2 Gaolliqthu 10

Paolluv aivq-i mail ganl nl-a nail ganl gevq-a nail

1Ngal neq, Paolluv ngaol. Khali nail nee nuq nee beiv khi mail aivq nail neema meeq dee dee nail lavqkhoel nee, ngal nul juq bhai hal nail ngaol. Nv juq nee mail jaol-u phao, neema nee nuq nee beiv aol khi, nv juq nee mail maq jaol-u phao, gee sil nail neema maq aol ail dai, nul juq-i mail ge nail al gaq ngal ngaol. 2“Aqyu juq neq, aqsivq haqjoil nail haoqnao taivq-ail tsao the nail tsaol-aq ngaol” dai, nv juq bhai saol-nvq lavq nail tsaol-aq bhai gee sil nail neema maq aol dai, nl daiq bhiq naol dai, ngal noeqceiv-ai thaq nail ngaol. Thail hai ngaol-aoq, ngal nul juq jaol nail bha kovq lal-u phao, nii dai dai ail gee sil nail neema aol khi mail maq ya nl daiq bhiq dai, ngal nul juq bhai hal nail ngaol. 3Nv juq neq, miltsaq-ai aqdoevq doevq khi ngaol-aoq, miltsaq bhai tavq nail genl dev nail tsaol-aq genl dev nail khe-ai, nv juq genl dev nail maq ngel-ail. 4Nv juq genl dev-u phao, yuq nail khenkha-ao neq, miltsaq bhai tavq nail maq ngel-ail. Tavq bhai lav cov nail haqbhoil, Miqyail nail bhaqaoq aol nail khenkha-ao ngaol. 5Nv juq neq, jil pheel jaq nail phaq bhai maqkhaiq, Miqyail bhai maq ya heeq nia dai, lav tsoiq nail yaoq phaq yaoq-ao nee bhai maqkhaiq, khaonq ha thail thaiq nail ngaol. Tsaol-aq nail nee noeq iqsanl bhai pheethaiq khi Khali nail daoq bhai taivq-ail bhi nal daiq nail ngaol. 6Nul juq ngaq nail daoq nal daiq khi ngal jaol nail phao aol lal gaq haq neq, maq nal daiq nail juq bhai geel-nvq nail khe-ai, yalkhaq dal bhiq nail ngaol dai, lainq-ai thaq nail ngaol.

7Nul juq neq, miltsaq phao taivq-ail hel daiq nail niil laq. Tsaol-aq teevq gaq ga nav yovqgavq bhai yovqgavq, “Ngal neq, Khali nail tsaol-aq ngaol” dai, saol-nvq haq neq, aivq Khali nail tsaol-aq pevq nail khe-ai nv juq iqsanl Khali nail tsaol-aq ngaol dai, aivq noeq kev heeq phaq-ail tsaq nail ngaol. 8Nul juq bhai bhi eeq bhi heel lal nail dai khi, Heeqphaq Yeiqsul nv juq bhai alyaq bivq lavq-a nail ngaol. Nul juq bhai bhi lav cov nail dai khi, bivq lavq-a nail maq ngel-ail. Al heel ngel-i mail, alyaq niil nail ganl ngal neema eeq eeq ail ge jel khi ngaol-aoq, ngal ya haq sil nail maq ngel-ail. 9Nul juq bhai lav gee sil movq nail niil dai, bhiq noeq movq nail ngel-i mail, ngal haoqgavq niil gevq bhoel-ai lavq-a nail, maq ngel-ail. 10“Paolluv-i mail gevq-a nail haoqgavq neq, bhaqaoq eeq dee dee khi haq dee dee khi ngaol-aoq, aivq nail aqmaol nv juq nee mail jaol-ail nul neq, khul maq ge tseq nail tsaol-aq pevq khi, aivq neq, daoq mao ail maq ge nia-il” dai, tsaol-aq teevq pav ga nav juq ge nail ngaol. 11Nv juq nul juq nee mail maq jaol-u phao, nul juq bhai haoqgavq gevq bhoel-ai leevq-a nail khe-ai, nv juq nul juq nee mail jaol-u phao iqsanl, al hai nl nail ngaol dai, tsaol-aq al juq bhai bhi heeq nia yaoq.

12Yovqgavq nail salkhil yovqgavq khanq nail tsaol-aq nail munl lavqkhoel bhai saol-nvq bhoel nail maqkhaiq, aqyu juq bhai tsiqceiv daiq nail maqkhaiq, nv juq maq nl tseq-ail. Aqyu juq neq, teevq gaq nee teevq gaq tsiqceiv daiq khi, yovqgavq bhai yovqgavq tsiq eeq nail ngel-i mail, neenoeq neekha maq aol nail tsaol-aq ngaol. 13Thail hai ngaol-aoq, nv juq neq, neema eeq eeq ail al jaiq maq ge-ail. Miqyail nv juq bhai ganl bhoil lavq-a nail aqduq al juq bhai taivq-ail neema eeq khi, nv juq nl thail thaiq nail ngaol. Nul juq neq, aivq-i mail nv juq bhai bhi nl lavq-a nail aqduq al juq nail lavqkhoel bhai jaol nail ngaol. 14Miqyail-i mail nv juq bhai bhi nl lavq-a nail aqduq al juq nail lavqkhoel bhai nul juq jaol nail ngel-i mail, nv juq yaoq juq yaoq bhai nl bhoel aivq-a nail maq ngel-ail. Khul khi mail dai ngal-aq neq, Khali nail lavqkhiq tsail nail geeqlaoq daoq nul juq jaol nail bha kev lee dai, iqmoeq ilmoeq cavq lee-a nail juq neq, nv juq ngaol. 15Yu-i mail nl-ai thaq nail ganl bhai nv juq-i mail nl-ai thaq nail khe-ai tavq khi, neema eeq nail lavqkhoel nee ge nail maq ngel. Nul juq neema thaq tsaol nail phaq eeq lal mao lal-a nail khe-ai, nul juq nail lavqkhoel bhai, Miqyail nv juq bhai bhoil lavq-a nail aqduq iqsanl eeq lal mao lal dai, nv juq noeq thunq nail ngaol. 16Al hai pevq lal haq neq, nul juq nail jaol duq a phao bal-nvq bhai kev dai, nv juq lavqkhiq tsail nail geeqlaoq daoq cavq kivq nail ngaol. Aq-u phao, yu-i mail nl-ai thaq nail ganl bhai neema eeq eeq ail nv juq teevq peivq ail maq ge-ail. 17Thail hai ngaol-aoq, “Neema eeq nail tsaol-aq, Heeqphaq Miqyail nail lavqkhoel bhai taivq-ail eeq dei-eiq.” 18Khul khi mail dai ngal-aq neq, yovqgavq nail ganl yovqgavq salkhil khanq nail tsaol-aq bhai, Miqyail neekhaol sil nail maq ngel-ail. Miqyail-i mail salkhil khanq nail tsaol-aq bhai taivq-ail, aivq neekhaol sil nail ngaol.

Currently Selected:

2 Gaolliqthu 10: aeu

Highlight

Copy

Compare