یوهَنّا 3
3
ایسّا و نیکودیموس
1نیکودیموس نامێن پَریسیے هستاَت که چه یَهودیانی سرۆکانی دیوانئے باسکان#3:1 باسک، بزان مِمبر، پارسیا عضو، اردوا رُکن. یکّے اَت. 2یکّ شپے ایسّائے کِرّا آتک و گۆن آییا گوَشتی: ”او اُستاد! ما زانێن که تئو اُستادے ائے و چه هدائے نێمگا آتکگئے، چێا که تان هدا گۆن کَسێا گۆن مبیت، آ چُشێن مۆجزه و اَجَبَّتێن نشانی پێش داشتَ نکنت که تئو پێش دارگا ائے.“ 3ایسّایا آییئے پَسّئوا گوَشت: ”ترا راستێنَ گوَشان، تانکه کَسے دوبَر#3:3 یا: چه بُرزا، چه آسمانا. پێدا مبیت، هدائے بادشاهیا دیستَ نکنت.“ 4نیکودیموسا جُست کرت: ”چۆن بوتَ کنت که پیرێن مردمے دوبَر پێدا ببیت؟ بوتَ کنت که پدا ماتئے لاپا برئوت و پێدا ببیت؟“ 5ایسّایا پَسّئو دات: ”ترا راستێنَ گوَشان تانکه کَسے چه آپ و روها پێدا مبیت، هدائے بادشاهیا پاد اێر کرتَ نکنت. 6آ چیزّ که چه جسما پێدا بیت، جسم اِنت و آ چیزّ که چه روها پێدا بیت، روه اِنت. 7هئیران مبئے که من ترا گوَشان په شما الّمی اِنت که دوبَر#3:7 یا: چه بُرزا، چه آسمانا. پێدا ببێت. 8گوات هر جاه که بلۆٹیت، کَشّیت. تئو آییئے تئوارا اِشکنئے، بله نزانئے چه کجا کئیت و کجا رئوت. آ کس که چه روها پێدا بیت، آ هم اَنچُش اِنت.“#3:8 یونانی زبانا ”گوات“ و ”روه“ یَکّێن گال اِنت.
9نیکودیموسا جوابا گوَشت: ”اے چۆن بوتَ کنت؟“ 10ایسّایا درّاێنت: ”تئو اِسراییلیانی اُستادے ائے، اے گپّا نزانئے؟ 11ترا راستێنَ گوَشان، ما هما چیزّانی بارئوا هبرَ کنێن که آیانَ زانێن و هما چیزّانی شاهدیا دئیێن که ما دیستگاَنت. بله شما مئے شاهدیا نمَنّێت. 12وهدے من زمینی چیزّانی بارئوا هبرَ کنان، شما باوَرَ نکنێت. اگن آسمانی چیزّانی بارئوا هبر بکنان، گڑا چِه پئیما باوَرَ کنێت؟ 13هچکس آسمانا نَشُتگ، اَبێد چه#3:13 اَبێد (چه)، بزان گئیر چه. هماییا که چه آسمانا اێر آتکگ، بزان انسانئے چُکّ. 14هما ڈئولا که موسّایا گیابانا مار چه زمینا چست کرت،#3:14 موسّائے زمانگا گیابانا اِسراییلی کئوما ناپرمانی کرت، گڑا بازێن مارے آیانی سرا کپت. بازێن مردمے مارا وارت و مُرتنت. هدایا گۆن موسّایا گوَشت که بْرنجئے مارے دارێئے سرا دْرنج. هرکس که اے مارا چاریت، چه مرکا رکّیت. انسانئے چُکّ هم زلور چست کنگَ بیت، 15تانکه هرکس که آییئے سرا ایمانَ کاریت، اَبدمانێن زِندئے واهند ببیت.“ 16چێا که هدایا جهان همینچُک دۆست داشت که وتی یکدانگێن چُکّی نَدر کرت تانکه هرکس که هدائے چُکّئے سرا ایمانَ کاریت، گار و زیان مبیت و تان اَبد زندگ بمانیت. 17هدایا وتی چُکّ په جهانئے مئیاربار کنگا جهانا رئوان ندات، پمێشکا رئوانی دات که آییئے وسیلها جهانا نجات برسیت. 18هرکس که چُکّئے سرا ایمانَ کاریت، مئیاربارَ نبیت، بله هرکس که ایمانَ نئیاریت، چه پێسرا مئیاربار اِنت، چێا که هدائے یکدانگێن چُکّئے نامئے سرا ایمانی نئیاورتگ. 19مئیارباریئے سئوَب اِش اِنت: نور جهانا آتک، بله نورئے بدلا مردمان تهاری دۆست داشت، پرچا که آیانی کار سِلّ اَتنت. 20چێا که آ مردم که سِلّێن کارانی راها زوریت، چه نورا نپرتَ کنت و وتا چه نورا دورَ داریت که آییئے کار و کِرد زاهر مبنت. 21بله هما که راستیئے راها زوریت، دێم په نورا کئیت تانکه زاهر ببیت که آییئے کار هدایی بوتگاَنت.
