لوکا 7

پئوجی اَپسرئے ایمان

(مَتّا 8‏:5‏–13؛ یوهَنّا 4‏:43‏–54)

1وهدے ایسّایا گۆن مردمان وتی هبر هلاس کرتنت، کَپَرناهوما شت. 2اۆدا، یکّ پئوجی اَپسرێا هِزمتکارے هست‌اَت که اَپسرا آییئے باز کدْرَ کرت. آ هِزمتکار نادْراه اَت و مَرکیگ اَت. 3وهدے اَپسر ایسّائے بارئوا سَهیگ بوت، آییا یَهودیانی لهتێن کماش ایسّائے کِرّا راه دات تانکه چه آییئے دزبندی بکننت که بیئیت و آییئے هِزمتکارا دْراه بکنت. 4کماش ایسّائے کِرّا آتکنت، سکّ باز مِنّتِش کرت و گوَشتِش: ”اے پئوجی اَپسرَ کرزیت که تئو په آییا اے کارا بکنئے. 5چێا که مئے کئوما دۆستَ داریت و مئے کَنیسَه همشیا بستگ.“

6ایسّا آیانی همراه بوت و شت. وهدے لۆگئے نزّیکّا رَستنت، پئوجی اَپسرا وتی لهتێن دۆست کاسِد کرت و په ایسّایا کُلئوی رئوان دات: ”او هُداوند! وتا زهمتوار مکن. منَ نکرزان که تئو منی لۆگا بیائے و 7منی دلا من اے لاهک هم نه‌آن که تئیی کِرّا بیایان. تئو تهنا هُکم بکن، منی هِزمتکار دْراهَ بیت. 8چێا که من هم وتی مسترانی اِهتیارئے چێرا آن و منی دستئے چێرا هم سپاهیگ هست. اگن کَسێا بگوَشان ’برئو،‘ آ رئوت و اگن کَسێا بگوَشان ’بیا،‘ آ کئیت. اگن وتی هِزمتکارا بگوَشان ’پِلان کارا بکن،‘ آ کنتی.“

9وهدے ایسّایا اے هبر اِشکت، هئیران بوت، دێمی گۆن هما مُچّیا کُرت که آییئے رَندا گۆن اَت و گوَشتی: ”شمارا گوَشان، من چُشێن مُهرێن ایمان اِسراییلیانی تها هم ندیستگ.“ 10وهدے پئوجی اَپسرئے کاسِد پِر ترّت و لۆگا آتکنت، دیستِش که هِزمتکار وشّ و دْراه اِنت.

جنۆزامێئے چُکّئے زندگ کنگ

11دێر نگوَست که ایسّا گۆن وتی مُرید و دگه بازێن مردمێئے همراهیا نایین نامێن شهرێا شت. 12وهدے شهرئے دروازگئے نزّیکّا رَست، دیستی که مردم یکّ مُردگے چه شهرا ڈنّ برگا اَنت که آ وتی جنۆزامێن ماتئے یکّێن چُکّ اَت. شهرئے بازێن مردمے جنۆزامئے همراه اَت. 13وهدے هُداوندێن ایسّایا آ جنۆزام دیست، آییئے سرا سکّ بَزّگی بوت و گوَشتی: ”مگرێو.“ 14نزّیکّ آتک و جنازه‌ای دست پِر کرت، مُردگئے کۆپگ دئیۆک اۆشتاتنت. ایسّایا مُردگ گْوانک جت: ”او وَرنا! من ترا گوَشان، پاد آ.“ 15مُردگ پاد آتک و نِشت و هبرا لگّت. ایسّایا آ وَرنا ماتارا دات.

16سجّهێنانی دلا تُرسے نِشت و هُدایا سِپَت و سَنا کنانا گوَشتِش: ”مئے کِرّا یکّ مزنێن نبیے آتکگ“ و ”هُدا وتی کئومئے کُمکّ کنگا آتکگ.“ 17ایسّائے هال سجّهێن یَهودیَه و کِرّ و گوَرئے دَمگان شِنگ بوت.

