پولُسئے کاگد په رومیان 12

زِندگێن کُربانیگ

1او براتان! منی دَزبندی گۆن شما اِش اِنت که هُدائے رَهما بچارێت و وتی بدنا چۆ زِندگێن کُربانیگێا پێش بکنێت که پاک و پَلگار اِنت و هُدایا پَسُند اِنت. اے شمئے هکّیگێن اِبادت اِنت. 2گۆن اے دنیایا همرنگ و همدرۆشم مبێت، وتی پِگر و پَهما نۆک بکنێت و وتا بدل کنێت، تانکه شما اے زانتا سر ببێت که هُدائے رَزا چے اِنت، کجام چیزّ شَرّ و کامل اِنت و هُدایا پَسُند اِنت.

3گۆن همے رهمتان که منا بَکشگ بوتگ‌اَنت، شمارا هریَکّێا گوَشان که وتا چه وتی کدّ و کساسا بُرزتر سرپد مبێت. همینچُک ایمانئے اندازها که هُدایا شمئے سرا بهر کرتگ، هما ایمانئے هسابا، وتا هما کِساس سرپد ببێت که هَکّ و دلا هست‌اێت. 4اَنچۆ که مئے یکّێن بدنا بازێن آزاے هست و سجّهێن آزایانی کار یکّ نه‌اِنت، 5همے پئیما ما که باز اێن، مَسیهئے برکتا یکّێن بدن اێن و چه ما هر یکّے اَنچێن آزاے که گۆن آ دگران همگرنچ اِنت. 6اے رَهمتانی برکتا که مارا دئیگ بوتگ‌اَنت، ما پاکێن روهئے تَهر تَهرێن#12‏:6 تهر تهرێن، بزان وَڑ وَڑێن، دگه دگه پئیمێن. نیامتانی واهند اێن. اگن کَسێا هُدایی بَشارت سر کنگئے نیامت رَستگ، آییا اے نیامت وتی ایمانئے کدّا کار ببندیت؛ 7اگن اے نیامت هِزمت کنگ اِنت، هِزمت بکنت؛ اگن تالیم دئیگ اِنت، تالیم بدنت؛ 8اگن دِلبڈّی دئیگ اِنت، دِلبڈّی بدنت؛ اگن دگرانی مَدت کنگ اِنت، گۆن دَسپَچی مَدت بکنت؛ اگن پێشوایی و سرۆکی اِنت، گۆن دلگۆشداری سَرۆکی بکنت؛ اگن رَهم کنگ اِنت، گۆن وشّێن دلے رَهم بکنت.

مِهر

9شمئے مِهر باید اِنت په دل ببیت. شما چه بدیا نپرت بکنێت و گۆن نێکیا همگْرنچ ببێت. 10گۆن براتی مِهرے، یکدگرا دۆست بدارێت، په شرپ و اِزّت دئیگا چه یکدومیا دێماتر ببێت. 11شَرّێن کارا سُستی مکنێت. گۆن پاکێن روهئے زۆرا وتی کارا په هُبّ و واهگ بکنێت. هُداوندئے اِبادت و هِزمتا بکنێت. 12وتی اُمێتئے سرا گَل ببێت، سکّیانی تها سبر و اۆپار بکنێت و وتی دْوایان مُدام برجا بدارێت. 13هُدائے پَلگارتگێنانی هاجتانی پوره کنگا گۆن ببێت و مهمان‌دۆست ببێت.

14اگن کَسے شمارا آزارَ دنت، په آییا برکت بلۆٹێت، برکت بلۆٹێت و نالت مکنێت. 15اگن کَسے شادِهَ کنت گۆن آییا شادِه بکنێت و اگن کَسے گرێت گۆن آییا بگرێوێت. 16گۆن یکدومیا په همدلی زِند بگوازێنێت. پَهر و شان مکنێت، کمترێنانی همراه بئیگا لَجّ مکنێت. وتا باز دانا سرپد مبێت. 17گۆن کَسّا بدیئے بدلا بدی مکنێت. هما کارانی رندا ببێت که هرکَسئے چمّان شَرّ اَنت. 18همینچُک که شمئے دستا بیت، گۆن هرکَسا په سُهل و اێمنی زِند بگوازێنێت. 19او دُردانگێن دۆستان! بێر مگرێت، کَهر و گزبا په هُدایا بِلّێت. چێا که نِبشته اِنت: ”هُداوندَ گوَشیت: ’بێرئے گِرگ منی کار اِنت، سِزا دئیۆک من آن.‘“#12‏:19 موسّائے واز 32‏:35. 20بێر گرگئے بدلا:

”اگن تئیی دُژمن شُدیگ # 12‏:20 شُدیگ، بزان گُژنگ. اِنت، وراکی بدئے،

اگن تُنّیگ اِنت، آپی بدئے،

تئو که چُشَ کنئے، آییئے سرا رۆکێن جَل و اِشکر پِرَ رێچئے. # 12‏:20 آییئے سرا رۆکێن جَل و اِشکَر مُچَّ کنئے، بزان آییا پشل و شرمندگَ کنئے. “#12‏:20 سُلئیمانئے بَتَلانی کتاب 25‏:21‏-22.

21مئیل که بدی تئیی سرا سردست ببیت، گۆن نێکیئے زۆرا بدیا اێردست بکن.

Currently Selected:

پولُسئے کاگد په رومیان 12: HPKB

Highlight

Copy

Compare