دَرگوَز 39

دینی پێشواییئے گُد

1چه آسمانی و جَمو و سُهرێن پَژما دَزگواپێن گُدِش اَڈّ کرت که وهدے پێشوا په هِزمت کنگا پاکێن جاگها رئوت، گوَرااِش بکنت. هما پئیما که هُداوندا موسّا هُکم داتگ‌اَت، په پێشواێن هارونا پاکێن گُدِش اَڈّ کرت.

اێپۆد

2اێپۆدِش چه تلاها و چه آسمانی و جَمو و سُهرێن پَژم و هورت‌گواپێن لیلُما اَڈّ کرت. 3آیان تلاهئے نازُرکێن تاک ٹَپِّت و تئیار کرت. تاکِش دْراج دْراجا بُرِّتنت و بندیکِّش اَڈّ کرت که گۆن آسمانی و جَمو و سُهرێن پَژم و هورت‌گواپێن لیلُما هئوارِش بکننت. اے کار هُنرمندێن اِزمکارێا کرت. 4دو سَرکۆپَگِش اَڈّ کرت و اێپۆدئے دوێن سْروگان پِرِش کرت که اێپۆد مُهر بندگ ببیت. 5اێپۆدئے بند اێپۆدئے پئیما اَت، بزان چه تلاها و چه آسمانی و جَمو و سُهرێن پَژم و هورت‌گواپێن لیلُما تئیار کنگ بوتگ‌اَت. اے بند و اێپۆد هۆر گوپَگ بوتنت، اے یَک‌ٹُکُّر اَتنت، اَنچۆ که هُداوندا موسّا هُکم داتگ‌اَت. 6سِنگِ سُلئیمانِش تلاهئے مُهرَگ‌جاهان نادێنتنت و اَنچۆ که مُهرا آجِننت و نَکشَ کننت، اِسراییلئے مردێن‌چُکّانی نامِش آیانی سرا نَکش کرتنت. 7گڑا اے سِنگ که اِسراییلئے چُکّانی یاتگێجیئے سِنگ اَتنت، اێپۆدئے سَرکۆپَگان پِرِش کرتنت، هما پئیما که هُداوندا موسّا هُکم داتگ‌اَت.

سێنَگ‌پۆش

8سێنَگ‌پۆشے اَڈِّش کرت. اێپۆدئے پئیما اَڈِّش کرت، بزان چه تلاها و چه آسمانی و جَمو و سُهرێن پَژم و هورت‌گواپێن لیلُما اَڈِّش کرت. اے کار هُنرمندێن اِزمکارێا کرت. 9اے چارکُنڈ و دوتَل اَت. دْراجی و پْراهیا یکّ یکّ بِچیلّے اَت. 10اِشیئے سرا چار رِدا گْران‌کیمّتێن سِنگِش لِچّێنت، ائولی رِدا روبی، پُکراج و بئیرِل، 11دومی رِدا پێرۆزه، نیلُم و زُمُرّد، 12سئیمی رِدا شونزێن آکوت، اَکیک و جَموێن آکوت، 13چارمی رِدا تلاه‌رنگێن آکوت، سِنگِ سُلئیمان و یَشْم. اے سِنگِش تلاهئے مُهرَگ‌جاهان نادێنتنت. 14سِنگ، اِسراییلئے چُکّانی نامانی هسابا اَتنت، دوازده نام و دوازده سِنگ. هر یکّێئے سرا چه دوازدهێن کَبیلهان یکّێئے نام چۆ مُهرا نَکش اَت. 15په سێنَگ‌پۆشا چه زَگرێن تلاها رِستگێن سادئے ڈئولێن زَمزیلُکِش اَڈّ کرت. 16تلاهئے دو مُهرَگ‌جاه و تلاهئے دو کَڑی‌اِش اَڈّ کرت و کَڑی‌اِش سێنَگ‌پۆشئے دو سْروگا پِر کرتنت. 17تلاهئے دوێن زمزیلُکانی یکّ یَکّ سرے زرتِش و سێنَگ‌پۆشئے دوێن سْروگانی کَڑیان مانِش کرتنت و 18زمزیلُکانی دومی سرِش زرت و گۆن دوێن مُهرَگ‌جاهان لِچّێنتنت، اێپۆدئے سَرکۆپَگانی دێمی نێمگا. 19چه تلاها دو کَڑی‌اِش اَڈّ کرت و سێنَگ‌پۆشئے آ دگه دوێن سْروگان پِرِش کرتنت، هما لَمبان که دێمِش گۆن اێپۆدا اَت. 20چه تلاها دگه دو کَڑی‌اِش اَڈّ کرت و اێپۆدئے دێما، سَرکۆپَگانی جَهلی نێمگا، اێپۆدئے بندئے سربرا پِرِش کرتنت، همۆدا که سَرکۆپَگ گۆن اێپۆدا لِچِّتگ‌اَنت. 21سێنَگ‌پۆشئے کَڑی‌اِش گۆن آسمان‌رنگێن بندان اێپۆدئے کَڑیان اَنچۆ بَستنت که اێپۆدئے بندئے سرا ببنت و سێنَگ‌پۆش چه اێپۆدا مَسُریت، هما پئیما که هُداوندا موسّا هُکم داتگ‌اَت.