یَهیائے کاسِد

(مَتّا 11‏:2‏–15)

18پاکشۆدی دئیۆکێن یَهیائے مُریدان یَهیا چه ایسّائے اے سجّهێن کاران سَهیگ کرت. گڑا یَهیایا چه وتی مُریدان دو کَس لۆٹاێنت و 19په جُست کنگا هُداوندێن ایسّائے کِرّا دێم داتنت که بارێن تئو هما ائے که آیگی اَت، یا ما دگرێئے اُمێتا بنندێن؟

20آ دوێن ایسّائے کِرّا آتکنت و گوَشتِش: ”مارا پاکشۆدی دئیۆکێن یَهیایا په اے هبرئے جُستا راه داتگ که بارێن تئو هما ائے که آیگی اَت، یا دگرێئے اُمێتا بنندێن؟“ 21هما وهدا ایسّا بازێن ناجۆڑ و نادْراهے دْراه کنگا اَت، جِنّیانی جِنّان کَشّگا ات و بازێن کۆرێئے چمّان رُژنا کنگا اَت. 22ایسّایا پَسّئو داتنت: ”هرچے که شما دیستگ و اِشکتگ، برئوێت یَهیایا سهیگ کنێت که کۆر گِندگا اَنت، لَنگ تَرّگا اَنت، گَرّئے نادراه دْراه بئیگا اَنت، کَرّ اِشکنگا اَنت، مُردگ زندگ بئیگا اَنت و گریبان وشّێن مِستاگ سر بئیگا اِنت. 23بَهتاور هما اِنت که منی سئوَبا ٹَگل مئوارت.“

یَهیائے بارئوا

(مَتّا 11‏:7‏–19)

24وهدے یَهیائے کاسِد در کپت و شتنت، ایسّا گۆن مردمان یَهیائے بارئوا گپّ و تْران کنگا لَگّت: ”شما چۆنێن چیزّێئے چارگا گیابانا شتێت؟ کَلَم و کاشێئے#7‏:24 کاش کاهے که کئورانی کَش و کِرّانَ رُدیت. چارگا که گۆن گواتئے کَشّگا اے دێم و آ دێمَ بیت؟ 25اگن نه، گڑا چۆنێن چیزّێئے چارگا شتێت؟ اَنچێن مردێئے چارگا شتێت که نرم و نازرکێن پۆشاکی گوَرا اَت؟ آ مردم که بْرَهدارێن پۆشاک گوَرا کننت و هستۆمندانی ڈئولا زِندَ گوازێننت، کَلاتان نِشتگ‌اَنت. 26گڑا اۆدا شما چۆنێن چیزّێئے چارگا شتێت؟ پئیگمبرێئے چارگا؟ هئو، شمارا گوَشان، انچێنێئے چارگا که چه پئیگمبرێا هم مستر اِنت. 27آ هما اِنت که آییئے بارئوا نبشته کنگ بوتگ: بچار، من وتی کاسِدا چه تئو پێسر راهَ دئیان که تئیی راها تچک و هموارَ کنت. 28من شمارا گوَشان که هچّ ماتا چُشێن چُکّ نئیاورتگ که چه یَهیایا مستر ببیت. بله هُدائے بادشاهیا، هما که چه سجّهێنان کَستر اِنت، آ چه یَهیایا هم مستر اِنت.“

29وهدے یَهیایا هُدائے پئیگام آورت، بازێن مردمێا که آیانی تها سُنگی و مالیاتگیر هم گۆن اَتنت، یَهیائے دستا پاکشۆدی کرت و اے پئیما مَنِّت که هُدا بَرهکّ اِنت. 30بله پَریسی و شَریَتئے کازیان یَهیائے دستا پاکشۆدی نگپت و هُدائے ارادهِش په وت نَزُرت.

