لوکا 5

ایسّائے ائولی مُرید

(مَتّا 4‏:18‏–22؛ مَرکاس 1‏:16‏–20)

1یکّ رۆچے ایسّا گِنی‌سارِتئے مَزَن‌گوَرمئے#5‏:1 بزان جَلیلئے مَزَن‌گوَرم. مَزَن‌گوَرم، بزان دریاچه. لَمبا#5‏:1 لَمب، بزان دامن، کِرّ. اۆشتاتگ‌اَت و بازێن مردمے هُدائے هبرانی گۆش دارگا آییئے چپّ و چاگردا مُچّ اَت. 2آییا گوَرمئے کِرّا دو بۆجیگ#5‏:2 بۆجیگ، بزان لانچ، کَشتی. دیست. ماهیگیر چه بۆجیگان اێر کپتگ‌اَتنت و وتی دام و ماهۆران شۆدگا اَتنت. 3ایسّا چه هما بۆجیگان یکّێا که شَمونئیگ اَت، سوار بوت. گۆن شَمونا گوَشتی: ”بۆجیگا چه هُشکیا کمّے دور ببر.“ رَندا نِشت و چه بۆجیگا مردمانی تالیم دئیگا لگّت.

4وهدے هبری هلاس کرت، گۆن شَمونا گوَشتی: ”بۆجیگا گوَرمئے جُهلانکیان ببر و شما وتی دامان په ماهیگئے گِرگا آپا دئور بدئیێت.“ 5شَمونا گوَشت: ”واجه! دۆشی ما سجّهێن شپ دلسیاهی کَشّتگ و مارا هچّ ماهیگ دست نکپتگ، بله نون که تئو گوَشئے، من دامان آپا دئورَ دئیان.“ 6آیان دام آپا دئور داتنت و همینچُک ماهیگِش گپت که دام دِرَگی بوتنت. 7پمێشکا، دومی بۆجیگئے همکارِش په کُمکّا اِشاره کرتنت. آ آتکنت و دوێن بۆجیگ چه ماهیگا همینکدر پُرّ بوتنت که بُڈّگی بوتنت.

8وهدے شَمون‌پِتْرُسا اے کار دیست، ایسّائے پادان کپت و گوَشتی: ”او هُداوند! منا یله دئے و برئو، چێا که من گُنهکارے آن.“ 9اینچُک ماهیگئے گِرگا، شَمون‌پِتْرُس و آییئے سجّهێن همکار هئیران بوتنت. 10همے ڈئولا زِبْدیئے دوێن چُکّ آکوب و یوهَنّا که شَمونئے شریکدار اَتنت، آ هم هئیران بوتنت. ایسّایا گۆن شَمونا گوَشت: ”متُرس! چه اِد و رَند ماهیگئے بدلا تئو مردمانی دلان شکارَ کنئے.“#5‏:10 دلئے شکار کنگئے مکسد مردمان هُدائے راها آرگ اِنت. 11پدا آیان وتی بۆجیگ هُشکیا آورتنت و وتی سجّهێن کار و بار یله داتنت و ایسّائے همراه بوتنت.

گَرّئے نادراهێئے دْرهبکشی

(مَتّا 8‏:2‏–4؛ مَرکاس 1‏:40‏–45)

