زَبور 73
73
زَبورئے سئیمی کتاب
زَبور 73—89
آ که چه تئو دور اَنت گار و گُمسارَ بنت
اساپئے زَبور.
1په راستی هُدا په اِسراییلا مهربان اِنت،
په همایان که دلِش ساپ اِنت.
2بله کمّے منتگاَت بٹگلان،
نزّیک اَت پاد بلکُشنت.
3چیا که په پُرکبران هسدّی بوتان،
هما وهدا که من بدکار آبادی و آسودگیا دیستنت.
4چیا که آیان تان مرکا دردے پِر نێست و
وشّ و سێرلاپ اَنت.
5آ دگرانی پئیما رنج و زهمتا نهاَنت و
مردمی بلاهانی تها نکپنت.
6پمێشکا کِبر آیانی گوَرئے هار اِنت و
هِژم و گَزب آیانی پۆشاک.
7چمِّش چه پزّۆریا در آتکگاَنت و
دلئے هئیالانِش هدّے نێست.
8په مسکرا و بدواهی هبرَ کننت،
په کِبر زُلم و ستما وتی زبانا کارنت.
9دپا آسمانئے هلاپا پچَ کننت و
زبانِش سجّهێن زمینا گیپت.
10پمێشکا کئوم دێم په آیانَ رئوت و
په گَلے همایانی دستئے آپانَ وارت.
11گوَشنت: ”هُدا چِه پئیما زانت؟
بُرزێن اَرشئے هُدایا اے ڈئولێن زانتکاری هست؟“
12هئو، بدکار چُش اَنت،
مُدام آسودگ اَنت و مال و مِلکتِش دێما رئوان اِنت.
13په راستی من وتی دل مُپت و ناهودگا پاک داشتگ و
دست مان بێگناهیا شُشتگاَنت.
14هر رۆچ آزاران کپتگان و
هر سُهبا هکّلَ وران.
15اگن بگوَشتێنُن: ”اے هبرانَ کنان،“
من تئیی چُکّانی نَسل درۆهتگاَت.
16وهدے اے سجّهێن چیزّانی زانگئے جُهدُن کرت،
په من گران اَت،
17تان هما وهدا که هُدائے پاکێن جاگها شتان.
نون اے مردمانی آکبتُن دیست.
18په راستی آیان لَکُشانکێن جاهانَ پِرّێنئے،
گار و گُمساریئے چاتا دئورَ دئیئے.
19اناگت گار و زئوالَ بنت،
چه تُرسا سَرجما بێرانَ بنت.
20وابێئے ڈئولا اَنت که وهدے چمّ پچَ بنت گارَ بیت،
آ وهدا که تئو پادَ کائے، او هُداوند،
اِشان وهمێئے پئیما مانَ نئیارئے.
21آ وهدا که منی اَرواه زَهر و تَهل اَت و
دل رێش،
22بێپَهم و نزانتکار اتان،
تئیی درگاها هئیوانێئے پئیما،
چه پَهم و پۆها ڈنّ.
23اَنگت هم مُدام گۆن تئو آن،
تئو منی راستێن دستا گرئے.
24گۆن وتی سر و سۆجان منا رهشۆنیَ کنئے و
رندا گۆن شان و شئوکتے زورئے.
25آسمانا، اَبێد چه تئو منا کئے هست؟!
زمینا هم، اَبێد چه تئو هچ چیزّے نلۆٹان.
26منی جسم و جان و دل بلکێن زئوال ببنت،
بله هُدا منی دلئے کلات اِنت،
تان اَبد منی گیشِّتگێن بَهرونڈ.
27په راستی آ که چه تئو دور اَنت گار و گُمسارَ بنت و
همایان بێرانَ کنئے که گۆن تئو بێوَپا اَنت.
28بله په من وشّی همِش اِنت که هُدائے نزّیکا ببان،
هُداوندُن وتی پناهگاه کرتگ،
تان تئیی سجّهێن کاران جار بجنان، او هُداوند!
Currently Selected:
زَبور 73: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