31”په اے زمانگئے مردمان کئیی مِسالا بدئیان که آ کئیی پئیما اَنت؟ 32آ، هما چُکّانی پئیما اَنت که بازارا نِشتگ‌اَنت و یکدومیا#7‏:32 یکدومی، بزان یَکدِگَر، یَکّ و دومی. گوَشگا اَنت:

’ما په شما نل جت، بله شما ناچ نکرت،

ما مۆتک#7‏:32 مۆتک: په مُردگا پِریات و زاری، گرێوگ و زار جَنَگ. جت، بله شما نگرێت.‘

33پاکشۆدی دئیۆکێن یَهیا آتکگ، نه نانی وارت و نه شرابی نۆشت و شما گوَشێت جِنّے پِر اِنتی، 34بله انسانئے چُکّ آتکگ، وارت و نۆشیت و شما گوَشێت: ’لاپی و شرابیے، مالیاتگیر و گُنهکارانی سَنگت اِنت.‘ 35بله داناییئے راستیا هما زاهرَ کننت که آییئے رَندگیر و مَنّۆگر اَنت.“

گُنهکارێن جنێنے ایسّائے پادان اَترَ مُشیت

36چه پَریسیان یکّێا گۆن ایسّایا گوَشت که تئو نانا گۆن من ائے. ایسّا آییئے لۆگا شت و په ورگا پَرزۆنَگئے#7‏:36 پَرزۆنَگ، بزان سُپره. سرا نِشت. 37آ شهرا گُنهکارێن جنێنے هست‌اَت. وهدے آ سَهیگ بوت که ایسّا اے پَریسیئے مهمان اِنت، اَلباسترئے#7‏:37 اَلباستر نرمێن سنگے. اَتردانێئے اَتری زرتنت و آتک. 38ایسّائے پُشتا آییئے پادانی نزّیکّا گرێوانا اۆشتات. گۆن وتی اَرسان ایسّائے پادی ترّ کرتنت، گۆن وتی مودان هُشکی کرتنت و چُکّتنت و اَتری پِر مُشتنت.

39وهدے آ پَریسیا که ایسّا مهمان کرتگ‌اَت اے دیست، وتی دلا گوَشتی: ”اگن اے مرد پئیگمبرے بوتێن، اَلّما زانتگ‌اَتی اے جنێن که آییا دست پِر کنگا اِنت، کئے اِنت و چۆنێن گُنهکارے.“ 40ایسّایا گوَشت: ”او شَمون! منا گۆن تئو یکّ هبرے هست.“ آییا گوَشت: ”جی استاد، بگوَش!“

41ایسّایا گوَشت: ”مردێا دو وامدار هست‌اَت، یکّے پنچ سَد دینار و دومی پنجاه دینارا وامدار اَت، 42بله آ دوێنان په وامانی دئیگا هچّ نێست‌اَت، پمێشکا وام دئیۆکا آیانی وام بَکشتنت. نون چه آ دوێنان کجامیا وام دئیۆک گێشتر دۆستَ بیت؟“ 43شَمونا پَسّئو دات: ”منی هئیالا، هما که آییئے وام گێشتر اَتنت.“ ایسّایا پَسّئو دات: ”تئو شَرّ گوَشت.“

44گڑا ایسّایا جنێنئے نێمگا چَکّ تَرّێنت و گۆن شَمونا گوَشتی: ”اے جنێنا گندئے؟ من تئیی لۆگا آتکان، تئو منا پادانی شۆدگا ترَمپے آپ ندات، بله اے جنێنا منی پاد گۆن وتی اَرسان تَرّ کرت و گۆن مودان هُشک کرتنت. 45تئو منا نچُکّت، بله اے جنێن چه منی رَسگا تان اے وهدی یپّئیما منی پادان چُکّگا اِنت. 46تئو منی سرا رۆگن پِر نمُشت، بله آییا منی پادانا اَتر پِر مُشت. 47پمێشکا ترا گوَشان که اے جنێنئے بازێن دۆستیئے سئوَب اِش اِنت که اِشیئے بازێن گناهے بَکشگ بوت، بله آ که دۆستی‌ای کمتر اِنت، هما اِنت که بَکشتگێن گناهی کمتر اَنت.“ 48گڑا گۆن جنێنا گوَشتی: ”تئیی گناه بَکشگ بوتنت.“

49بله اے دگه مهمان گۆن یکدگرا گوَشگا لگّتنت: ”اے کئے اِنت که مردمانی گناهان هم بَکشیت؟“ 50نون ایسّایا گۆن آ جنێنا گوَشت: ”تئیی ایمانا ترا رَکّێنت، په وشّی و سلامتی برئو.“

Currently Selected:

لوکا 7: HPKB

Highlight

Copy

Compare