1 Yaolhaq 5

Ngadao neema thaq tsaol nail phaq neq, miltsaq bhai gaq lai nail ngaol

1Yeiqsul neq, Khali ngaol dai, neema khal thaq tsaol nail tsaol-aq Miqyail nail yaq pevq lal-a nail ngaol. Aqbhu Miqyail bhai khal gaiq-a nail tsaol-aq, aivq nail yaq bhai iqsanl gaiq-a nail ngaol. 2Ngadao Miqyail bhai gaiq-a khi, aivq-i mail bivq-ai thaq nail daoq bhai nal daiq haq neq, aivq nail yaq juq bhai gaiq-a nail phaq pevq nail ngaol dai, heeq kivq nail ngaol. 3Khul khi mail dai ngal-aq, Miqyail bhai gaiq-a nail dai, ge nail neq, aivq-i mail bivq-ai thaq nail daoq bhai nal daiq nail bhai, ge nail ngaol. Aivq-i mail bivq-ai thaq nail daoq neq, haq nail maq ngel-ail. 4Miqyail nail yaq yaoq gaq yaoq-ao nee mail, miltsaq bhai gaq lai nail ngaol. Miltsaq bhai gaq lai nail phaq neq, ngadao nail neema thaq tsaol nail phaq pevq nail ngaol. 5Miltsaq bhai gaq lai nail tsaol-aq neq, kha sil gaq jaol nail-aiq. Yeiqsul neq, Miqyail nail Yaqyov ngaol dai, neema khal thaq tsaol nail tsaol-aq taivq-ail, gaq lai nail ngaol.

Yeiqsul Khali nail ganl salkhil khanq nail

6Ulcuvq khi mail aqsivq nee mail lee-a nail gaq neq, Yeiqsul Khali ngaol. Ulcuvq nee mail taivq-ail aivq lee-a nail maq ngel-ail. Ulcuvq khi mail aqsivq niil nvq phaq nee mail lee-a nail ngaol. Al hai lee-a nail neq, mal dil ngel nail ngaol dai, Aqhaqlal Miqyail salkhil khanq nail ngaol. Khul khi mail dai ngal-aq Aqhaqlal Miqyail neq, mal dil tsaq nail phaq pevq nail ngaol. 7Al heel ngel-i mail, ganl niil bhai salkhil khanq niail hail phaq jiav nail ngaol. 8Al neq, Aqhaqlal Miqyail, ulcuvq, aqsivq niil hail phaq ngaol. Niil hail phaq salkhil khanq nail neq, teevq gaq kheel ngaol. 9Tsaol-aq yaq salkhil khanq nail daoq bhai ngadao nal daiq nail ngaol. Miqyail salkhil khanq nail neq, a dai nee maq tsil eeq jaiq nail ngaol. Khul khi mail dai ngal-aq, Miqyail aivq-i mail salkhil khanq-ai thaq nail ngel-i mail ngaol. Al neq, aivq nail Yaqyov nail ganl salkhil khanq nail ngaol. 10Miqyail nail Yaqyov bhai neema thaq tsaol nail tsaol-aq neq, aivq nail neema lavqkhoel bhai Miqyail-i mail salkhil khanq-ai thaq nail phaq aol nail ngaol. Thail hai ngaol-aoq, Miqyail bhai neema maq thaq tsaol nail tsaol-aq neq, Miqyail bhai goiqbhaoq bhaoq nail gaq niil dai ge nail khe-ai, dul nail ngaol. Khul khi mail dai ngal-aq, Miqyail aivq nail Yaqyov nail ganl salkhil khanq nail bhai aqyu juq neema maq thaq tsaol-ail. 11Miqyail salkhil khanq nail al neq, ngadao bhai nqmaq maqluv halyeel doevq nail phaq bivq lavq-a nail ngaol. Nq maq maq luv hal yeel doevq nail al neq, aivq nail Yaqyov nail lavqkhoel bhai aol nail ngaol. 12Yaqyov bhai hav bhoel nail tsaol-aq, doevq nail phaq ya nail ngaol. Yaqyov bhai maq hav bhoel nail tsaol-aq, doevq nail phaq maq ya-ail.

Nq maq maq luv hal yeel doevq nail phaq ya nail ganl

13Miqyail nail Yaqyov nail aqmil bhai neema thaq tsaol nail nul juq, nqmaq maqluv halyeel doevq nail phaq ya nail ngaol dai, nul juq ya heeq kivq dai, ngal nul juq bhai haoqgavq niil gevq bhoel-ai leevq-a nail ngaol. 14Ngadao Miqyail nail sivtavq bhai neema ivq dao dai, hal lai kivq nail ngaol. Khul khi mail dai ngal-aq, aivq neema tsaq nail khe-ai ngadao teevq phaq ga nav hal haq neq, aivq nal daiq lavq nail ngaol. 15Ngadao khal hal-u phao, aivq nal daiq lavq nail ngaol dai, heeq kivq duq-ai thaq nail ngel-i mail, aivq bhai khal hal-a nail khe-ai, ngadao ya naol dai, heeq kivq nail ngaol. 16Tsaol-aq teevq gaq ga nav, aivq nail aqivq jaqbheq sil heeq phaq-ail maq tsaq nail oeqbal nl thail thaiq nail bhai ya moel haq neq, tsaol-aq al gaq nail haqbhoil Miqyail bhai geeqlaoq hal heeq phaq-ail tsaq nail ngaol. Al hai hal haq neq, aqivq jaqbheq al gaq bhai Miqyail aqdoevq doevq nail phaq bivq nail ngaol. Sil heeq phaq-ail tsaq nail oeqbal iqsanl jiav nail ngaol. Al nail haqbhoil Miqyail bhai geeqlaoq ya hal nail ngaol dai, ngal ge nail maq ngel-ail. 17Nl bheeq-a nail phaq iqsanl mail, oeqbal ngaol. Thail hai ngaol-aoq, sil heeq phaq-ail maq tsaq nail oeqbal iqsanl jiav nail ngaol.

18Miqyail nail yaq khul gaq maqkhaiq, oeqbal maq nl ail#5.18 3.6 bhai hel daiq-ail yaoq. dai, ngadao heeq kivq nail ngaol. Khul khi mail dai ngal-aq, Miqyail nail Yaqyov aivq bhai hel daiq phail bhiq nail ngel-i mail, haqeiv nail gaq aivq bhai maq thoiq tsi nia-ail. 19Ngadao neq, Miqyail nail yaq ngaol dai, heeq kivq nail ngaol. Miltsaq yaq iqsanl mail haqeiv nail gaq nail bhaqaoq nail kov-uvq bhai jaol thail thaiq nail ngaol dai iqsanl, heeq kivq nail ngaol. 20Al ovqtavq, ngadao mal dil tsaq nail Miqyail bhai heeq nia lal dai, Miqyail nail Yaqyov lee khi, neenoeq neekha bivq lavq-a nail ngaol dai, heeq kivq nail ngaol. Ngadao neq, mal dil tsaq nail Miqyail nail lavqkhoel bhai jaol nail ngaol. Khul khi mail dai ngal-aq, aivq nail Yaqyov Yeiqsul Khali nail lavqkhoel bhai ngadao jaol nail ngaol. Yaqyov niil gaq neq, mal dil tsaq nail Miqyail pevq nail nee ovqtavq, nqmaq maqluv halyeel doevq nail phaq iqsanl, pevq nail ngaol. 21Ngaq nail yaq juq-ol, thaoq phaoq aqma maolkhoel bhai gail jao jao yaoq.

Currently Selected:

1 Yaolhaq 5: aeu

Highlight

Copy

Compare