12دگه رۆچے ایسّا یکّ شهرێا اَت. اۆدا مردے سرا تان پادا گَرّئے نادْراهیا گپتگ‌اَت. وهدے ایسّایی دیست، دێم په چێر کپت و دَزبندی‌ای کرت: ”او واجه! اگن تئو بلۆٹئے، منا دْراه و پَلگار#5‏:12 پلگار، بزان ساپ و سَلّه، بێپۆلِنگ. کرتَ کنئے.“#5‏:12 تئوراتا گَرّئے نادْراه پلیت و ناپاک زانگ بوتگ‌اَنت. اگن کَسے چه اے ناجۆڑیا دْراه ببیت، دینی پێشواێئے گوَرا برئوت و هئیراتے بکنت، اَنچۆ که موسّائے شَریَتَ گوَشیت. 13ایسّایا وتی دست شهارت، دستی پِر مُشت و گوَشتی: ”منَ لۆٹان. دْراه و پَلگار بئے!“ هما دمانا مرد چه گَرّا دْراه بوت. 14ایسّایا هُکم دات و کَڈّن#5‏:14 کَڈَّن، بزان مُهرێن تاکید، هُکم. کرت: ”اے هبرا گۆن هچکَسا مگوَش، بله برئو، وتا دینی پێشوایا پێش بدار و په وتی پاکی و پَلگاریا هما کُربانیگا هئیرات بکن که موسّایا هُکم داتگ، تانکه په آیان شاهدیے ببیت.“ 15بله ایسّائے نام و تئوار اَنگت هم هر جاه شِنگ و تالانَ بوت و بازێن مردمے په آییئے هبرانی گۆش دارگ و وتی ناجۆڑیانی دْراه کناێنگا آتک و آییئے کِرّا مُچَّ بوت. 16په دْوا کنگا ایسّا گێشتر گیابانانَ شُت.

لَنگ و مُنڈێن مردێئے دْرهبکشی

(مَتّا 9‏:2‏–8؛ مَرکاس 2‏:1‏–12)

17یکّ رۆچے ایسّا تالیم دئیگا اَت. لهتێن پَریسی و شَریَتئے استاد همۆدا نِشتگ‌اَت. آ چه جَلیلئے و یَهودیَهئے سجّهێن مێتگان و چه اورشَلیما آتکگ‌اَتنت. په نادْراهانی دْراه کنگا هُداوندئے زۆر و توان گۆن ایسّایا گۆن اَت. 18هما وهدا لهتێن مردما لَنگ و مُنڈێن مردے تَهتێئے سرا آورت. آیان باز جُهد کرت که آییا ایسّائے دێما بیارنت، 19بله چه مردمانی بازیا لۆگئے تۆکا آورتِشَ نکرت. پمێشکا، لنگێن مردِش زرت، لۆگئے سرا سر کپتنت، لۆگئے سَرِش ٹُنگ کُرت و آاِش گۆن تَهتا ایسّائے دێما اێر دات. 20وهدے ایسّایا آیانی ایمان دیست، گوَشتی: ”او منی دۆست! تئیی گناه بَکشگ بوتنت.“ 21چه ایسّائے اے هبرا پَریسی و شَریَتئے اے دگه زانۆگر که اۆدا نِشتگ‌اَتنت، پِگر کنگا لگّتنت: ”اے کئے اِنت که کُپرَ کنت؟ هُدائے جندا اَبێد دگه کَسّ گناهان بَکشتَ نکنت.“ 22بله ایسّایا آیانی دلئےهبر زانت و گوَشتی: ”شما چێا وتی دلا چُشێن هئیالَ کارێت؟ 23کجام هبرئے گوَشگ آسانتر اِنت: ’تئیی گناه بَکشگ بوتگ‌اَنت،‘ یا: ’پاد آ، بِترّ‘؟ 24بله من اے هبر کرت تانکه شما بزانێت که انسانئے چُکّا#5‏:24 دانیال نبیا ”اِنسانئے چُکّ“ په اَنچێن هَستیێا کارمرز کرتگ که چه آسمانا اێرَ کئیت. ایسّایا وتا ”اِنسانئے چُکّ“ گوَشتگ تانکه مردم بزاننت که آ چه آسمانا آتکگ و هما واده داتگێن مَسیه اِنت. اے دنیایا گناهانی بَکشگئے واک و اِهتیار هست.“ پدا گۆن آ لَنگا گوَشتی: ”ترا گوَشان، پاد آ، وتی تهتا بزور و لۆگا برئو.“ 25هما دمانا، آیانی دێما مرد پاد آتک، وتی تهتی زرت و هُدایا سِپَت و سَتا کنانا لۆگا شت. 26سجّهێن هئیران و هَبَکّه بوتنت، هُدااِش سَتا کرت و ساڑات و په تُرسے گوَشتِش: ”مرۆچی ما هئیران کنۆکێن کار دیستگ.“

