Zabur 78
78
Eshiá pa démi naslán sar kanét
Asápay shayri gwashtánk.
1Oo mani kawm! Mani sóján gósh dár o
delgóshá gón mani habarán kan.
2Wati dapá pa batal pacha kanán o
kwahnén chách o chistánán máná kanán,
3hamá ke má eshkotag o zántagant,
hamá ke may pirénán márá gwashtagant.
4Eshán cha áyáni chokk o nomásagán chéra nadayén,
gón áyókén naslá Hodáwanday porshawkatén káráni kessahá kárén,
Hodáwanday zór o twánay kessahá kárén o
áiay kortagén ajabén mójezaháni kessahá.
5Áiá gwáhié pa Ákubá esht,
Sharyati pa Esráilá áwort o
may pet o piréni parmán dátant
ke eshán wati chokk o nomásagán sarpad bekanét,
6tán démi naslesh bezánant o
hamá chokk ham ke angat pédá nabutagant,
wati wahdá, gón wati chokk o nomásagán esháni kessahá bekanant,
7tánke á ham Hodáay sará tawkal bekanant o
Hodáay kárán mashamóshant o
áiay hokmán bemannant.
8Wati pet o pirénáni paymá mabant,
sarkash o mánmayátk#78:8 Mánmayátk, bezán hamá ke kassá namannit.
ke delesh gón Hodáyá nabast o
arwáhesh gón Hodáyá wapádár naat.
9Epráimi, harchont ke gón kamánán selahband atant,
bale janagay róchá tatkant.
10Áyán Hodáay ahd nadásht o
wati delá shawresh kort ke “áiay Sharyatay sará zenda nagwázénén.”
11Áiay kortagén káresh shamoshtant,
hamá ajabén kár ke áyáná péshi dáshtagatant,
12Hamá kár ke áyáni pet o pirénáni démá kortagatanti,
Mesray molká, Zohánay gyábáná.
13Áyáni démay daryái ném kort o ái gwázéntant,
ápi, doén démán chó diwálá mekk kort.
14Róchá, gón jambará rashónii dátant o
shapá gón ásay rozhná.
15Gyábáná, talári tal kortant o
áyáná, johlén zeréay kesásá ápi dát.
16Cha talárán chammagi bótkant o
ápi chó kawrá rombént.
17Bale áyán angat géshter gonáh kort o
gyábáná borzén arshay Hodáay helápá shóreshesh kort.
18Hodáesh pa zánt hamá warákáni sará chakkáset
ke áyáni delá lóthet.
19Hodáay helápá habaresh kort o gwashtesh:
“Hodá é gyábáná parzónagé pach korta kant?
20Talári wa jat o cha áiá áp rawán but o
kawr sar rechán butant,
bale wati mardomán nán ham dáta kant?
Yá pa wati kawmá gósht ham tayár korta kant?”
21Hodáyá ke eshkot, zahr gept,
ásé pa Ákubá róki kort,
hezhmi pa Esráilá chest but.
22Chiá ke Hodáay sará imánesh néstat o
báwaresh nabut ke Hodáesha rakkénit.
23Ásmáni pa pach bayagá parmán dát o
arshay darwázagi pach kortant.
24 Manni # 78:24 Mann hamá ásmáni nagan ent ke Mussáay zamánagá, Hodáyá pa Bani Esráilián hamá wahdá ér áwort ke á barr o gyábánán sapará atant. pa áyán chó hawrá gwart ke bwarant,
ásmáni gandomi bakshátant.
25Mardomán préshtagi warák wárt,
pa áyán békesás waráki rawán dát.
26Cha ásmáná ródarátki gwáti sar dát o
gón wati zórá jonubi gwáti chest kort.
27Danzáni paymá pa áyán góshti gwárént,
daryáay rékáni kesásá, báli morg,
28áyáni ordgáhá#78:28 Ordgáh hamá jágah ent ke mardom pa kasánén wahdéá gedána bandant o nendant. éri áwortant,
áyáni gedánáni kerr o gwarán.
29Wárt o séresh kort,
pa har chizzá ke áyán hers at, dátanti.
30Bale cha áyáni hersay purah bayagá pésar,
ke warákesh angat dapá at,
31Hodáay hezhm áyáni sará pád átk,
áyáni zórmandterén mardomi koshtant o
Esráilay warnái jokkéntant.
32É sajjahén káresh distant o angat ham gonáhesha kort o
áiay ajabén káráni sará báwaresha nakort.
33Gorhá áyáni róchi pa náhudagi halás kortant o
sál pa tors.
34Hodáyá ke áyáni koshag bendát kort, nun áiay shóházá dar kaptant.
Dém pa Hodáyá per tarretant o pa setk o del Hodáay shóházá butant.
35Hayálá kaptant ke Hodá áyáni talár ent,
hamá borzén arshay Hodá, áyáni posht o panáh.
