زَبور 74
74
او هُدا! چیا مارا یله داتگِت؟
اساپئے شئیری گوَشتانک.
1او هُدا! چیا مارا تان اَبد یله داتگِت؟
په چے تئیی هِژمئے آس په تئیی چَراگاهئے پسان رۆک اِنت؟
2وتی کئومئے یاتا بکپ،
که تئو چه دێرێن زمانگان په بها زرتگاتنت،
که تئو مۆکِتگاَنت تان تئیی کئوم و میراس ببنت.
سَهیونئے کۆهئے هئیالا بکپ که اۆدا جهمنند بوتگئے.
3وتی گامان دێم په وتی همے مُدامیگێن وئیرانگان بترّێن،
چیا که دژمنا هر چیزّ بێران کرتگ که تئیی پاکێن جاگها بوتگ.
4دژمنان تئیی دیدارجاهئے تها گُرِّت و
وتی بئیرک#74:4 بئیرک، بزان پرچم. په نشانیا مِکّ کرتنت.
5همایانی پئیما اتنت که وتی تپران
جنگلئے درچکانی سرا بُرزَ برنت.
6آیان، تئیی پاکێن جاگهئے سجّهێن آجِتگێن دار
گۆن وتی تپر و تێشگان پرۆشت و هورت کرتنت.
7تئیی پاکێن جاگهاِش آس کَشِّت و هاک و پُر کرت،
تئیی نامئے منندجاهِش پَلیت کرت.
8وتی دلا گوَشتِش: ”آیان سَرجمیا وتی پنجگئے چێرا کارێن،“
گڑا هُدائے سجّهێن دیدارجاهِش اے سرڈگارا سۆتکنت.
9نون هچ نشانیے نگندگا اێن،
هچ نبیے پَشت نکپتگ و
چه ما کَسّ هم نزانت که تان کدێن اے پئیما بیت.
10او هُدا! تان کدێن دژمن تئیی سرا بکندیت؟
دژمن تان اَبد تئیی ناما بَد و رَد بکنت؟
11چیا وتی دستا پُشتا دارئے،
وتی راستێن دستا؟
دستا پَچ کن و په آیان گاری و تباهیے بیار.
12بله هُدا چه دێرێن زمانگان منی بادشاه اِنت،
که زمینئے سرا نجاتبَکشێن کارَ کنت.
13اے تئو اتئے که دریااِت گۆن وتی زۆر و واکا دو نێم کرت و
دریائے بَلاهانی سرِت آپانی نیاما پرۆشتنت،
14لیویاتانئے#74:14 لیویاتان مزنێن آپی رسترے بوتگ. سرِت پرۆشتنت و
گیابانئے سَهدارانی وراکِت کرت.
15جۆ و سرچمّگ، تئو رُمبێنت و رئوان کرتنت،
مُدامیگێن کئور، تئو هُشک کرتنت.
16رۆچ تئییگ اِنت و شپ هم تئیی
ماه و رۆچ تئو برجاه داشتگاَنت.
17اے تئو اتئے که زمینئے هَند و سیمسرِت گیشّێنتنت،
گرماگ و زمستانئے اڈّ کنۆک تئو ائے.
18او هُداوند! یاتا بکپ که دژمن چِه پئیما مسکرا کننت و
نازانتێن مردم تئیی ناما چِه پئیما بَد و رَدَ گوَشنت.
19وتی کپۆتا رسترانی وراک مکن و
ستم دیستگێن کئومئے زندا تان اَبد مشمۆش.
20وتی بستگێن اَهدا بدار،
چیا که اے سرڈگارئے تهارێن جاگه
چه زُلم و زۆرئے کُدۆه و کُداما پُرّ اَنت.
21مئیل که پادمالێن مردم گۆن رسوایی پد بکِنزنت،
سِتَم دیستگ و هاجتمند تئیی ناما ستا بکناتنت.
22او هُدا! جاه جن و وتی هکّئے دێمپانیا بکن،
یاتا بکپ که نازانت سجّهێن رۆچا چِه پئیما تئیی سرا کندنت.
23وتی دژمنانی کوکّاران مشمۆش،
دژمنانی شۆرشا که مُدام بُرزاد اِنت.
Currently Selected:
زَبور 74: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
