1 Gaolliqthu 6

Yalkhaq dal lavq yaoq dai, laol kivq yaq jaol nail bha ail nail ganl

1Nul juq nail gaiq laq yalkhaq ge nail phaq dov lal haq neq, Miqyail nail tsaol-aq jaol nail bha maq ail mail, nul juq bhai dalceiv lavq dai, laol kivq yaq jaol nail bha ail tseq naol laiq. 2Miqyail nail tsaol-aq miltsaq yaq iqsanl bhai yaqhao yalkhaq ya dal nail ngaol dai, nul juq maq heeq kivq ail laiq. Nul juq miltsaq yaq bhai yalkhaq ya dal haq neq, nul juq micil cil deel ganl juq bhai dal heeq phaq-ail maq geel-nvq ail laiq. 3Ngadao neq, nqtavq gaqkhoel bhai iqsanl, yalkhaq ya dal nail ngaol dai, nul juq maq heeq kivq ail laiq. Al heel ngel-i mail, miltsaq khe ganl bhai iqsanl, ngadao mal dil yalkhaq ya dal nail ngaol. 4Thail hai ngaol-aoq, dal heeq phaq-ail tsaq nail micil cil deel ganl dov lal haq neq, maivphaoq nal moel maq jiav-ail dai, Khali yaq munl-i mail saol-nvq-ai thaq nail juq bhai, nul juq yalkhaq dal nail tsaol-aq bhi jiovq nail ngaol. 5Nul juq bhi haq sil nail dai khi, ngal niail hai ge nail ngaol. Khali yaq nail gaiqlaq bhai, maq tsaq maq jil lai nail bhai dalceiv nia nail neenoeq neekha aol nail tsaol-aq, nul juq nail lavqkhoel bhai teevq gaq ail maq jaol-ail laiq. 6Khali yaq nail gaiq laq yalkhaq ge nail nee ovqtavq, Yeiqsul bhai neema maq thaq tsaol nail tsaol-aq nail sivtavq bhai yalkhaq ge ail nail laiq.

7Nul juq teevq gaq nee teevq gaq yalkhaq ge nail neq, teevq peivq ail maq tsaq-ail. Khul khi mail aqivq jaqbheq-i mail lav laiq lavq nail bhai nul juq maq ol nail-aiq. Khul khi mail aqivq jaqbheq juq nul juq nail yalkav bhai khoiq lal-u phao, nul juq maq ol nail-aiq. 8Nul juq al hai maq ol nail nee ovqtavq, yu bhai lav laiq khi goiqbhaoq bhaoq jaq thail thaiq nail ngaol. Nul juq yovqgavq nail aqivq jaqbheq bhai al hai nl thail thaiq nail ngaol.

9Maq tsaq maq daol nail tsaol-aq, Miqyail Milkhaoq lavqkhoel-ai maq ya aol lai ail dai, nul juq maq heeq kivq ail laiq. Thaq noeq bheeq dei-eiq. Khaqmiq sev nail, thaoq phaoq aqma maolkhoel bhai uqhuq thaoq nail, yu nail khaqma bhai bheeq nail leel nail, yaqyov-aq aqtsaoq gaiqlaq bhai maq nl khaoq nail phaq nl nail, 10yu nail yalkav khoiq nail, neekhaol jiav nail, khaq mao iqsanl jil pheeq daol bov nail, khal ge movq ail ge nail, yu nail yalkav bhai khoiq khi kav jaq nail, al heel nail tsaol-aq Miqyail Milkhaoq lavqkhoel bhai maq ya aol lai-ail. 11Jel lal-u phao nul juq teevq pav ga nav juq al hai nl-a nail ngaol. Thail hai ngaol-aoq, niil aq-il Miqyail ngadao nail Heeqphaq Yeiqsul Khali nail aqmil khi ngadao nail Miqyail nail Aqhaqlal bhaq da nee nul juq bhai tsiq haol-a nail nee ovqtavq, bhi meeq bhi haol lal-a nail ngaol. Tsaq nail daol nail tsaol-aq bhi pevq lal-a nail ngaol.

