngal neq, aqyu juq teevq pov gaoq tsadaiq khi, tsel ngaq lail navq nail bhai heeq nia-a nail ngaol. 29Laovq lovmav bhai thaoq tuv ail nail khul-il dai, aqyu juq gee sil nail ngel-i mail, laovq ivq govq phao hail khulu liq khu phaiq kha khi, “Nq bhaq lavqtsail mail bhaq lal” dai, noeq thunq nail ngaol. 30Laovq lavqkhoel bhai ganl nl nail tsaol-aq juq, laovq bhai khaonq ail ceevq khi tsaoq nail dai, noeq nail ngaol. Al heel ngel-i mail, laovq nail uqhuq phaoq hail khulu phaiq kha nail khe-ai tavq khi, laovq laovq yaq bhai ulcuvq lavqkhoel bhai phaiq khaq thail thaiq nail ngaol. 31Aq-u phao, Paolluv genl dev nail teevq yal gaq nail aqivq gaq khi genl dev nail juq bhai ge bhiq-a nail: “Tsaol-aq niil juq laovq lavqkhoel bhai maq jaol haq neq, nul juq maq ya jel-ail yaoq-aol” dai, ge bhiq-a nail ngaol. 32Aq-u phao, genl dev nail juq laovq laovq yaq al laovq nail neeqtsaq devceiv khi iqyaq iqma bhai liv puvq gai aivq-a nail ngaol.

33Nqbhaq bhaq lal thao, Paolluv aqyu juq iqsanl bhai gaq bivq bivq ail khi ge nail: “Aoq jaq yaoq. Nul juq khul teevq phaq iqsanl maq jaq dai jaol-a nail, yaq n n-gaol tsel liq n bhee lal-aoq nail ngaol. 34Al heel ngel-i mail, jaq yaoq dai, ngal nul juq bhai hal nail ngaol. Jaq haq neq, ya jel-ail nail ngaol. Khul khi mail dai ngal-aq neq, nul juq teevq gaq nail uqhuq tsailkheel teevq kheel iqsanl, maq ya peivq ail” dai, Paolluv aqyu juq bhai ge bhiq-a nail ngaol. 35Al hai ge gaq-al ngal-aq neq, aivq khaqmul oil khi, iqsanl nail sivtavq bhai Miqyail bhai tsiq eeq-a nail ngaol. A bhai nee ngal-aq, khaqmul ngaoqpav khi jaq-a nail ngaol. 36Aq-u phao, aqyu juq iqsanl mail gaq aol jaiq lal khi jaq-a nail ngaol. 37Laovq al laovq bhai jeeq jaol nail tsaol-aq neq, nvq yal sivq tsel kovq gaq bhee nail ngaol. 38Aqyu juq jaq bov gaq khi, laovq aqphai phai lal dai, khal thaonq thaq nail gov tsail iqsanl mail, iqyaq iqma bhai hoel puvq gil-a nail ngaol.

39Nqbhaq bhaq lal-u phao, miltsaq niil khul dao bhai dai, laovq lavqkhoel bhai ganl nl nail juq maq heeq nia-ail. Thail hai ngaol-aoq, tsalhail jiav nail lavqgovq teevq govq ya moel-a nail ngaol. Khi kivq haq neq, lavqgovq al govq bhai laovq el aivq nail dai, aqyu juq noeq nail ngaol. 40Al heel ngel-i mail, hail khulu al juq bhai iqyaq iqma bhai pheel haq ail ceevq-a nail ngaol. Laovq bhai koev phaoq nail daillav juq bhai pheethaiq-ai thaq nail neeqtsaq bhai iqsanl pheel-a nail ngaol. A bhai nee ngal-aq, laovq nail uqhuq phaoq khe haqphal phal ma bhai lilmoel bhoe yao dai, he dav khi, daolbhaq phao laovq el aivq-a nail ngaol. 41Thail hai ngaol-aoq, ulcuvq maq navq nail bhai jiav nail miltsaq phutsu bhai thaoq tsi lai khi, laovq tsiq thaoq lai-a nail ngaol. Laovq nail uqhuq phao thaoqtsaoq-ai thaq nail al, aqthel thel dee dee nail ngel-i mail, laovq teevq peivq ail maq ail jiiv nia-ail. Laovq nail daoqthaoq phao ulcuvq eel khaol mao ail thaoq nail ngel-i mail, laovq pav ail thail thaiq nail ngaol.

42Phee-ai thaq nail tsaol-aq juq, ulcuvq eeldeeq deeq deeq ail tsaoq nail khul-il dai, genl dev nail juq gee sil nail ngel-i mail, aqyu juq bhai deeq heivq bhel dai, maoq bhaoq nl-a nail ngaol. 43Thail hai ngaol-aoq, aqivq al gaq Paolluv bhai bhi jel-ail movq nail ngel-i mail, genl dev nail juq maoq bhaoq nl nail bhai lav tsoiq-a nail ngaol. Aq-u phao, “Ulcuvq eeldeeq deeq nia nail juq bhi tev puvq ail khi, daolbhaq phao bhi deeq dol laivq yaoq” dai, aqivq al gaq daoq bivq-a nail ngaol. 44“Eeldeeq maq deeq nia nail juq neq, dailpav bhai bhi jeeq nail juq bhi jeeq, laovq nail yalkav bhai iqsanl bhi jeeq yaoq” dai, daoq bivq-a nail ngaol. Al heel ngel-i mail, tsaol-aq iqsanl mail jel-ail khi, daolbhaq phao dov kev gil lai-a nail ngaol.

Currently Selected:

Gaqkhoel 27: aeu

Highlight

Copy

Compare