دینی پێشواییئے آ دگه گُد

22اێپۆدئے کباهِش سَرجمیا چه آسمان‌رنگێن گُدا گوَپت و اَڈّ کرت. 23کباها گُٹّے پِر اَت. گُٹّئے چپّ و چاگردا مُهرێن کالارئے پئیمێن دَزگواپێن لَمب پِر اَت که گُٹّ مَدِریت. 24آسمانی و جَمو و سُهرێن پَژمئے و هورت‌گواپێن لیلُمئے اَنارِش اَڈّ کرت و کباهئے دامُنئے لَمبئے چپّ و چاگِردا پِر کرتنت. 25زَگرێن تلاهئے ژانگِش اَڈّ کرت و کباهئے لَمبئے چپّ و چاگردا، اَنارانی نیاما پِرِش کرتنت. 26کباهئے دامُنئے چپّ و چاگردا ژانگے و اَنارے، ژانگے و اَنارے پِر کنانِش کرت، هما پئیما که هُداوندا موسّا هُکم داتگ‌اَت. هِزمتئے وهدا هارونا اے کباه گوَرا کنگی اَت.

27په هارون و هارونئے مردێن‌چُکّان چه هورت‌گواپێن لیلُما جامَگِش گوَپت و اَڈّ کرت. 28پاگ و کُلاه چه شرّێن لیلُما و چێرپۆش چه هورت‌گواپێن لیلُما اَڈّ کنگ بوتنت. 29چه هورت‌گواپێن لیلُم و آسمانی و جَمو و سُهرێن پَژما رنگ‌گواپێن لانکیگے گوَپت و اَڈِّش کرت، هما پئیما که هُداوندا موسّا هُکم داتگ‌اَت.

30چه زَگرێن تلاها پَٹّیے، بزان پاکێن تاجے اَڈِّش کرت و اے لبزِش چۆ مُهرئے نَکشا پَٹّیئے سرا نَکش کرتنت: ”وَپْکِ هُداوندی.“ 31آسمان‌رنگێن بندے پِرِش کرت که پَٹّی پاگئے سرا بۆشتیت، هما پئیما که هُداوندا موسّا هُکم داتگ‌اَت.

تَمبوئے کارئے سَرجمی

32تَمبوئے، بزان شاهدیئے تَمبوئے سجّهێن کار سَرجم بوتنت. اِسراییلیان سجّهێن کار کرتنت. هما پئیما که هُداوندا موسّا هُکم داتگ‌اَت، هما پئیما کرتِش. 33شاهدیئے تَمبواِش موسّائے کرّا آورت، تَمبو و سجّهێن سامان، بزان کَڑی، تَهتَگ، گوَربَست، مِنُک، بُنهِشت، 34چه گوَرانڈئے رَتکگ و سُهر بوتگێن پۆستا جۆڑ کرتگێن پۆش، چه دگه پئیمێن مُهرێن پۆستا جۆڑ کرتگێن پۆش، شاهدیئے پێتیئے دێما لۆنجانێن پرده، 35شاهدیئے پێتی و گوَرباسک و کَپارَتئے پۆش، 36ٹێبَل و سجّهێن سامان و پاکوَنڈێن نگن، 37چه زَگرێن تلاها اَڈّ بوتگێن چِراگدان و چِراگدانئے چراگ و سجّهێن سامان و په چراگان ٹێل، 38تلاهئے کُربانجاه، پِر مُشَگی رۆگن، وشبۆێن سۆچُکی، تَمبوئے دَپئے پرده، 39بْرنجێن کُربانجاه و آییئے بْرنجێن جالی و گوَرباسک و سجّهێن سامان، تْرَشت و پادَگ، 40پێشگاهئے پرده و مِنُک و بُنهِشت، پێشگاهئے دَپئے پرده و ساد و مێه، تَمبوئے، بزان شاهدیئے تَمبوئے کارانی سجّهێن سامان و 41دَزگواپێن گُد که پاکێن جاگها هِزمت کنگئے وهدا گوَرا کنگَ بنت، بزان دینی پێشوا هارونئے پاکێن گُد و هارونئے چُکّانی پێشوایی گُد، سجّهێنِش آورتنت.

42اِسراییلیان اے سجّهێن کار سَرجم کرتنت، هما پئیما که هُداوندا موسّا هُکم داتگ‌اَت. 43موسّایا سجّهێن کار چارِتنت و دیستی که آیان کار سَرجم کرتگ. هما پئیما که هُداوندا هُکم داتگ‌اَت، آیان هما پئیما کرتگ‌اَت. نون موسّایا آ برکت داتنت.

Currently Selected:

دَرگوَز 39: HPKB

Highlight

Copy

Compare