2 Gaolliqthu 9

Khali yaq juq bhai tsao jao-ai bhiq nail ganl

1Yuldav milkhaoq bhai jaol nail Miqyail nail tsaol-aq juq bhai tsao jao-ai bhiq nail ganl al ngal nul juq bhai haoqgavq gevq bhoel-ai leevq nail maq loq-ail. 2Khul khi mail dai ngal-aq neq, nul juq yu bhai tsao jao-ai movq nail neema aol nail ngaol dai, ngal heeq kivq naol. “Aqyu juq yu bhai tsao jao-ai movq nail neema aol nail ngaol” dai, ngal Maqgeiqdaolnil milkhaoq bhai jaol nail juq bhai ge bhiq-a nail nee ovqtavq, ngal nul juq bhai tsiq eeq nail ngaol. “Aqgaq yal milkhaoq bhai jaol nail juq neq, milnee kovq nee mail lainq-ai thaq nail ngaol” dai, ngal aqyu juq bhai ge bhiq-a nail ngaol. Nul juq-i mail lai jai dee dee nail phaq neq, aqyu juq jemao teevq pav nl movq nail neema aol lal dai, bhi noeq dov lal-a nail ngaol. 3Nul juq-i mail nl nail ganl bhai ngal tsiq eeq thail thaiq nail niil, aqnieivq ail maq ya pevq nail nee ovqtavq, ngaq-i mail ge nail khe-ai, nul juq aqmeeq-ai lainq-ai thaq nia dai, aqivq jaqbheq niil juq bhai khoel-ai leevq nail khi ngaol. 4Al hai maq ngel haq neq, Maqgeiqdaolnil milkhaoq bhai jaol nail tsaol-aq teevq pav ga nav juq ngaq-ai nee mail teevq gaq khe-ai lee-u phao, nul juq maq lainq-ai thaq nail bhai ya moel haq neq, nv juq nul juq bhai neema thaq tsaol nail ngel-i mail, nul juq taivq-ail ya haq sil nail maq ngel-ail. Nv juq iqsanl ya haq sil nail ngaol. 5Al heel ngel-i mail, ngal maq kev lee-u nee mail, iqmoeq-u nee ge-ai thaq nail geeqlaoq eeq nail phul danq nail ganl al bhai aqmeeq-ai tsao nl gil yaoq dai, ngal aqivq jaqbheq niil hail gaq bhai khoel-ai leevq nail neq, tsaq nail ngaol dai, noeq nail ngaol. Nul juq al hai danq-u phao, maq danq ail maq khi kivq nail ngel-i mail danq nail maq ngel mail. Lavq khiq teevq tsail danq movq nail neema aol khi danq nail bhai ngal oil movq ail nial.

6Micil taivq-ail haiq nail gaq, micil taivq-ail ya gaiq nail ngaol. Maodai haiq nail gaq mao dai ya gaiq nail ngaol dai, ge nail daoq al daoq bhai thaq nioil peivq. 7Yaoq gaq yaoq-ao nee, yovqgavq nail neema lavqkhoel-ai yovqgavq noeqceiv-ai thaq nail khe-ai danq yaoq. Neema maq kev dai, danq nail maqkhaiq, yu khoel nail ngel-i mail danq nail maqkhaiq, neema al hai aol aol ail thaq danq. Khul khi mail dai ngal-aq neq, lavqkhiq teevq tsail danq nail tsaol-aq bhai Miqyail gaiq-a nail ngaol. 8Nul juq khaq mao iqsanl yaoq phaq yaoq-ao neejiav lovq nail nee ovqtavq, aqmeeq yaoq phaq yaoq-ao nee nl nia hal nia dai, Miqyail nul juq bhai geeqlaoq yaoq phaq yaoq-ao nee teevq bhee bivq nia nail ngaol. 9Jal liq lavqkhoel bhai gevq-ai thaq nail khe-ai,

“Haq nail aoq nail

juq nail haqbhoil

mao dai danq bhiq-a nail

tsaol-aq al gaq,

aivq nail tsaq nail daol nail

al phaq neq,

nqmaq maqluv halyeel

ivq nail ngaol” dai,

gevq-ai thaq nail ngaol.

10Aqiq haiq nail gaq bhai aqiq iqsanl, jaqjaq daoldaol iqsanl, bivq nail Miqyail, nul juq bhai aqiq bivq lavq nail ngaol. Nul juq-i mail haiq-ai thaq nail aqiq al heeq lee lov lee khi, tsaq nail daol nail phaq mao dai ya gaiq dai, aivq bhi mao lal nail ngaol. 11Yaoq phaq yaoq-ao nee nail haqbhoil nul juq mao dai bivq nia dai, iqsanl nail lavqkhoel-ai Miqyail nul juq bhai hulmeeq bhi meeq lal nail ngaol. Al heel ngel-i mail, Yuldav milkhaoq bhai jaol nail Miqyail nail tsaol-aq juq, ngadao mao dai bivq nail bhai hel daiq khi, Miqyail bhai tsiq eeq nail ngaol.

12Khul khi mail dai ngal-aq neq, Miqyail nail tsaol-aq bhai tsao jao-ai bhiq nail ganl al neq, aqyu juq loq nail khe-ai, teevq bhee tsao jao-ai bhiq nail teevq-eel maq ngel-ail. Aqyu juq Miqyail bhai lavqkhiq teevq tsail tsiq eeq jaiq nia lal dai iqsanl nl nail ngaol. 13Nul juq aqyu juq bhai tsao jao-ai bhiq nail bhai aqyu juq hel daiq khi, nul juq khalheel nail tsaol-aq ngel ail dai, aqyu juq heeq nia nail ngaol. Khul khi mail dai ngal-aq neq, nul juq Khali nail lavqkhiq tsail nail geeqlaoq daoq bhai hav bhoel khi, al nail haoqnao tsao the nail ngel-i mail maqkhaiq, aqyu juq bhai iqsanl, yu bhai iqsanl nul juq mao dai danq bhiq-a nail ngel-i mail maqkhaiq, aqyu juq Miqyail bhai thaq eeq thaq heel nail ngaol. 14Miqyail nul juq bhai mao ail meeq nail geeqlaoq bivq lavq-a nail ngel-i mail, aqyu juq nul juq nail haqbhoil khaq mao iqsanl geeqlaoq hal-u phao, nul juq bhai noeq kev dee dee nail ngaol. 15Maq ge gil tsaol nail kovpavq Miqyail bivq lavq-a nail ngel-i mail, aivq bhai tsiq eeq bhel.

Currently Selected:

2 Gaolliqthu 9: aeu

Highlight

Copy

Compare