زَبور 55
55
چه دژمنانی تئوارا هئیران آن
په سازگر و وشآوازانی سالارا. گۆن سیمّی سازان. داوودئے شئیری گوَشتانک.
1او هُدا! منی دْوایا بِشکن و
وتا چه منی زاری و پریاتان چێر مدئے.
2منی نێمگا دلگۆش کن و پَسّئو دئے،
وتی نالگ و زنگان پرێشان آن.
3چه دژمنانی تئوار و
چه بدکارانی کوکّاران بێتاگت و هئیران آن.
چیا که ناهکّا منا رنجێننت و
گۆن هِژمے منی دژمنیا کننت.
4دل مان سێنَگا اَزاب اِنت و
مرکئے تُرسُن سرا کپتگ و
5بیمّ و دِهشتا منا چێر ترّێنتگ.
6گوَشان: ”درێچا کپۆتی بالُن پِر بوتێن،
تانکه بالُن بکرتێن و آرام بگپتێنان،
7هئو! دێم په دورێن جاگهانَ شتان و
دشت و گیابانُن وتی هنکێنَ کرت. اۆشت...
8په اشتاپیَ شتان و جاهے چێرَ بوتان،
چه لوڑ و توپّانان دور.“
9 هُداوندا! آیانی زبانا اَنچش بتَرّێن
که یکدومیا سرپد مبنت،
چیا که شهرا جنگ و چۆپَ گندان.
10رۆچ و شپ شهرئے چاگردا دیوالانی سرا تَرّگا اَنت و
شهر چه نااِنساپی و پِتنها پُرّ اِنت،
11چه هرابی و بێرانیا سررێچ اِنت و
سِتم و رِپک، چه آییئے بازارا دورَ نبیت.
12اے دژمنے نهاِنت که منا شگانَ جنت،
اگن نه، منَ سگت،
بدواه نهاِنت که گۆن پَهرے منی دێما اۆشتاتگ،
اگن نه، چه آییا چێرَ بوتان.
13جی، تئو ائے منی مَٹّ،
منی بْراهُندگ و نزّیکێن دۆست،
14که مارا وشّێن همراهیے هستاَت
هما وهدا که گۆن مزنێن مُچّیے هُدائے لۆگا گامِنَ جت.
15مرک آیانی چَکّا بکپات و
زندهگۆرّ باتنت،
چیا که بدی آیانی لۆگ و دلانی تها اِنت.
16بله من هُدایا گوانکَ جنان و
هُداوند منا رَکّێنیت.
17بێگاه و سَباه و نێمرۆچا
زنگَ جنان و پریاتَ کنان و
آ منی تئوارا اِشکنت.
18منی جسم و جانا چه هما جنگا که دێما در آتکگ
په دْراهی و سلامتیَ رَکّێنیت،
بِلّ تُرے بازێنے منی دێما اۆشتاتگ.
19هُدا که چه اَزَل وتی بادشاهی تهتئے سرا نِشتگ،
اِشکنت و شرمندگِشَ کنت. اۆشت...
چیا که بدلَ نبنت و
هُداتُرسیاِش نێست.
20منی بْراهُندگا وتی دست دۆستانی هلاپا شهارت و
وتی کئولی پرۆشت.
21زبانی چۆ ٹێلا چرپ اَت
بله دلی جنگیگ،
دپئے هبری چه رۆگنا نرمتر،
بله کَشّتگێن زَهم اتنت.
22وتی پرێشانیان په هُدایا بِلّ،
که آ تئیی دارۆک اِنت،
آ هچبر پهرێزکاران کپگا نئیلیت.
23بله تئو، او هُدا،
بدکاران جُهلترێن کَلّا دئورَ دئیئے،
هۆنوار و پرێبکارێن مردم
وتی رۆچانی نێما هم زندگَ نماننت،
بله من تئیی سرا تئوکلَ کنان.
Currently Selected:
زَبور 55: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
