Zabur 68
68
Hodá jáh janát
Pa sázger o washáwázáni sálárá. Dáuday Zabur. Sawté.
1Hodá jáh bejanát o áiay dozhmen sheng o sháng bátant,
á ke cha áiá naprata kanant cha áiay dargáhá betachátant.
2Anchosh ke dutt bála kant eshán betáchén,
anchosh ke móm ásay démá ápa bit,
badkár Hodáay dargáhá gár o gomsár bátant.
3Bale pahrézkár shádmán o
Hodáay dargáhá gal o bál bátant o
cha wasshiá shádehi kanátant.
4Pa Hodáyá sawt bejanét o áiay námá názénét,
pa áiá ke jambarán swár ent satá o sanáay tawárá borz kanét.
Áiay nám Hodáwand ent,
áiay bárgáhá shádehi kanét.
5Hodá wati pákén bárgáhá
chórhawáni pet ent o janózámáni dádras.
6Hodá békasán pa lóg o jáha kant o
bandigán, ázát o ábád,
bale sarkesh, hoshkén zeminéá nendóka bant.
7Oo Hodá! Á wahdá ke wati kawmay rahshón atay,
á wahdá ke gyábáná mallán atay, ósht...,
8zemin larzet o
ásmánán hawr gwart,
Hodáay bárgáhá, Sináay kóhay yakdánagén Hodáay,
Hodáay bárgáhá, Esráilay Hodáay.
9Oo Hodá! Taw bázén hawré gwárént o
tai mirás ke hoshk o wayrán butagat, taw séráp kort.
10Tai ramag ódá jahmenend but.
Cha wati nékiá, oo Hodá,
taw béwas rózi dátant.
11Hodáwand wati habará jára jant,
bashárat árókén janén, mazanén lashkaré ant.
12Bádsháh gón wati lashkarána jehant o tachant,
janén wati lógá áwárán#68:12 Áwár, bezán jangá dast áwortagén mál, zarr o mardom. bahra kanant.
13Toré gwásh o áhorráni tahá wáb bebay
kapódaráni bál nograhpósha bant o potthesh teláhrang.
14Wahdé Porwákén Zórá bádsháh sheng o sháng kortant,
barpá Salmunay kóhay sará gwart.
15Oo mazankóh! Oo Báshánay kóh!
Oo bázthollén#68:15 Tholl, bezán kóhay tuskén borzi. Bázthollén kóhéá bázén borzié hast. kóh! Oo Báshánay kóh!
16Oo bázthollén kóh! Pa ché hamá kóhá gón hasaddé cháragá ay
ke Hodáyá pa wati lógjáhá gechén kortag,
hamódá ke Hodáwand tán abad jahmenenda bit?
17Hodáay arrábah hazáráni hazár o
lakkáni lakk ant,
Hodáwand cha Sináay kóhá wati pákén jágahá átkag.
18Á wahdá ke arshá borz butay
bázén bandigé zortet,
cha mardomán thékiet zort,
tantaná cha sarkashán ham,
tánke taw, oo Hodáwandén Hodá, ódá jahmenend bebay.
19Hodáwandá satá bát, may rakkénókén Hodáyá
ke har róch may bárána saggit. Ósht...
20May Hodá rakkénókén Hodá ent,
cha marká rakkénag Hodáwanday dastá ent, tahná Hodáwanday.
21Bale Hodá dozhmenáni sará próshit,
hamáyáni pormudén saray gobbahá próshit ke wati gonáháni tahá gáma janant.
22Hodáwandá gwashtag: “Áyán cha Básháná pera tarrénán,
áyán cha daryáay johlánkián pera tarrénán,
23tánke tai pád áyáni hóná lagatmál bekanant o
tai kochekáni zobán ham wati bahrá cha dozhmenán begerant.”
24Oo Hodá! Tai jashnay kárwán gendaga bit
mani Hodá o mani bádsháhay kárwán mán pákén jágahá.
25Démá sháer o poshtá sázger o
nyámá jenek tamburag janagá ant.
26Hodáyá mán mazanén diwánán benázénét.
Oo Esráilay óbádagán! Hodáwandá benázénét.
27Benyáminay kasánén kabilah hamódá ent,
Yahudáay kamásh áyáni hákem ant,
Zebulunay kamásh o Naptáliay kamásh, mazanén rombé ant.
28Tai Hodáay parmán ent ke taw zóráwar bebay.
Oo Hodá! Anchosh ke pésará kortaget, wati zór o wáká márá pésh bedár.
29Pa tai parasteshgáhay háterá ke Urshalimá ent
bádsháh pa taw thékia kárant.
30Kalam o kásháni nyámay rastará#68:30 Rastar, bezán derrókén jánwaré chó ke shér o polang. hakkal day o
kawmáni gwaskáni nyámá gókáni góromá.#68:30 Górom, bezán gókáni romb.
Rastar érdasta bit o nograha kárit.
Jangdóstén kawmán sheng o sháng kan.
31Kásed cha Mesrá káyant
Habashah eshtápiá wati dastán dém pa Hodáyá borzáda kant.
32Oo jahánay molkán! Pa Hodáyá sawt bejanét,
Hodáwandá gón sawtá benázénét, ósht...,
33hamáiá ke ásmánán shahswária kant, kwahnén ásmánán,
hamáiá ke wati áwázá borza kant, trond o porwákén áwázá.
34Hodáay kodratá jár bejanét,
ke shán o shawkati Esráilay sará ent o
kodrati, ásmánáni sará.
35Oo Hodá! Taw wati pákén jágahá bákamál ay,
Esráilay Hodá wati kawmá zór o wáka bakshit.
Hodáyá satá o saná bát.
Currently Selected:
Zabur 68: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
