1 Yaolhaq 4

Miqyail bhai tavq nail aqhaqlal

1Ngal mail ma-ail gaiq-a nail aqtsaoq juq-ol, khal ngel nail aqhaqlal bhai nul juq neema thaq thaq tsaol. Aqhaqlal al, Miqyail jaol nail nee lee thaq nail ngel ail laiq dai, iqmoeq laonq daiq yaoq. Khul khi mail dai ngal-aq, Miqyail nail haqbhoil ge dan naol dai, ge khi ngaol-aoq, mal dil maq ngel nail tsaol-aq juq miltsaq doi dai, ail bhee-ai thaq nail ngaol. 2Mal dil Miqyail nail aqhaqlal ngel nail maq ngel nail, nul juq niail hai heeq kivq duq kivq nail ngaol. Yeiqsul Khali neq, mal dil tsaol-aq yaq nail aqsivq haqjoil phi khi lee-a nail ngaol dai, khal ge nail aqhaqlal neq, Miqyail jaol nail nee lee-a nail ngaol. 3Thail hai ngaol-aoq, al hai maq ngel ail dai, ge nail aqhaqlal neq, Miqyail jaol nail nee lee-a nail aqhaqlal maq ngel-ail. Aqhaqlal al neq, Khali bhai genl dev nail gaq nail aqhaqlal pevq nail ngaol. Niil heel nail aqhaqlal lee nail ngaol dai, nul juq ya gaiq-a nail khe-ai, niil aq-il iqsanl miltsaq bhai jaol nail ngaol.

4Ngaq nail yaq juq-ol, nul juq Miqyail bhai tavq nail tsaol-aq ngaol. Al ovqtavq nul juq aqyu juq bhai gaq lai-a nail ngaol. Khul khi mail dai ngal-aq, nul juq nail neema lavqkhoel bhai jaol nail gaq, miltsaq bhai uv thaiq nail neivq heeqphaq nee maq tsil eeq jaiq nail ngaol. 5Miqyail nail haqbhoil ge dan naol dai, ge khi ngaol-aoq, mal dil maq ngel nail al juq neq, miltsaq bhai tavq nail ngaol. Al heel ngel-i mail, miltsaq bhai tavq nail juq taivq-ail aqyu juq cavq bhiq cov bhiq nail ngaol. Miltsaq yaq juq iqsanl, aqyu juq nail daoq nal daiq nail ngaol. 6Ngadao neq, Miqyail bhai tavq nail ngaol. Miqyail bhai heeq nia nail tsaol-aq, nv juq nail daoq nal daiq nail ngaol. Miqyail bhai maq tavq nail tsaol-aq nv juq nail daoq maq nal daiq-ail. Al heel ngel-i mail, mal dil tsaq nail phaq bhai tavq nail aqhaqlal bhai maqkhaiq, maq tsaq nail phaq bhai tavq nail aqhaqlal bhai maqkhaiq, ngadao tsel pav kivq nail ngaol.

Miqyail neq, goil nail gaiq-a nail phaq pevq nail ngaol

7Ngal mail ma-ail gaiq-a nail aqtsaoq juq-ol, ngadao teevq gaq nee teevq gaq gaiq-a bhel. Khul khi mail dai ngal-aq, goil nail gaiq-a nail phaq neq, Miqyail nee mail dov lee-a nail ngaol. Goil nia gaiq-a nia nail tsaol-aq yaoq gaq yaoq-ao nee, Miqyail nail yaq pevq khi, Miqyail bhai heeq nia nail ngaol. 8Maq goil maq gaiq-a nia nail tsaol-aq neq, Miqyail bhai maq heeq nia-ail. Khul khi mail dai ngal-aq, Miqyail neq, goil nail gaiq-a nail phaq pevq nail ngaol. 9Miqyail ngadao bhai goil nail gaiq-a nail phaq, niail hai phao daiq lavq-a nail ngaol. Yaqyov bhaq da nee ngadao doevq nail phaq ya dai, Miqyail neq, aivq nail Yaqyov teevq gaq taivq-ail jaol khi ngaol-aoq, miltsaq bhai bhi lee kha-a nail ngaol. 10Goil nail gaiq-a nail phaq neq, niail hai ngaol; Ngadao Miqyail bhai gaiq-a nail bhai ge nail maq ngel-ail. Aivq ngadao bhai gaiq-a khi, ngadao nail oeqbal nail haqbhoil laol bhiq nail dai khi, aivq nail Yaqyov bhi lee-a nail bhai, ge nail ngaol. 11Ngal mail ma-ail gaiq-a nail aqtsaoq juq-ol. Miqyail ngadao bhai nii dai dai ail gaiq-a lavq-a nail ngel-i mail, ngadao iqsanl teevq gaq nee teevq gaq gaiq-a nail tsaq nail ngaol. 12Tsaol-aq teevq gaq iqsanl, Miqyail bhai maq moel daiq haq-al. Thail hai ngaol-aoq, ngadao teevq gaq nee teevq gaq gaiq-a haq neq, Miqyail ngadao nail lavqkhoel bhai jaol khi, aivq nail goil nail gaiq-a nail phaq ngadao nail lavqkhoel bhai bhee lal nail ngaol.