Nul juq nail aqmaol lavqkhoel-ai Miqyail nail seiqleiq khaoqsail bhi dov lal yaoq

12Nul juq neq, “Ngadao yaoq phaq yaoq-ao nee nl kivq nail aqkhaoq-anq jiav naol” dai ge nail ngaol. Nl kivq khi ngaol-aoq, yaoq phaq yaoq-ao nee ganl tsoiq nail maq ngel-ail. “Ngal yaoq phaq yaoq-ao nee nl kivq nail aqkhaoq-anq jiav naol.” Thail hai ngaol-aoq, khul phaq nail kov-uvq bhai maqkhaiq, ngal yaqkav maq jiovq. 13Nul juq neq, “Jaq nail phaq neq, ovqmav nail haqbhoil ngaol. Ovqmav neq, jaq nail phaq nail haqbhoil ngaol” dai, ge nail ngaol. Thail hai ngaol-aoq, Miqyail niil nvq phaq bhai lav peivq lav boev nail ngaol. Aq maol neq, yu nee mail khaqmiq sev nail haqbhoil maq ngel-ail. Heeqphaq Yeiqsul nail haqbhoil ngaol. Heeqphaq Yeiqsul iqsanl aqmaol nail haqbhoil ngaol. 14Miqyail aivq nail bhaqaoq-i mail Yeiqsul bhai bhi doevq kovq lal-a nail khe-ai, ngadao bhai iqsanl bhi doevq kovq lal nail ngaol. 15Nul juq nail aqmaol neq, Khali nail al sail juq ngaol dai, nul juq maq heeq kivq ail laiq. Al heel ngel-i mail, Khali nail al sail bhai oil khi, maimaqlal nail al sail bhi pevq lal nail laiq. Teevq peivq ail maq pevq nia-ail. 16Maimaqlal nee mail bheeq nail tsaol-aq, aivq nee mail aqmaol teevq maol taivq-ail pevq lal nail ngaol dai, nul juq maq heeq kivq ail laiq. Khul khi mail dai ngal-aq neq, Jal liq lavqkhoel bhai khaqma yovjil nail ganl bhai gevq-ai thaq nail khe-ai, “Aqyu nvq gaq aqmaol teevq maol taivq-ail pevq lal nail ngaol” dai, ge-ai thaq nail ngaol. 17Al hai dul dai, Heeqphaq Yeiqsul nee tavq nail tsaol-aq, aqhaqlal phao aivq nee mail teevq gaq teevq-eel ngaol.

18Yu nee mail bheeq nail phaq bhai gaoq ceiv ceiv ail yaoq. Tsaol-aq-i mail nl nail oeqbal yaoq phaq yaoq iqsanl mail, yovqgavq nail aqmaol lavqniil phao nl nail ngaol. Thail hai ngaol-aoq, yu nee mail bheeq nail tsaol-aq, yovqgavq nail aqmaol bhai nl bheeq-a nail ngaol. 19Nul juq nail aqmaol neq, Meeq nail Haol nail Aqhaqlal nail uqhuq thaoq nail ilkhaol il ma ngaol dai, nul juq maq heeq kivq ail laiq. Aivq neq, Miqyail nee mail dov lee khi, nul juq nail lavqkhoel bhai jaol thail thaiq nail ngaol. Nul juq nail aqmaol neq, nul juq nail maq ngel-ail. 20Khul khi mail dai ngal-aq neq, Miqyail aqphoiq bivq khi, nul juq bhai ul kovq-ai thaq nail ngaol. Al heel ngel-i mail, nul juq nail aqmaol lavqkhoel Miqyail nail seiqleiq khaoqsail bhi dov lal yaoq.

Currently Selected:

1 Gaolliqthu 6: aeu

Highlight

Copy

Compare