پولُسئے کاگد په رومیان 13

هکومتئے پرمانبَرداری

1هرکَس وتا هکومتئے چێردست بمَنّیت، پرچا که چه هُدائے نادێنتگێنا اَبێد#13‏:1 اَبێد (چه)، بزان گئیر چه. هچّ هکومت نێست و هر هکومتے که هست، هُدایا نادێنتگ. 2پمێشکا، هرکَس که چه هکومتا سَرکشّیَ کنت، بزان هُدائے نادێنتگێنئے هلاپا پادَ کئیت و هما که چُشَ کننت، وتی سرا مئیارباریَ کارنت. 3آ که شَرّێن کارَ کنت، آییا چه هکومتا نتُرسیت، بله آ که بدێن کارَ کنت، آییا تُرسیت. اگن لۆٹئے که چه هکومتئے تُرسا آزات ببئے، گڑا شَرّێن کار بکن و هکومت تئیی ستایا کنت. 4په تئیی شَرّیا، هکومت هُدائے هِزمتکار اِنت، بله اگن بدیَ کنئے، چه آییا بتُرس، چێا که زَهم مُپتا آییئے دستا نه‌اِنت. آ هُدائے هِزمتکار اِنت، همایانی سِزا دئیۆک اِنت که بدێن کارَ کننت. 5گڑا، باید اِنت هکومتئے چێردست ببئے، تهنا چه سزائے تُرسا نه، چه وتی زَمیرا هم. 6همے سئوَبا شُما سُنگ و مالیات هم دئیێت، پرچا که هاکم هُدائے هِزمتکار اَنت و مدام همے هکومتی کاران دَزگٹّ اَنت. 7هرکَسا آییئے هَکّا بدئیێت. اگن شُمارا سُنگ پِر، سُنگا بدئیێت، اگن مالیات پِر، مالیاتا بدئیێت. اگن کسے اِزّتَ کرزیت، آییئے اِزّتا بکنێت و اگن کسے شرپَ کرزیت، آییا شرپ بدئێت.

په یکدومیگا مِهر

8هچکَسئے وام شمارا پِر مبیت، شما گۆن یکدگرا تهنا مِهرئے وامدار ببێت، چێا که هرکَس که دومیا دۆستَ داریت، بزان شَریَتی برجاه داشتگ. 9پرچا که ”زنا مکن“، ”هۆن مکن“، ”دُزّی مکن“، ”لالچ مکن“#13‏:9 دَررئو 20‏:13‏-15، 17؛ موسّائے واز 5‏:17‏-19، 21. و آ دگه هُکم گۆن اے هبرا گوَنڈ گِرگَ بنت: ”وتی همساهگا وتی جندئے پئیما دۆست بدار.“#13‏:9 موسّائے واز 19‏:18‏. 10هما که مِهرَ کنت، گۆن همساهگا بدیَ نکنت. پمێشکا مِهر کنگ شَریَتئے سَرجمیا دارَگ اِنت.

11وهدا پَجّاه بیارێت و اَنچُش بکنێت. نون آ ساهت آتکگ که شما چه وابا پاد بیاێت، چێا که نون مئے رَکّگ چه آ وهدا نزّیکّتر اِنت که ما ائولا باورمند بوتێن. 12شپ، دێم په هلاسیا اِنت و رۆچ نزّیکّ اِنت. نون بیاێت تهاریئے کار و کِردان یلهَ کنێن و رُژنئے سِلاهانَ بندێن. 13بیاێت اِزّتمندێن زِندے گوازێنێن، هما زِند که رۆچئے رُژناییا گوازێنگَ بیت. وتی زِندا په ایّاشی، شرابنۆشی، بێننگی، بێهئیایی، اَڑ و کُڑ و هَسَدّ مگْوازێنێن. 14اے کارانی بدلا، هُداوندێن ایسّا مَسیها چۆ پۆشاکا گْوَرا بکنێت و وتی گُنهکارێن تَب و سَرِشتئے واهگانی سَرجم کنگئے رندا مبێت.

Currently Selected:

پولُسئے کاگد په رومیان 13: HPKB

Highlight

Copy

Compare