لاویئے لۆٹگ

(مَتّا 9‏:9‏–13؛ مَرکاس 2‏:13‏–17)

27رَندا، ایسّا ڈنّا در آتک و لاوی نامێن سُنگی و مالیاتگیرے دیستی که وتی کارگِسا نِشتگ‌اَت. ایسّایا گوَشت: ”بیا، منی رَندگیریا بکن.“ 28لاوی پاد آتک و سجّهێن چیزّی یله داتنت و آییئے همراه بوت.

29گڑا لاویا وتی لۆگا ایسّائے شرپا مزنێن مهمانیے کرت. اے مهمانیا بازێن مالیاتگیر و لهتێن دگه مردم هم گۆن اَت.#5‏:29 بنی اِسراییلیان، سُنگی و مالیاتگیرێن مردم نادۆست اَتنت، چێا که آ رومئے هکومتئے کارنده اَتنت و بازێنێا په وتی نَپ و سوتّا چه مردمان گێشێن سُنگ و باجَ گپت. 30پَریسی و آیانی شَریَتئے زانۆگران گۆن ایسّائے مُریدان گِلگ کرت و گوَشت: ”شما چێا گۆن سُنگی و گُنهکاران یکّێن وانئے سرا ورێت و نۆشێت؟“ 31ایسّایا گوَشت: ”دْراه و سلامتێن مردمان تبیب پکار نه‌اِنت، نادْراهان پکار اِنت. 32من پهرێزکارانی گْوانک جنَگا نئیاتکگان، گُنهکارانی گْوانک جنَگا آتکگان، که آ تئوبه بکننت.“

رۆچگئے بارئوا

(مَتّا 9‏:14‏–17؛ مَرکاس 2‏:18‏–22)

33چه ایسّایا جُستِش کرت: ”یَهیائے مُرید گێشتر رۆچگَ بنت و دْوا کننت. پَریسیانی مُرید هم اَنچُشَ کننت، بله تئیی مُرید مُدام ورنت و نۆشنت.“ 34ایسّایا گوَشت: ”تان وهدے که سالۆنک گۆن سورئے مهمانان گۆن اِنت، آ په رۆچگئے دارگا هُجّ کنگَ#5‏:34 هُجّ کنگ، بزان زۆر دئیگ، مجبور کنگ. بنت؟ 35بله وهدے کئیت که سالۆنک چه آیان جتا کنگَ بیت، گڑا آ رۆچگَ بنت.“

36ایسّایا اے مِسال هم دات: ”هچکَس چه نۆکێن پَشکێا ٹُکُّرے نبُرّیت و کوَهنێن پَشکا پَچَّ نجنت. اگن آ چُش بکنت، گڑا بزان نۆکێن پَشکی درتگ و کوَهنێن پَشک هم گۆن نۆکێن پَچّا ڈئولدارَ نبیت. 37همے ڈئولا هچکَس نۆکێن شرابا کوَهنێن مَشکان مانَ نکنت، چێا که نۆکێن شراب مَشکا تْراکێنیت. شرابَ رِچنت و مَشک هم بربادَ بنت. 38نۆکێن شراب باید اِنت نۆکێن مَشکا مان کنگ ببیت. 39کَسے که کوَهنێن شرابئے ورگا هێلدار اِنت، نۆکێن شرابَ نئوارت. آییئے دلا کوَهنێن شراب شَرتر اِنت.“

Currently Selected:

لوکا 5: HPKB

Highlight

Copy

Compare