Zabur 115
115
May Hodá arshá ent
1Márá enna, oo Hodáwand! Márá enna,
tai námá shán o shawkat berasát,
tai mehr o wapádáriay sawabá.
2Á dega kawm chéá begwashant:
“Esháni Hodá kojá ent?”
3May Hodá arshá ent,
harché ke áiá wassha bit, hamá kárá kant.
4Áyáni “hodá” nograh o teláh ant,
ensánay dastay jórh kortagén bot.
5Eshán dap per bale habar korta nakanant,
chammesh per bale dista nakanant,
6góshesh per bale eshkota nakanant,
pónzesh per bale bó cheta nakanant,
7dastesh per bale máreta nakanant,
pádesh per bale ráh shota nakanant,
na cha wati gotthá áwázé kassheta kanant.
8Harkas ke eshán jórha kant,
hamesháni paymá bit o
hamá mardom ham ke esháni sará tawkala kant.
9Oo Esráil! Hodáwanday sará tawkal kan,
hamá shomay komakk o espar ent.
10Oo Hárunay lóg! Hodáwanday sará tawkal kan,
hamá shomay komakk o espar ent.
11Oo Hodátorsán! Hodáwanday sará tawkal kanét,
hamá shomay komakk o espar ent.
12Hodáwandá márá yát kortag o
márá barkata dant,
Esráilay lógá barkata dant,
Hárunay lógá barkata dant.
13Hamáyán barkata dant ke Hodáwanday tors áyáni delá ent,
mazanén o kasánénán, yakk paymá.
14Hodáwand shomárá géshá cha géshter kanát,
shomay jend o chokk, doénán.
15Hodáwand shomárá barkat dayát,
zemin o ásmánay addh kanók.
16Borzén arsh Hodáwandayg ent o
zemini baniádamárá dátag.
17Mordag Hodáwandá nanázénant,
na á mardom ke rawant o bétawára bant.
18É má én ke Hodáwandá satá dayén,
annun tán abad.
Hodáwandá benázénét, Halléluyá.
Currently Selected:
Zabur 115: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