ایسّا و یَهیا
22اِشیا رند ایسّا گۆن وتی مُریدان یَهودیَهئے دمگئے مێتگ و کلّگانَ شت و گۆن آیان همۆدا داشتی#3:22 دارگ، بزان جَلّگ، اۆشتگ، مانَگ. و مردمی پاکشۆدیَ داتنت. 23یَهیا هم شالِمئے نَزّیکّا، ائینۆنا مردمان پاکشۆدی دئیگا اَت. اۆدا آپ باز اَت و مردم په پاکشۆدی کنگا آتکنت. 24آ وهدا یَهیا اَنگت زندانا بند کنگ نبوتگاَت.
25شُشت و شۆدی رسمانی سرا یَهیائے لهتێن مُرید و یکّ یَهودیێئے نیاما دَپجاکے بوت. 26گڑا یَهیائے مُرید یَهیائے کِرّا آتکنت و گوَشتِش: ”او اُستاد! هما مرد که اُردُنئے کئورئے آ دستا گۆن تئو گۆن اَت و تئو آییئے بارئوا گواهی دات، بچار، آ پاکشۆدی دئیگا اِنت و سجّهێن مردم هماییئے کِرّا رئوگا اَنت.“ 27یَهیایا آیانی پَسّئوا گوَشت: ”تانکه هدا مدنت، انسانا هِچَّ نرسیت. 28شما وت شاهد اێت، من گوَشت که من مَسیه نهآن، بله چه آییا پێسر رئوان دئیگ بوتگان. 29بانۆر سالۆنکئیگ اِنت، بله سالۆنکئے سنگت که اۆشتاتگ و سالۆنکئے تئوارا اِشکنت، گَل و شادانَ بیت. منا اَنچێن کاملێن شادمانیے رَستگ. 30آ باید اِنت دێماتر ببیت و من پداتر ببان.“
آ که چه آسمانا کئیت
31آ که چه بُرزا کئیت، چه سجّهێنان بُرزتر اِنت و آ که چه اے هاکیێن دنیایا اِنت، زمینی مردمے و دنیایی چیزّانی بارئوا هبرَ کنت. آ که چه آسمانا کئیت چه سجّهێنان بُرزتر اِنت. 32هرچے که دیستگ و اِشکتگی، همایانی گواهیا دنت، بله کسّ آییئے گواهیا نمَنّیت. 33هرکسا که مَنِّتگ، گواهیای داتگ که هدا راستیئے جند اِنت.
34آ که هدایا رئوان داتگ، هدائے هبرانَ کنت، چێا که هدا وتی روها آییارا بێهسابَ بَکشیت. 35پت چُکّا دۆستَ داریت و سجّهێن چیزّی هماییئے دستا داتگاَنت. 36آ کس که چُکّئے سرا ایمانَ کاریت، اَبدمانێن زِندئے واهندَ بیت، بله آ که چُکّا نمَنّیت، زِندئے واهندَ نبیت و هدائے کَهر و گزبئے تها مانیت.
Currently Selected:
یوهَنّا 3: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2026, Wycliffe Bible Translators, Inc. and the Balochi Bible Translation Team. All rights reserved.