Zabur 74
74
Oo Hodá! Chiá márá yalah dátaget?
Asápay shayri gwashtánk.
1Oo Hodá! Chiá márá tán abad yalah dátaget?
Pa ché tai hezhmay ás pa tai charágáhay pasán rók ent?
2Wati kawmay yátá bekap,
ke taw cha dérén zamánagán pa bahá zortagatant,
ke taw móketagant tán tai kawm o mirás bebant.
Sahyunay kóhay hayálá bekap ke ódá jahmenend butagay.
3Wati gámán dém pa wati hamé modámigén wayránagán betarrén,
chiá ke dozhmená har chizz bérán kortag ke tai pákén jágahá butag.
4Dozhmenán tai didárjáhay tahá gorret o
wati bayrak#74:4 Bayrak, bezán parcham. pa neshániá mekk kortant.
5Hamáyáni paymá atant ke wati taparán
jangalay drachkáni sará borza barant.
6Áyán, tai pákén jágahay sajjahén ájetagén dár
gón wati tapar o téshagán prósht o hurt kortant.
7Tai pákén jágahesh ás kasshet o hák o por kort,
tai námay menendjáhesh palit kort.
8Wati delá gwashtesh: “Áyán sarjamiá wati panjagay chérá kárén,”
gorhá Hodáay sajjahén didárjáhesh é sardhagárá sótkant.
9Nun hech neshánié nagendagá én,
hech nabié pasht nakaptag o
cha má kass ham nazánt ke tán kadén é paymá bit.
10Oo Hodá! Tán kadén dozhmen tai sará bekandit?
Dozhmen tán abad tai námá bad o rad bekant?
11Chiá wati dastá poshtá dáray,
wati rástén dastá?
Dastá pach kan o pa áyán gári o tabáhié byár.
12Bale Hodá cha dérén zamánagán mani bádsháh ent,
ke zeminay sará nejátbakshén kára kant.
13É taw atay ke daryáet gón wati zór o wáká do ném kort o
daryáay baláháni saret ápáni nyámá próshtant,
14Liwyátánay#74:14 Liwyátán mazanén ápi rastaré butag. saret próshtant o
gyábánay sahdáráni waráket kort.
15Jó o sarchammag, taw rombént o rawán kortant,
modámigén kawr, taw hoshk kortant.
16Róch taig ent o shap ham tai
máh o róch taw barjáh dáshtagant.
17É taw atay ke zeminay hand o simsaret gisshéntant,
garmág o zemestánay addh kanók taw ay.
18Oo Hodáwand! Yátá bekap ke dozhmen che paymá maskará kanant o
názántén mardom tai námá che paymá bad o rada gwashant.
19Wati kapótá rastaráni warák makan o
setam distagén kawmay zendá tán abad mashamósh.
20Wati bastagén ahdá bedár,
chiá ke é sardhagáray tahárén jágah
cha zolm o zóray kodóh o kodámá porr ant.
21Mayl ke pádmálén mardom gón roswái pad bekenzant,
setam distag o hájatmand tai námá satá bekanátant.
22Oo Hodá! Jáh jan o wati hakkay démpániá bekan,
yátá bekap ke názánt sajjahén róchá che paymá tai sará kandant.
23Wati dozhmenáni kukkárán mashamósh,
dozhmenáni shóreshá ke modám borzád ent.
Currently Selected:
Zabur 74: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
