دَرگوَز 38

سۆچَگی کُربانیگانی کُربانجاه

1سۆچَگی کُربانیگانی کُربانجاهی چه چِگردئے دارا اَڈّ کرت. دْراجیا پَنچ دَست اَت و پْراهیا هم پَنچ دَست. کُربانجاه چارکُنڈ اَت. بُرزیا سئے دَست اَت. 2کُربانجاهئے چارێن کُنڈانی سرا یکّ و یکّ کانٹے اَڈّی کرت. کانٹ و کُربانجاهی جتا جتا اَڈّ نکرتنت، اے یَک‌ٹُکُّر اَتنت. کُربانجاهی گۆن بْرِنجا سرپۆش کرت. 3کُربانجاهئے تَگاری و بَرد و تاس و چارشاه و آسدان، سجّهێن سامانی چه بْرِنجا اَڈّ کرتنت. 4په کُربانجاها جالیے، بزان بْرِنجئے ٹَٹے اَڈّی کرت و کُربانجاهئے لَمبانی پَٹّیئے چێرا اَنچۆ اێری کرت که کُربانجاهئے بُرزیئے نێما سَر بوت. 5په بْرنجێن جالیئے چارێن کُنڈان چار کَڑی‌ای اَڈّ کرت که گوَرباسکان بدارنت. 6چه چِگردئے دارا گوَرباسکی اَڈّ کرتنت و گۆن بْرنجا سرپۆشی کرتنت. 7گوَرباسکی چه کَڑیان گوازێنتنت که کُربانجاهئے چست کنگئے وهدا کُربانجاهئے دوێن کَشان ببنت. کُربانجاهی چه دارئے تَهتَگان اَڈّ کرت و تۆکی هۆرک و هالیگ اِشت.

بْرنجئے تْرَشت

8بْرنجئے تْرَشتی گۆن تْرَشتئے پادَگا چه هما جنێنانی آدێنکان اَڈّ کرت که تَمبوئے دپا هِزمتی کار کنگا اَتنت.

تَمبوئے پێشگاه

9تَمبوئے پێشگاهی اَڈّ کرت. پێشگاهئے جنوبی نێمگئے هورت‌گواپێن لیلُمئے پرده دْراجیا یکّ سَد دَست اَتنت. 10گۆن بیست مِنُک و بیست بْرِنجێن بُنهِشتا اَڈّی کرتنت. مِنُکانی بند و کَڑی نُگرهئیگ اَتنت. 11شمالی نێمگئے پرده هم دْراجیا یکّ سَد دَست اَتنت. گۆن بیست مِنُک و بیست بْرِنجێن بُنهِشتا اَڈّی کرتنت. مِنُکانی بند و کَڑی نُگرهئیگ اَتنت. 12رۆنِندی نێمگئے پرده پنجاه دَست اَتنت. گۆن دَه مِنُک و ده بُنهِشتا اَڈّی کرتنت. مِنُکانی بند و کَڑی نُگرهئیگ اَتنت. 13پێشگاهئے رۆدراتکی نێمگئے پرده، هما نێمگ که رۆچ درَ کئیت، پنجاه دَست اَتنت. 14پێشگاهئے دپئے یکّ نێمگێئے پرده پانزده دَست اَتنت. گۆن سئے مِنُک و سئے بُنهِشتا اَڈّی کرتنت. 15دپئے آ دگه نێمگئے پرده هم پانزده دَست اَتنت. گۆن سئے مِنُک و سئے بُنهِشتا اَڈّی کرتنت. 16پێشگاهئے چَپّ و چاگردئے سجّهێن پرده هورت‌گواپێن لیلُمئیگ اَتنت. 17مِنُکانی بُنهِشت بْرنجئیگ اَتنت و بند و کَڑی‌اِش نُگرهئیگ اَتنت. مِنُکانی سَرُک گۆن نُگرها سرپۆش اَتنت. پێشگاهئے سجّهێن مِنُکانی بند نُگرهئیگ اَتنت. 18پێشگاهئے دپئے پرده آسمانی و جَمو و سُهرێن پَژم و هورت‌گواپێن لیلُمئیگ اَت و رنگ‌گواپ اَت. پردهئے دْراجی بیست دَست اَت و پێشگاهئے اے دگه پردهانی پئیما، بُرزی‌ای پنچ دَست اَت. 19پردهئے چار مِنُک و چار بْرِنجێن بُنهِشت اَتنت. مِنُکانی بند و کَڑی نُگرهئیگ اَتنت و مِنُکانی سَرُک گۆن نُگرها سرپۆش اَتنت. 20تَمبوئے و پێشگاهئے چَپّ و چاگردئے سجّهێن مێه بْرِنجئیگ اَتنت.