36Bale gón wati dapá, gón áiá charpzobániesha kort o
gón zobáná drógesha bast.
37Delesh gón áiá wapádár naat o
áiay bastagén ahdesh nadásht.
38Bale á angat mehrabán at o áyáni gonáhi bakshetant o
sajjahéni nakoshtant.
Rand pa randá wati hezhmia dásht o
wati sajjahén gazabi darshána nakort.
39Zánti ke é hákién ensán ant,
rawókén gwáté ke padá pera natarrit.
40Gyábáná chinchok randá cha Hodáyá sarkashiesh kort,
ódá áesh gamig kort.
41Rand pa randá Hodáesh chakkáset,
Esráilay pákénesh ázár dát.
42Áiay dastay zóresh yát nakort
ke á róchá chón cha dozhmenáni dastá rakkéntanti,
43hamá wahdá ke Mesrá wati neshánii paddar kortant o
Zohánay gyábáná ajabén kári kort.
44Áyáni kawri hóná badal kortant
ke kassá cha wati jóán áp wárta nakort.
45Makeskáni rombi áyáni nyámá ráh dátant ke makeskesh bwarant o
pogoláni romb, ke barbádesh bekanant.
46Áyáni keshári madagáná dátant o
bar o samar kathagán#78:46 Kathag madagay záté. wártant.
47Áyáni anguri gón tróngalá zawál kortant o
enjiráni drachk, gón hár o tuppánán.
48Áyáni ramagi pa tróngal koshtant o
dalwat, pa grand o grók.
49Wati sóchókén kahr o gazabi áyáni sará rawán dát,
kahr o gazab o azáb,
gár o gomsár kanókén préshtagáni thólié áyáni sará.
50Ráhi pa wati hezhmá rást o tachk kort,
cha marká narakkéntanti, wabáyáni dapái dátant.
51Mesray sajjahén awali chokki jatant,
Mesray#78:51 Asligén Ebráni syáhaga gwashit “Hámay”, ke pa Mesrá eshárahé. gedánnendáni mardánagiay awali bar o samar.
52Bale wati mardomi ramagay paymá sar dát o bortant,
pasáni dhawlá gyábánán rashónii kortant.
53Ái pa émeni rahshóni kortant ke matorsant
bale áyáni dozhmen daryáyá mán patátant.
54Gorhá ái wati pákén zeminá sar kortant,
hamá kóhestagén molká ke gón wati rástén dastá geptagati.
55Áyáni démá kawmi cha ódá dar kortant,
kawmáni zemini áyáni mirás kortant o
Esráilay kabilahi gedánáni tahá jahmenend kortant.
56Bale angat áyán borzén arshay Hodá chakkáset o
áiay helápá sarkashiesha kort,
áiay hokmesha namannet.
57Wati pirénáni paymá rástén ráhesh yalaha dát o béwapá butant,
chó sost o nábáwarén kamáná mantant.
58Borzén jáhán bothánahesha bast o Hodáesh zahra baráént,
botesha jórhént o Hodáesh hasaddiga kort.
59Hodáyá ke dist,#78:59 Asligén Ebráni nebeshtánka gwashit: “Hodáyá ke eshkot...” sakk hezhm gept o
Esráili sarjamiá yalah kort.
60Wati Shiluhay menendjáhi yalah kort,
hamá tambu ke Hodá ódá mardománi nyámá jahmenend at.
61Wati zór o wákay pétii#78:61 Péti, bezán sanduk. bandig kanáént,
wati shán o shawkatay neshánii dozhmenáni dastá dát.
62Wati kawmi zahmáni dapá dát,
wati mirásay sará sakk hezhmnák but.
63Warnáén bachak, ásá wártant o
jenek, pa suri názénkán sar nabutant.
64 Dini péshwá zahmáni dapá kaptant o
janózámán gréta nakort.
65Nun Hodáyá anchosh jáh jat ke yakké cha wábá bosta kant,
chó ke jangólé cha sharábay béhóshiá jáh bejant.
66Wati dozhmeni jat o poshtá kenzént o
abadi roswáiéá dawr dátant.
67Bale Issopay tambui nádóst kort o
Epráimay kabilahi nazort,
68Yahudáay kabilahi gechén kort,
Sahyunay kóh, ke dóst ati.
69Wati pákén jágahi, borzagáni paymá addh kort,
zeminay paymá namirán, jórhi kort.
70Wati hezmatkárén Dáudi gechén kort o
cha pasáni gwáshá dari kort,
71cha edá o rand, ái cha mésháni shopánkiá dar kort o
wati kawm, Ákubay shopánki kort,
wati mirás, Esráilay.
72Dáudá gón sápén delé áyáni shopánki kort o
gón honarmandén dasté áyáni rahshón but.
Currently Selected:
Zabur 78: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
