Zabur 109
109
Sharmendagiay kabáh
Pa sázger o washalhánáni sálárá. Dáuday Zabur.
1Oo mani satáyáni Hodá!
Hámósh mabay.
2Chéá ke badkár o prébkárán
mani helápá wati dap pach kortag,
gón drógbandén zobánéá mani helápá gappesh jatag.
3Maná gón napratién habarán chapp o chágerdesh kortag,
bésawabá gón man pa jangá pád átkagant.
4Mani mehray badalá maná bohtámesh jatag,
bale man pa áyán nékén dwá kortag.
5Mani nékiáni badalá gón man badia kanant o
mehray badalá naprat.
6Gwashant: “Badkárén mardoméá eshiay chakká dawr day,
bell ke bohtám janóké eshiay rástén némagá óshtit.
7Wahdé áiay dadrasiá kanant,
mayárbár zánag bát o
dwái gonáh hesáb bátant.
8Róchi kammok bátant o
áiay ogdah o zemmawári degaréá berasát.
9Chokki chóraw bátant o
jani janózám.
10Chokki pendhók o darpadar bátant o
cha wati proshtagén lógán dar kanag bátant.
11Wámdári sajjahén mál o hastiá pach gerátant o
darámad áiay johdáni bar o samará barátant.
12Kass pa áiá mehrabán mabát o
áiay chórawáni sará bazzag makanát.
13Padréchi gár bátant o
námesh pa démi naslán sar mabát.
14Áiay pet o pirokáni gonáh Hodáwanday bárgáhá yát kanag bátant,
mátay gonáhi hechbar shódag mabátant.
15Gonáhesh modám Hodáwanday chammáni démá bátant,
Hodáwand áyáni yátá cha zeminá gár kanát.
16Chéá ke á hechbar pa kassá mehrabán nabut,
nézgár o hájatmandi ázár dátant o
delproshtagéni pa mark raséntant.
17Nálat kanagi wassha but,
áiay wati sará kapátant.
Barkat dayagi wassha nabut,
hechbar barkati marasát.
18Nálat kanagi chó pósháká gwará at,
ápay paymá áiay jáná ér nesht,
rógenay paymá haddháni shot.
19Nálat kabáhé bát o áiay jendá bepóshát o
kamarbandéay paymá modám áiay sréná bandók bát.”
20Cha Hodáwanday némagá mani bohtám janókáni mozz hamé bát,
hamá ke mani helápá badén habara kanant.
21Bale taw, oo Hodáwand, tahná taw
pa wati námaygi mani sará mehrabán bay,
cha wati mehray nékiá maná berakkén.
22Chéá ke man nézgár o hájatmandé án o
delon bátená thappig ent.
23Man chó bégáhi sáhegéá gára bán,
chó madagéá chandhaga bán.
24Cha róchagá kóndhon drahagá ant,
jesm o jánon ranjetag o lágar ent.
25Bohtám janókáni kalági án,
maná ke gendant, sará chandhénant.
26Maná komakk kan, oo Hodáwand, mani Hodá!
Pa wati mehraygi maná berakkén.
27Bell bezánant ke é tai dast ent,
ke é kár taw kortag, oo Hodáwand!
28Á nálata kanant,
bale taw barkat bedayátay.
Hamlah ke kanant, sharmendag bátant,
bale tai hezmatkár shádmáni bekanát.
29Mani dozhmenán roswáiay jámag gwará dayag bát o
sharmendagiay kabáhá póshénag bátant.
30Man cha wati zobáná Hodáwanday sakk báz shográ gerán,
bázén mardoméay démá áiá satá kanán.
31Chéá ke hájatmanday rástén némagá óshtit
tánke áiá cha dádrasáni hokmá berakkénit.
Currently Selected:
Zabur 109: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