تَمبوئے سامان

21تَمبوئے، بزان شاهِدیئے تَمبوئے سامان همِش اَتنت که لاویان موسّائے هُکمئے سرا و دینی پێشوا هارونئے مردێن‌چُکّ ایتامارئے سرۆکیا هساب کرت و نبشته کرتنت. 22هرچے که هُداوندا موسّا هُکم داتگ‌اَت، بِسَلێلا اَڈّ کرت. بِسَلێل یَهودائے کَبیلهئے مردمے اَت، اوریئے چُکّ و اَهورئے نُماسگ اَت. 23چه دانئے کَبیلها اَهیسامَکئے مردێن‌چُکّ اُهولیاب اے کارئے سَرجم کنگا گۆن بِسَلێلا گۆن اَت. اُهولیاب آجِنۆک و بلدێن اِزمکارے اَت و گۆن آسمانی و جَمو و سُهرێن بندیکّ و هورت‌گواپێن لیلُما رنگ‌گواپی‌ایَ کرت. 24هما چِست کنگی کُربانیگ، بزان هما ٹێکیێن تلاه که په پاکێن جاگهئے اَڈّ کنگا کارمرز بوتنت، پاکێن جاگهئے شِکِلئے هسابا، سَرجمیا بیست و نُه تالانت و هپت سد و سی شِکِل اَتنت.#38‏:24 اے تِلاه کِساس 1000 سێر اَتنت.

25مهلوکئے داتگێن نُگره که هساب کنگ بوتنت، پاکێن جاگهئے شِکِلئے هسابا، یکّ سَد تالانت و هزار و هپت سد و هپتاد و پنچ شِکِل اَتنت.#38‏:25 اے نُگره کِساس 3500 سێر اَتنت. اے نُگره چه هما مردمان گرگ بوتگ‌اَتنت که مردم‌شُماریا هساب کنگ بوتگ‌اَتنت، 26بزان چه هر مردما یکّ بِکاے. یکّ بِکاے نێم شِکِل اِنت، پاکێن جاگهئے شِکِلئے هسابا. اے نُگره چه هما مردمان گرگ بوتگ‌اَتنت که مردم‌شُماریا هساب کنگ بوتگ‌اَتنت، بزان چه بیست سالَگ و چه بیست سالا مسترێن مردێنان. اے مردێن سَرجمیا شَش لَکّ و سئے هزار و پنچ سد و پنجاه اَتنت. 27اے یکّ سَد تالانتێن نُگره په پاکێن جاگهئے بُنهِشت و پردهئے بُنهِشتانی اَڈّ کنگا کارمرز بوتنت، بزان سد تالانت په سد بُنهِشتا، په هر بُنهِشتا یکّ تالانتے. 28هزار و هپت سد و هپتاد و پنچ شِکِلی په مِنُکانی کَڑی و مِنُکانی سَرُکانی سرپۆش و مِنُکانی بندانی اَڈّ کنگا کارمرز کرت.

29هما ٹێکیێن بْرِنج که چِست کنگی کُربانیگ کنگ بوتنت، هپتاد تالانت و دو هزار و چار سد شِکِل اَتنت.#38‏:29 اے بْرِنج کِساس 2500 سێر اَتنت. 30شاهدیئے تَمبوئے دپئے بُنهِشت، بْرِنجێن کُربانجاه و آییئے بْرِنجێن جالی و کُربانجاهئے سجّهێن سامان، 31پێشگاهئے چَپّ و چاگردئے بُنهِشت، پێشگاهئے دپئے بُنهِشت، تَمبوئے سجّهێن مێه و پێشگاهئے چَپّ و چاگردئے سجّهێن مێه چه همے بْرِنجان اَڈّ کنگ بوتنت.

Currently Selected:

دَرگوَز 38: HPKB

Highlight

Copy

Compare