13Ngadao Miqyail nail lavqkhoel bhai jaol khi, Miqyail ngadao nail lavqkhoel bhai jaol nail ngaol dai, ngadao niail hai heeq kivq nail ngaol. Aivq aivq nail Aqhaqlal ngadao nail lavqkhoel bhai bhi jaol lee-a nail ngaol. 14Miltsaq yaq bhai Hevq kovq nail gaq bhi jiovq nail dai khi, Aqbhu Miqyail aivq nail Yaqyov bhi lee-a nail bhai, ngadao moel khi salkhil khanq nail ngaol. 15“Yeiqsul neq, Miqyail nail Yaqyov ngaol” dai, khal ge dov nail tsaol-aq, Miqyail aqyu juq nail lavqkhoel bhai jaol khi, aqyu juq iqsanl Miqyail nail lavqkhoel bhai jaol nail ngaol. 16Miqyail ngadao bhai gaiq-a nail ngaol dai, ngadao heeq kivq khi, neema thaq tsaol nail ngaol.

Miqyail neq, goil nail gaiq-a nail phaq pevq nail ngaol. Goil nail gaiq-a nail lavqkhoel bhai jaol nail tsaol-aq Miqyail nail lavqkhoel bhai jaol khi, Miqyail iqsanl aqyu juq nail lavqkhoel bhai jaol nail ngaol. 17Ngadao nail lavqkhoel bhai goil nail gaiq-a nail phaq al hai bhee lal-a nail ngel-i mail, yalkhaq dal-u n-gaol ngadao nail neema ivq dao dai, jiav nail ngaol. Khul khi mail dai ngal-aq, Yeiqsul pevq nail khe-ai, ngadao iqsanl miltsaq bhai pevq thail thaiq nail ngaol. 18Goil nail gaiq-a nail lavqkhoel, gee sil nail phaq maq jiav-ail. Goil nail gaiq-a nail neema teevq bhee aol haq neq, gee sil nail neema peivq ail nail ngaol. Khul khi mail dai ngal-aq, gee sil nail phaq neq, yalkhaq dal lavq nail bhai gee sil nail ngel-i mail, gee sil nia nail tsaol-aq nail lavqkhoel goil nail gaiq-a nail phaq maq bhee lal haq-al.

19Miqyail ngadao bhai iqmoeq gaiq-a lavq-a nail ngel-i mail, ngadao iqsanl aivq bhai gaiq-a khi, teevq gaq nee teevq gaq gaiq-a nail ngaol. 20“Ngal Miqyail bhai gaiq-a naol” dai, tsaol-aq teevq gaq ga nav ge khi ngaol-aoq, aivq nail aqivq jaqbheq bhai neejiav jiav haq neq, aivq neq, goiqbhaoq bhaoq nail tsaol-aq ngaol. Khul khi mail dai ngal-aq, aivq moel thail thaiq nail aqivq jaqbheq bhai maq gaiq-a nia haq neq, aivq maq moel daiq-a nail Miqyail bhai khal hai khi gaiq-a nia nail-aiq. 21Miqyail bhai gaiq-a nail tsaol-aq yovqgavq nail aqivq jaqbheq bhai ya gaiq-a nail ngaol dai, bivq thaq-ai thaq nail daoq al daoq neq, Yeiqsul-i mail ngadao juq bhai bivq thaq ail ceevq-a nail ngaol.

Currently Selected:

1 Yaolhaq 4: aeu

Highlight

Copy

Compare